Bioshock

今日係"喱爸 day", 傳說係記念做姑喱 (aka 苦力) o既爸爸o既節日, 全個 hamilton 都陷入癱瘓, 所以尋日o係 d 舖頭收檔之前走去買個新 game 玩. 本來想去買 blue dragon, 但係見 d review 一致話呢個 game 雖然畫面靚, 但係個故事白痴, 角色唔吸引, 我最睇唔起呢 d 本末倒置o既 RPG, 所以唔買, 等佢跌到廿皮o個時可能會買個二手 copy 玩下.

所以買o左隻個個都話好o既 bioshock. 尋晚開始玩o左幾粒鐘, 覺得真係做得好靚, 唔單止係畫面靚, 個 style 都好吸引. 本來我一向都唔鍾意玩 d 第一身射擊遊戲, 因為玩冇幾耐就會覺得頭暈. 但係呢個 game 唔會, 因為個鏡頭轉得唔快, 同埋唔會不齗有人出o黎打你, 更多時間係周圍 explore. 好多時係突然之間走一班人出o黎打你, 佢地仲好醒, 有時會熄o左間房 d 燈先過o黎丙你, 而冇燈個畫面真係會黑晒, 真係會俾班死o野嚇一跳. d 光暗做得好靚, 搞到好有氣氛, d 聲又正, 會聽到轉角有 d 痴線佬/婆o係度自言自語講粗口, 但係又未睇到佢地, 個氣氛好緊張. 同埋對我o黎講, 最重要o既係呢個 game 易玩, 唔單止有 easy/normal/hard 選, 仲唔會 gameover! 因為當你冇晒能源之後, 你就會o係最近o既一個 save point 復活, 唔會少o左錢, 亦唔會少o左子彈, 所以唔會因為太難而令到我呢類新手冇癮. 我覺得個 style 有 d 似 gamecube o個個 metroid prime, 因為雖然係 fps, 但係主要都係 exploration, 不過我鍾意 bioshock 多 d, 因為個氣氛更加 creepy, 同埋 d 敵人真係好樣衰, 成班痴線喪屍. 其實我覺得 bioshock 仲恐怖過賣 survival horror o既 resident evil 4.