詩篇 130

喺正式開始寫呢篇講章之前, 我有上過youtube睇下其他人點講呢段經文, 我見李思敬就話, 呢篇詩篇個詩人喺度求拯救, 唔係講詩人讖悔講求赦免, 但係溫偉耀就相反, 話呢篇嘢唔係講求拯救, 唔係講D乜嘢喺黑夜中o既盼望, 而係講痛悔認罪. 今日我地就一齊睇下呢段經文係點講, 不過又冇乜心理壓力o既, 因為錯咗都梗會有人陪葬, 你話我解錯咗, 咁阿邊個博士都係咁錯啦. 

1 耶和華啊，我從深處向你求告。

2 主啊，求你聽我的聲音！願你側耳聽我懇求的聲音！

呢首詩篇o既主角, 喺度向神求告. 我見過有人將"深處"了解為罪的深淵或者罪的泥沼之類, 有呢個可能性, 不過字眼上並冇明確咁表達, 呢個人係求神赦免. 不過呢個係頭兩節o既內容, 跟住又點呢?

3 主耶和華啊，你若究察罪孽，誰能站得住呢？

4 但在你有赦免之恩，要叫人敬畏你。

其中一個可以理解呢兩節經文的角度, 可以當佢為求告的內容. "神若究察罪孽, 誰能站得住呢", 言下之意就係求主唔好究察佢o既罪, 咁咪即係求主赦免囉. 呢個係有可能的, 不過要留意, 喺字眼上, 依然見唔到詩篇個主角有向神求赦免喎. 現實中有人係會咁講嘢的, 永遠唔會明確咁講佢想要乜嘢, 要其他人心領神會先高興. 例如我老婆叫我幫佢攞嘢, 佢唔會就咁叫我攞乜乜乜, 而係話: "如果有人幫我攞個眼鏡過嚟就好la". 又例如, 有人同未來外母飲茶, 個大奶奶無啦啦講, 人若冇自己物業, 誰能在香港站得住呢; 佢冇明講, 但係你就知道人地係開口要求你娶人個女前買定樓先. 但係, 呢度唔似個詩人用語言藝術包裝, 試下唔開口求神赦免, 神get唔get到我意思先. Bottom line: 我睇唔到呢兩節經文有明確表示求神赦免. 

但係唔係求神赦免o既話, 咁做乜無啦啦又提及罪孽、赦免呢D字眼? 咁又唔係無啦啦喎, 但首先我地要了解多D罪喺聖經, 尤其是舊約聖經o既描寫. 罪對我地嚟講係一個抽象、abstract o既概念, 對古代人嚟講都係abstract, 所以好多時佢地係會透過metaphors去談論、描寫、理解罪呢個概念. 以下我係依賴Gary Anderson一本書, Sin: A History的內容嚟作為參考資訊. 根據Gary Anderson研究, 舊約聖經比較早期的部份, 好多時係將罪形容為重擔, 又或者污垢; 但去到比較後期的部份, 例如以賽亞書一些部份、但以理書、新約聖經, 就好多時係將罪形容為債務. 

舉一些早期的例子幫助說明: 例如, 贖罪祭的代罪羔羊. 根據利未記 16, 要準備兩隻畜生, 一隻殺俾耶和華, 呢part我地可以理解吖, 因為有D聖經金句都話不流血就罪不能赦免吖嘛, 但好多現代信徒都冇留意, 另一隻唔係攞嚟殺個喎: //20 亞倫為聖所和會幕並壇獻完了贖罪祭，就要把那隻活著的公山羊奉上。 21 兩手按在羊頭上，承認以色列人諸般的罪孽過犯，就是他們一切的罪愆，把這罪都歸在羊的頭上，藉著所派之人的手，送到曠野去。 22 要把這羊放在曠野，這羊要擔當他們一切的罪孽，帶到無人之地。// 嗰隻羊的作用, 係背起將以色列人的罪, 將呢個重擔帶去一個遙遠的地方.

另一個例子, 以賽亞書 1: //我養育兒女，將他們養大，他們竟悖逆我。 3 牛認識主人，驢認識主人的槽，以色列卻不認識，我的民卻不留意。犯罪的國民，擔著罪孽的百姓，行惡的種類，敗壞的兒女！// 呢段經文講到以色列人衰過牛同驢, 因為動物都識得認主人, 同埋牛同驢就背負重擔工作, 而以色列人背負的係罪孽. 

至於一D比較後期的例子, 就開始出現用債務嚟談論罪的情況, 例如馬太福音 6: //免我們的債，如同我們免了人的債。// 

又例如馬太福音 18: //21 那時，彼得進前來，對耶穌說：「主啊，我弟兄得罪我，我當饒恕他幾次呢？到七次可以嗎？」 22 耶穌說：「我對你說，不是到七次，乃是到七十個七次。 23 天國好像一個王要和他僕人算帳。 24 才算的時候，有人帶了一個欠一千萬銀子的來。 25 因為他沒有什麼償還之物，主人吩咐把他和他妻子兒女並一切所有的都賣了償還。 26 那僕人就俯伏拜他，說：『主啊，寬容我！將來我都要還清。』 27 那僕人的主人就動了慈心，把他釋放了，並且免了他的債。28 「那僕人出來，遇見他的一個同伴欠他十兩銀子，便揪著他，掐住他的喉嚨，說：『你把所欠的還我！』 29 他的同伴就俯伏央求他，說：『寬容我吧！將來我必還清。』 30 他不肯，竟去把他下在監裡，等他還了所欠的債。 31 眾同伴看見他所做的事，就甚憂愁，去把這事都告訴了主人。 32 於是主人叫了他來，對他說：『你這惡奴才！你央求我，我就把你所欠的都免了。 33 你不應當憐恤你的同伴，像我憐恤你嗎？』 34 主人就大怒，把他交給掌刑的，等他還清了所欠的債。 35 你們各人若不從心裡饒恕你的弟兄，我天父也要這樣待你們了。」// 

對古代的以色列人嚟講, 罪唔止係一個feeling, 罪疚感, 而係比我地想像中更實在. 罪係可以製造some-thing出來: 例如一個重擔, 一筆債務, 又或者一個污漬; 要解決罪, 就需要挪走嗰個重擔, 支付嗰筆債務, 清洗嗰個污漬. 罪所製造出來嗰舊嘢, 係唔會放埋一邊夠耐, 就自動消失, 而係需要相應處理. 而罪亦係神可以見到o既嘢, 好似肩上o既重擔, 又或者帳簿上的一筆債務咁樣, 所以距離係有分別, 一隻羊係可以將罪帶到離開以色列更遠的地方. 一些聖經金句都反映咁o既思想: // 東離西有多遠，他叫我們的過犯離我們也有多遠。// 將我們的一切罪投於深海。// 

透過以上對罪的理解, 我地就可以明白, 點解呢篇詩會由向神求告, 講到去究察罪孽同赦免之恩. 求告神就等於要求神將注意力放喺你身上, 得到神的注意, 就意味住佢會聽到你的求告, 但同時亦等於佢會見到你的重擔同罪債. 所以, 諗真的話, 向神求告其實可以一個幾驚的情況, 尤其是如果你知自己係拖住一堆罪擔罪債的話.

講返呢篇詩, 個主角的態度係點樣? 佢要求神將注意力放喺佢身上, 有冇好慌張咁求神赦免? 

5 我等候耶和華，我的心等候，我也仰望他的話。

6 我的心等候主，勝於守夜的等候天亮，勝於守夜的等候天亮。

7 以色列啊，你當仰望耶和華，因他有慈愛，有豐盛的救恩。

8 他必救贖以色列脫離一切的罪孽。

我就唔覺呢個似係一個痛悔認罪的禱告. 個主角只係表達, 非常期待神的到臨, 而且逾快逾好, 呢個似乎係一個能夠喺神面前於心無愧的人. 咁唔代表呢個係一個完美o既人, 不過 1) 呢篇詩都有提, 神有赦免之恩, 有慈愛, 有豐盛的救恩, 再加上 2) 呢個人已經有正式面對自己的罪, 所以佢唔怕要求神聽佢的求告, 唔需要避開神的注意. 

理論上, 做一個於心無愧o既人好容易, 只要好無恥就可以. 例如有高官壞事做盡, 夠膽話自己於心無愧; 嗰個西瓜佬接受訪問時, 話自己食得瞓得又冇做虧心事. 不過, 呢首詩篇個主角唔似係咁o既情況, 佢似係一個真係於心無愧的人. 

信徒當然係經常向神求告, 基督教好多詩歌、教材、講道內容, 都係圍繞住呢個topic. 但係有時有D人, 我都唔明佢點有面目向神求呢求嗰樣. 例如, 出名護教同佈道嗰個Ravi Zacharias, 佢喺死咗之後, 佢自己的事工進行咗個深入調查, 去處理一D同性罪行有關的情控, 調查報告證實佢有好多宗婚外情, 經常利用海外事工去見情婦, 其中好多係按摩師, 有部份仲指出, 認為係受過佢性騷擾/性侵; 當佢做緊呢D事的期間, 佢當然仲有去佈道, 喺Youtube可以睇到佢一D講道, 講睇AV的禍害, 我求其搵就見到一篇佢為美國求告神的禱文: //Please give us guidance and may we honor you and respond to the wisdom from above so that our hope may be renewed and our blessings be treasured. In Jesus’ holy name. Amen// 我都唔需要多加解釋當中的諷刺.

另一個例子, 除咗係個人的情況, 亦可以係一個群體的問題. Paige Patterson做過超過10年美南浸信會會長, 十幾年神學院院長, 直到2018年被神學院炒魷. 當時佢被炒的其中一個因素, 係因為被人公開踢爆, 有受到性騷擾、性侵o既神學院女學生向學校求助, 但係神學院喺佢帶領下隱瞞呢D事件, Washington Post指責佢叫一個被強姦o既學生唔好報警, 要原諒個加害者; 神學院進行過深入調查, 睇返佢D舊email, 見佢同人講, 佢同一個被性侵o既女學生見面嗰時, 話會"break her down". 神學院嗰D祈禱會呀, 畢業禮呀, 我估梗有D求神保守祝福學生o既禱告; 有時見到呢D現實中的見聞, 真係難免會諗, 其實信仰對佢地嚟講, 冇理由係真個喎, 咁樣邊有面目去求告神o架. 

不過重點唔係講其他人, 邊個人, 嗰D只係幫助我作為說明啫, 重點係我地自身. 但願我地可以好似詩篇130嗰個人咁, 喺求告神o既時候, 能夠真誠真摯地期待仰望神.