遊戲機

以前細個, 最先係老豆買遊戲俾我玩, 紅白機任天堂、超任都係佢買的, 主要都係得我玩, 但我記得老豆都好沉迷玩1943, 嗰時PC Engine有隻可以雙打的賽車game, 佢都有成日同我一齊玩. 後來去咗加拿大, 好自然咁停咗一排冇買新game玩, 直至出Final Fantasy 7, 為咗玩隻game就自己買咗部Playstation, 跟住就冇停過了, Gamecube, Dreamcast, PS2, PS3, Xbox 360, PS4都有買. 所以, 買新機係我已經做過好多次的事, 但係今次買到部PS5, 個過程真係好好笑, 差唔多係奇遇level, 需要留個文字記錄. 

首先, PS5長期缺貨, 香港好多人喺度炒機, 唔止 D 炒家, 而係連 D 唔買機的人都買埋一份, 當炒波鞋咁賺下外快, 連 D 有地址舖位的商店都炒埋一份. 我最憎 D 人炒嘢, 所以我一早就立志唔會俾錢呢 D 人賺, 所以除咗等香港嗰兩三個會有貨到的商店搞抽籤以原價買機之外, 我一直都喺度留意Amazon, 因為我知Amazon係會有海外送貨. 但係Amazon一樣處於長期缺貨, 我都係唯有靠Twitter通知, 一見有notification就去睇下, 但通常都係一有貨到, 就立即冇晒. 

但係上個星期我買到了, 而我今次買到, 唔係因為我手快, 而係因為Amazon出錯, 害晒所有人, 偏偏就益到我 sosad. 呢件事連傳媒都有報導: https://comicbook.com/gaming/amp/news/amazon-ps5-playstation-5-restock-error/. Amazon送貨係有分區域, 北美地址當然幾時都冇問題, 但係亞洲之類的其他地區, 視乎咩貨同咩賣家, 有時係會有貨都唔送的, 咁就會買唔到. 但係嗰日, 大家都見到PS5喺Amazon係有貨, 甚至可以加入個cart度, 但係所有喺北美的人都找唔到數, 因為佢話件貨唔送北美, 咁呢個當然係glitch嚟, Amazon冇可能唔送北美, 只送北美就有可能. 結果我好輕易就買到, 因為個system唔知出咩錯, 北美唔送, 但係亞洲會送, 益晒我. 當時如果我心恨手辣, 話唔到訂多幾部都仲得 sosad

送貨好快, 幾日就已寄到去老婆公司. 撞o岩嗰日老婆晚上有些公事, 直頭唔會返屋企瞓, 所以我放工去尖沙咀pick up咗部機, 就去搭的士回家. 我一上車, 個司機就好興奮, 讚嘆我點解會買到部PS5, 雞啄唔斷咁講佢打機生涯, 話佢而家有部PS4同佢個女玩, 又呻好多女人都唔支持另一半打機, 話就係因為打機, 令到佢同佢老婆/前妻關係搞得唔好, 去到落車佢仲收少我$1, 好好笑 sosad