榮兄,
近日喺網上睇咗篇寫得幾簡單, 但又令我學到新知識的文章, 同你分享一下. 喺網上、小說內容, 都可能有聽過一個講法: 基督教聖經正典的內容, 係由公元第4世紀舉辦的一個尼西亞會議決定, 而呢個會議係由羅馬君王Constantine幕後操縱. 多年來, 我喺自己channel的聽眾留言又或者信仰信箱, 都見唔少人假設呢個故事就係事實. 係一個陰謀論小說, 又或者俾 d 人唔識扮識嘢的材料.
我近日睇嗰篇文就係解釋, 呢個講法只係一個傳說, 純粹就係一個冇歷史根據的故事. 尼西亞會議係喺公元325舉行, 但我地知道無論係喺呢個會議之前同之後, 都有出名的教父喺度討論聖經應該包括有咩內容, 例如支持尼西亞會議的教父 Cyril of Jerusalem (約公元350) 同 Athanasius of Alexandria (約公元367), 都仲有討論聖經是否應該有啟示錄. 冇任何早期的記錄, 提及過尼西亞會議對聖經內容任出咗決議, 整咗個finalized list出來. Jerome翻譯The Book of Judith成拉丁文嗰時, 佢留下一段前言, 其中似乎提及, 係因為尼西亞會議有討論到Judith應否算係聖經, 所以佢先決定翻譯埋Judith做拉丁文, 不過有喺會議度討論到, 同喺會議當中作出咗決定係兩回事, 事實上, 現代學者係數得出有好幾個支持尼西亞會議的教父, 都冇包括Judith喺佢地的聖經正典list度.
如果尼西亞會議決定咗聖經正典內容呢個故事完全冇歷史根據, 咁呢個講法又係從何而來的呢? 現代學者直頭知道呢個"古代fake news"的源頭. 有一篇來自公元第9世紀的希臘文抄本, 叫做Synodicon Vetus, 呢篇嘢來自第9世紀, 即是尼西亞會議的幾百年後, 但係第9世紀的時候應該都冇乜幾多人睇過, 直到第16世紀先有人正式publish, 多D人有機會睇到.
Synodicon Vetus的內容, 係簡介教會歷史上的重要會議, 其中亦有提及尼西亞會議. 根據呢個Synodicon Vetus的講法, 當尼西亞會議進行嗰時, 參與會議嗰班人向神祈禱, 希望神向佢地顯示聖經正典應該包括邊D書, 所以班友仔就將一堆書放喺聖壇上面, 跟住就有神蹟發生, D偽經、旁經就奇蹟地跌晒落地, 神揀選嗰D正典就留返晒喺張枱上面, 所以尼西亞會議就係透過呢個神蹟, 決定咗聖經正典的內容...
呢個當然係傳說, 不過著名哲學家 (aka 古代KOL) 伏爾泰喺第16世紀嗰時, 喺佢 d 書入面有提及Synodicon Vetus講的呢個故事, 慢慢變成咗: fakes news > KOL 轉發 > 人人當事實.
