回歸

我第一個blog應該係喺xanga, 後來搬嚟blogspot, 再後來先有youtube頻道, 所以呢邊其實都算老牌, 是舊有產業. 經過棄置成年, 我估應該已經冇乜人嚟睇, 正好用嚟記錄我自己的私人嘢, 又可以search得返, 好過放喺facebook (好似係). 當然,可能仲有兩三個人唔知點解會嚟呢邊睇, 咁我相信係緣份, 都抵佢地聽到我唔喺其他地方講的誠實說話.

至於最近生活, 做o既嘢差不多, 依然係做緊明報份工, 我學歷廢, 搵其他工唔易, 見過幾次都不成功, 有時有freelance就做下, youtube廣告又有少少, 夠我出去食幾餐焗豬扒飯咁上下. 用我最多心血同時間的, 我覺得係熱血時報嗰個耶教異聞錄, 做得不好, 但都用我很多時間, 不過答應咗要做o既嘢, 就盡力預備好些, 都唯有係咁. 所以而家基本每星期花5-10個鐘準備異聞錄, 花兩三個鐘錄howtinlive, 還未計一般的短片, 感覺都有少少忙碌. 老老實實, 本來我都覺講嘢有多少重複, 有舊片被人傳閱就已經足夠, 是有打算慢慢變唔錄. 但最近有些平時貌似甚有霸氣的朋友, 因一些事就好似豆腐咁成個人散晒. 我的性格係, 好多人有興趣做的嘢我會保持距離, 因為都多我一個唔多; 冇乜人做的嘢我會覺得有興趣做下. 既然平時同道的朋友散晒, 咁我咪維持多一陣, 又唔會覺得為難o既, 都很樂意, 仲表現得懶瀟洒懶有霸氣, "橫掂都做, 攞彩攞足尐", 係我的人生格言 sosad.

不過只係表現出來, 其實最近精神都不好, 差唔多每晚都醒咗瞓唔返, 生活上有些改變, 感覺有些難受. 我見有尐男仔朋友, 好似BB仔咁, 心情唔好就不斷呻吟, 事實當然係想要被人呵被人tum. 我都有需要作些少渲洩, 但如果搞到被人呵護被人tum, 被人問有冇事, 其實我會覺得很尷尬, 所以這些事, 喺呢邊寫, 會好過喺其他地方, 喺呢度可以安全些, 我disable埋尐comment, 包冇人可以留言關心我 sosad.

娃娃唱我可以

家姐好正, 搞到我突然覺得《我可以》都幾好聽, 最後仲整句「可以嗎? 可以嗎?」, 嗚呀

The Secret Life of Walter Mitty

我唔鍾意Ben Stiller, 但係覺得The Secret Life of Walter Mitty很感人. 其實我覺得齣戲太長咗少少, 不過有尐戲, 即使覺得佢有多少瑕疵, 但係其中一些對白或場面太好睇, 可以蓋過一切. Walter Mitty就係咁樣, 其中有一幕我好鍾意, 個主角喺度難以取捨點做的時候, 佢突然發白日夢聽到女主角唱David Bowie嗰首Space Oddity俾佢聽, 令佢衝上去部直升機度. 嗰一幕有意思, 歌又好聽, 又可切合歌詞, 再配合跳上直升機一飛沖天的畫面感覺, 睇得好開心.

生日禮物

今年收到一份以前冇收過的生日禮物, 很有新意, 好鍾意 sosad. 紫色 iris 的顏色很奇幻, 用相機影唔返出嚟.

Dale C. Allison演講: The Historical Christ and the Theological Jesus

今個星期推介o既演講嘉賓係 Dale C. Allison, 佢最著名o既研究係有關耶穌研究、福音書、雅各書, 今次選佢係因為佢最近跳槽, 去 Princeton Theological Seminary 坐正做 Richard J. Dearborn Professor of New Testament Studies, 非常巴閉. 最近佢喺一本新書 Jesus, Criteria, and the Demise of Authenticity 入面有篇文, 叫"It Don’t Come Easy: A History of Disillusionment", 講佢自己做耶穌研究o既經驗, 點樣愈嚟愈覺得 criteria of historicity 靠唔住, 引起學術界入面不少討論.

以下呢段片, 係佢喺2008年, 喺 Duke o既 Kenneth W. Clark Lectures 入面兩個演講, 主題為:
The Historical Christ and the Theological Jesus

James VanderKam: 死海古卷與早期教會講座

 

 

今個星期推介的是 University of Notre Dame 的 James VanderKam, 佢係死海古卷的編輯之一, 係死海古卷、Book of Jubilees、古代日曆、古代猶太傳統專家. 唔係梁燕城嗰種專家, 而係全世界最頂尖嗰種. 2007年2月5至7日, VanderKam 喺 Point Loma Nazarene University 作出四次演講, 主題係"The Dead Sea Scrolls and Earliest Christianity", 對死海古卷同早期基督教有興趣o既人值得聽. 英文就一定的, 老老實實, 要聽頂尖學者演講, 唔可能係中文講座.

第一講
死海古卷與聖經文本
The Dead Sea Scrolls and the Texts of Our Bibles

第二講
死海古卷與早期耶教的猶太背景
The Dead Sea Scrolls and the Jewish Context of Early Christianity

第三講
死海古卷與耶穌及福音書
The Dead Sea Scrolls in Relation to Jesus and the Gospels

第四講
死海古卷與使徒行傳及保羅書信
The Dead Sea Scrolls in Relation to Acts and Paul's Letters

ABC 電台節目回顧 Geza Vermes

Rachael Kohn 喺 ABC 電台o既節目回顧 Geza Vermes, 講到佢生平同埋學術貢獻, 節目內容包括有 主持 Rachael Kohn 獨白, 訪問牛津學者 Martin Goodman 同埋 Vanderbilt Univeristy 的 Amy-Jill Levine. 中間亦插入少少幾年前 Rachael Kohn 同 Geza Vermes 做的訪問節錄. 保證好聽過《耶教異聞錄》sosad. 不過講或寫中文的, 直到而家, 似乎都只得我有詳盡少少講 Geza Vermes, 呢方面我覺得算係一種建樹.

http://www.abc.net.au/radionational/programs/spiritofthings/the-dead-sea-scrolls-and-jesus3a-the-life-work-of-geza-vermes/4729428

東方閃電全能神媽X使徒保羅

無厘頭得嚟又確係娛樂性十足:

「(保羅) 總認為：我能作工，我比一般人強，我體貼主的負擔，誰也沒我體貼主的負擔，誰也沒我悔改得深，因我蒙了大光照，看見了大光，所以說我比任何一個人都悔改得深。這是當時他自己心裡想的。到他要作的工作結束時，他說：『我該打的仗打完了，當跑的路跑盡了，有公義的冠冕為我存留。』他打仗、作工、跑路完全是為了公義的冠冕，並不是在積極進取，他作工的態度雖不是應付，但可說成是他的作工只是為了彌補他的過失，彌補他良心的控告，他盼望的只是早點將工作作完，將他要跑的路跑完，將他要打的仗打完，以便早點得著他盼望的公義的冠冕。他所盼望的並不是以自己的經歷與真實的認識來見主耶穌，而是盼望早點作完工作以便到主耶穌見他之時賜給他因作工而當得的賞賜。他是以作工來寬慰自己，也是以作工來搞交易，來換取以後的冠冕。他追求的只是冠冕，並不是真理，也不是神，這樣的追求怎麼能是合格的呢？他的存心、他的作工、他的代價、他的全部付出充滿了他美好的幻想，他完全是按著他私自的願望而作工的。他的全部作工中所付的代價沒有絲毫的甘心，只是在搞交易，並不是為盡本分而甘心付出，而是為了達到交易的目的而甘心付出，這樣的付出又值幾分錢呢？誰又能稱許他那不乾不淨的付出呢？誰肯對這樣的付出而頗感興趣呢？」（選自《話在肉身顯現》）

全能神看中國小農DNA

陶傑同全能神應該o岩傾 sosad

「就人的敗壞、污穢、不義、抵擋、悖逆這些東西在中國人身上表現最全面，各種各樣都顯露出來。一方面素質差，再一方面生活落後、思想落後，生活習慣、社會環境、出生家庭都差，都是最落後的，這些人的地位也低下，在這地方作工有代表性，試點工作作全面了，以後再開展工作好作多了，這步工作作成了，以後的工作也不在話下，這步工作成了，大功徹底告成了，整個宇宙征服的工作也就徹底結束了。」（選自《話在肉身顯現》）

林瑞麟: 才幹比喻啟示應接受政改方案

上個星期我分別喺 blog 同 youtube 短片都有講到唐德玲喺《晴報》專欄嗰篇文章《聖經啟示理財智慧》, 我指出只要花少少心機, 睇下才幹的比喻喺馬太福音第24同第25章o既上文下理, 就知道才幹比喻絕對唔係教人投資策略.

我推出短片後, 有網友指出, 當年的政制事務局局長林瑞麟喺2005年一個浸信會舉辦的「基督徒與政改方案研討會」中, 亦有引用才幹的比喻去支持香港市民應支持政改爛方案的論點: 

故事中，三個僕人分別要管理五千、二千及一千銀錢，有五千及二千銀錢的僕人，分別賺了五千及二千銀錢回來，只有那有一千的僕人不作工，沒有把銀錢去生息。

林瑞麟說﹕「政改是在可能的空間中尋求最大民主成分，最朝普選方向最大的方案，但現今在人大釋法的框架下未能做到普選，雖然拿不到五千，但能賺二千就二千。」他強調，不想當那個只有一千銀錢的僕人，不願看見政改原地踏步。

同樣道理, 才幹比喻當然唔係教人如何決定政改方案之優劣, 林瑞麟亦係犯了「想做就去做, 聖經專為我服務」的毛病. 當然, 林瑞麟固然係壞人, 但呢種草率引經態度, 係當今教會的文化和習慣.

最後, 引用Ben Witherington III一句名言: "A text without a context is just a pretext for what we want it to mean."