Wednesday 9 April 2014

美國隊長 2

頭先望下張睇戲積分卡, 由舊年四月到尋晚, 課金去戲院睇咗8齣戲, 全部都係自己一個人去睇的, 但睇過乜嘢唔係好記得晒, 好似有Oblivion, Olympus Has Fallen, Gravity, 哈比人, Non Stop, 同埋尋晚去睇美國隊長2, 仲有兩齣諗唔起係乜, 真係白睇了 sosad.

尋晚星期二睇戲比較平, 同埋時間太多, 不想成晚喺屋企, 好想出街浪費下時間, 所以決定出去搵齣戲睇, 最後選咗美國隊長2. 其實我一向都唔鍾意睇Marvel尐戲, 除咗The Incredible Hulk, 純因為有Edward Norton同埋Liv Tyler, 同埋美國隊長都算OK, 算係有些故仔, 男女主角曖曖昧昧幾好睇, 結局幾有傷感 feel, 所以都俾面去戲院睇睇第二集.

可能因為係星期二晚, 好多人, 本來想睇8:30, 不過7:45去到已爆晒, 轉買9:00, 排隊排成粒鐘先等到入場霸中間位, 排隊期間同坐低後, 都被班學生妹夾實 sosad, 可惜係班又嘈又唔靚的學生妹.

至於齣戲, 我覺得第一集故事好睇好多, 第二集只係一般Marvel戲, 有大場面, 有幾好笑的對白, 但故事同角色真係冇料到. Robert Redford可以好型, 但係冇乜發揮機會; Scarlett除咗個樣之外, 其實冇第一集個女主角咁好睇; 男主角第一集做弱仔嗰時幾好睇, 但第二集全程大隻, 反而冇咁討好, 雖然睇住佢攞住個盾牌狗衝都幾好睇. 最突出可能係個Winter Soldier, 造型甚有霸氣, 但係一除走個面具, 立即謝晒, 霸氣盡失.

5 comments:

Anonymous said...

1/3 係redeemed! 即係免費!?

Howtindog said...

係, 嗰次仲係喺比較貴的戲院睇, 一樣免費, 唔使補錢. 不如你改個假名留言, 個個都Anonymous, 我分唔清邊個打邊個 sosad

步驚暈 said...

一直都係得我留言之麻, 散餐女呀 XD

Howtindog said...

散餐步驚暈 sosad

嘍囉蛋散路人甲 said...

唔係,我都有留言,我叫嘍囉蛋散路人甲。