返工

呢排返工比平時更多嘢做, 已經去到放工之後連玩同做其他嘢都冇精神的地步, 再加上個痴線上司令簡單嘢變無比複雜的特殊能力, 咁就更加百上加斤. 

而家我非常期待去到八月尾, 因為去到八月尾就係我喺呢個office做滿六年, 到時張約到期我唔打算再續, 除非到時武漢瘟疫令到世界大亂、喪屍圍城咁款, 否則我係99.9%決定唔會再續. 其實咁樣幾好吖, 做滿張約先走, 係有頭有尾的完滿結束. 

其實對於而家工作, 我係冇乜不滿, 再多嘢我都可以應付得到, 冇工作係趕得過以前做報館同廣告公司啦; 各個同事識咗咁多年, 都已經成為好朋友. 不過我唔想再為個上司做嘢, 咁我都已經頂咗幾年, 一於就喺今年暑假讓呢件事發生, 喺我心目中, 我已經留得比我預算中長好多, 都係時候move on了. 

雖然我都鍾意穩定同出糧, 但係對我嚟講, 生活開心同能夠同同事相處得好更加重要, 否則我係唔介意冒下險, 直至搵到我可以接受的生活為止.