Suspiria

以前好細個嗰時, 老豆好鍾意帶我去睇鬼戲, 人地細個喺床上面有父母講兒童故事, 我老豆就讀鬼故我聽, 仲記得, 嗰本書叫"香港怪談", 喺屈臣氏買. 但係大個咗, 都已經唔記得睇過乜戲, 除咗一齣,印象極深, 講班人喺戲院睇鬼戲, 點知鬼戲入面 d 喪屍喺真實戲院度, 仲記得細個睇嗰時超驚, 超刺激, 因為俾 d 喪屍傷到少少, 就會變埋喪屍. 但係大個咗, 就連齣戲名都唔記得, 直到冇幾耐之前, 偶然下知道齣戲叫 Demons, 由歐洲一個出名拍恐怖片o既人 produce o既, 呢個人就叫 Dario Argento.

又聽講佢最出名o既電影叫 Suspiria, 所以就搵咗嚟睇. 其實呢齣戲個故事好弱, 不過就係以畫面同音樂取勝, 造出恐怖氣氛. 當睇o既時候, 第一件事注意到o既就係 d 顏色, 非常鮮艷, 甚至有種好似睇緊童話書嗰種夢幻感覺. 後來睇返資料, 個導演話齣戲個 idea 係來自佢女朋友o既一個惡夢. 呢方面嚟講, 佢真係好成功, 我喺睇資料之前已經覺得齣戲有種"惡夢"感, 佢係拍到出嚟. 另外幾個角色o既死法, 都好多人討論, 認為係恐怖片中o既經典. 呢齣戲好舊, 當時o既 special effect 同今時今日當然係不可同日而語, 但係亦因為如此, 所以拍得特別有心思, 唔似而家 d 戲咁成日飛條腸出嚟 d 水皮招數. 尤其係第一個 death scene, 由開始都結尾, 都令人覺得好緊張, 證實唔需要核突都可以拍到出色恐怖感. 如果你問我呢齣戲成為恐怖片驚唔驚, 我就覺得全片 98% 都唔驚, 好多時都係冇事發生, 只係為下個驚嚇 moment 準備, 但係真正要嚇你嗰時, 就真係會嚇到彈起. 例如最後同個女巫對峙嗰幕, 突然開門走個人入嚟嗰下真係睇到有心寒.

音樂亦非常出色, 同畫面顏一樣, 充滿夢幻同懸疑o既感覺. 上面 youtube 條片就係其中一首主題音樂, 俾你 feel 下.

總括嚟講, Suspiria 有排都未到 Omen 或 Exorcist 嗰種經典程度, 因為故事太弱. 不過亦一看無妨, 同而家荷里活唔係開肚爆腦就日式長髮女鬼好唔同.