都好耐冇玩一個 game 玩到爆機 lu. 尋晚就玩 Heavenly Sword 玩到爆機. 當然, 一來個 game 真係幾短, 不過亦因為我好鍾意呢隻 game, 所以先會有興趣玩到尾. 我一向對動作 game 都興趣不大, 所以當有隻動作 game 吸引到我, 就要o係呢度表揚一番.
覺得 Heavenly Sword 好玩係因為佢有好多特別o既地方. 首先, d 唔識玩o既人會 mash buttons, 胡亂出招, 但係咁玩係唔掂o既, 因為好多時敵人太多, 會成日俾人打中. 又未必會死, 不過樣衰. 正確, 而有型o既玩法係要小心好多, 睇清楚擋到人地攻擊o個一刻用 counter attack, 而呢 d 反擊o既 animation 好有型, 每當成功使出, 都會有種莫名o既滿足感. 另外 aerial combo 亦非常精采. 你可以打人上半空, 再跳上去打佢, 但係o係半空會變成慢鏡, 會有足夠時間出 d 好型o既招數, 好過癮.
另外, 亦唔係只有劍斗, 亦有好多地方要用箭射人. 有趣o既係支箭射出後, 會變成慢鏡頭, 跟住支箭飛, 你可以改變支箭o既方向, 當睇住支箭射入敵人隻眼度, 發出慘叫, o個種快感真係好頂癮. 畫面亦靚, 人物設計亦出色, 尤其係主角 Nariko 同 Kai, 短短幾粒鐘就變成好鍾意佢地. d 環境亦好正, 有 d 地方甚至令我諗起 ICO, 嘩, 如果第日出隻好似 ICO 咁o既 game, 而有 Heavenly Sword 咁質數o既畫面, 咁就真係正. 音樂同配音亦好出色. 成隻 game 都造得好好, style 一流, 令識玩o既玩家覺得自己打得有型, 滿足感十足. 唯一唔好係個 game 短, 大概7-8 個鐘咁上下. 不過係個 game 實在好玩, 先會令人覺得短. 其實 7-8 對動作 game 唔算好短, Devil May Cry, Metal Gear Solid, Resident Evil 3 都唔係長得幾多. 希望將來會再有同類型, 唔使 mash buttons o既動作 game.
ps, 唔記得報告, 我已經收到消息, 我 d comprehensive exams 已經及格晒. woo, 以後唔使再考o個 d 差唔多成十個鐘頭o既痴線考試.
No comments:
Post a Comment