怕熱

我記得細個嗰時係好唔怕熱的, 因為以前讀培正小學嗰時, 學校課室係冇冷氣, 而當時我係成日都全年都著校褸返學, 我記得有次連個老師都問我唔覺得熱咩? 但後來搬咗去溫哥華, 氣候好唔同, 咁多年都從來唔需要裝冷氣, 廿七、廿八度就已經發出酷熱警告, 講到係千年一遇的熱浪, 證實全球暖化之類. 喺溫哥華住咗好多年之後, 個人就變得愈來愈怕熱, 到幾年前搬返香港之後, 覺得香港根本上只有幾日係氣溫適中, 有10%係凍, 其他所有日子都係熱到地獄咁, 好多時出街, 我已經熱到全身濕晒, 但老婆都未開始出汗, 諗起就令人十分憤怒. 

但係今年有D變化, 因為我開始食嗰D血壓藥之後, 我真係覺得個人變到冇咁怕熱, 變成有時容易怕凍! 開始發覺嗰時係老婆喺屋企話唔夠冷氣覺得熱, 但我覺得好涼爽; 到呢兩個星期, 大家都話香港出現熱浪, 而事實上氣溫都係好高, 每日都三十幾度, 而過去只要係廿幾度以上我就已經覺得係夏天咁樣的感覺. 但係呢幾日出街, 我都冇覺得特別熱, 當然都會覺得曬同有少少熱, 但我知道同以前嗰種感覺係差好遠 sosad