榮兄,
我都已經好耐冇買本書嚟睇, 但近日我買咗本: Susannah Heschel, "The Aryan Jesus". 我仲睇緊, 但本書的內容好過癮, 講納粹時期為數不少的神學家同教會領袖點樣用盡方法嚟幫基督教「去猶化」, 例如宣揚耶穌唔係猶太人, 重新edit過本聖經將好多有猶太背景的內容攞走, 教導D信徒用其他說話去取代哈利路亞之類. 你都知我以前讀書嗰時, 就係學透過從猶太人古代文化去了解聖經, 我而家先知, 我呢個時代會有呢個研究方向, 係因為我地上一代有呢段「去猶化」的歷史, 而家的方向其實係一個反彈, 回應過去的這一段時期.
我覺得好有趣, 睇返過去一D其實都好出名的神學家, 原來曾經講過耶穌唔係猶太人呢一類無厘頭說話, 學識並冇令佢地更接近真理, 只係為佢地提供更多花招嚟包裝連佢地自己都知道的假話. 可惜本書冇中文翻譯, 唔係我就寄本俾你睇.
最近錫安教會嗰個梁日華牧師入咗醫院, 事關佢食包食到爆血管, 唔係講笑, 佢地個blog話: 「到了清晨3:20⾄4:01，⽇華牧師仍然與『籌備牧師今年⽣⽇』的團隊，如常溝通，安排著各樣籌備⼯作。及⾄⽇華牧師吃了他最喜愛的『⽟⼦雙層將軍漢堡』後，由於夜已深，⾝體消化能⼒下降， 不久，⾝體就開始出現不適。到了清晨約5時，⽇華牧師突然出現嚴重胃痛及劇烈⼼跳。及⾄上午7:33，⽇華牧師發現⾃⼰的症狀，正是冠⼼病，若果持續下去，將會引致⼼臟猝死。⽇華牧師隨即緊急召喚住在附近的全職同⼯，安排送他到九龍浸會醫院，約早上8:07，全職同⼯駕⾞，將⽇華牧師送到浸會醫院。」
其實佢一把年紀, 有咩急病都好正常, 不過佢一向以健康達人自居, 成日叫D信眾買埋D無厘頭健康產品, 教人食太陽、咖啡灌腸之類, 所以佢自己大病, 令到間教會好緊張, 立即狂出post, 要將佢病呢件事扭到變成好事. 例如, 佢地話今次日華牧師急病, 正好證實佢的地位: 「Tony Stark 因⼼臟問題變成 Iron Man，並在《Iron Man》第⼀集的最後⼀幕承認自己就是 Iron Man，並於最後⼀集的《終局之戰》中， 他更說出一句經典對⽩︰『I am Iron Man.』 作完美呼應。這次日華牧師入院事件也是因心臟問題而入院，而出院後他得出一個結論，他能說出：『I am Iron Man.』」
又話今次日華牧師今次入一入醫院, 就好似約書亞同耶穌過一過約旦河咁, 出返嚟就變超人: 「神給予⽇華牧師入院事件的印證信息，是為著增加我們的信⼼，相信我們經歷了從神⽽來的⾝份轉換。就正如約書亞世代過了約旦河後，經歷⾝份轉換，變成了戰無不勝的軍隊；主耶穌於過約旦河後，也經歷⾝份轉換， 於三年半中，⾏出各種前所未⾒的神蹟。⽽今次，⽇華牧師經歷約旦河，神是以 Man of Steel 和 Steelman，指向他⾝份轉換的內容，轉換成 Superman 及 Iron Man 般， 展開末後三年半的神蹟之旅。」
之傑
