Tuesday, 18 December 2007

玩到尾o既 RPG (2):DQV



我本身並非勇者鬥惡龍擁護者, 因為我覺得呢個系列比較o吾著重故事. 不過凡事亦有例外, DQV 故事性好強, 而且故事同主角性格都非常吸引人, 足夠成為令人玩到尾o既動力, 係勇者系列中我o既最愛.

呢個 game 可以控制o既人物o吾多, 就係主角勇者同埋佢o既家人, 包括佢老豆, 老婆, 同埋一對仔女. 應該仲有其他, 但係太耐, 真係o吾記得. 呢 d 角色之中, 最重要o既就係主角本身, 你會同佢一齊經歷佢o既故事, 由故事開始佢只係嬰兒, 到佢童年變成孤兒, 到成長後變得強壯, 到後來認識老婆, 到被逼同家人分離, 變成人地口中o既傳說, 到最後重出生天, 同自己失散o既子女重聚. 一路發展落去, 會發覺呢個 game 好成功咁制造出一個好有說服力o既勇者, o吾係單單因為佢係被命運選中所以成為勇者, 佢實在係於苦難中成長. 最有意思係故事閞始, 成長後o既主角透過時光倒流, 鼓勵童年o既自己, "預言"話將來命途會好苦, 但係千萬不可放棄. 呢一段o係 game 中出現兩次, 第一次係你仲係童年o既時候, o個時只係諗, 呢條友 d 服飾咁鬼馬, 一定係主角o既將來;到第二次, 就係你作為成年人, 經歷過好多之後, 同童年o既自己講"不可放棄", 呢次就真係好有 feel, 我覺得係 RPG 歷史中最精彩o既一幕.

可惜近年勇者系列都再無一集有個咁魅力非凡o既主角, 真係可惜.

0 comments: