呢齣港產片係翻拍荷里活片 Cellular. Cellular 我睇過好多次, 因為係我最鍾意o既西片之一, 所以有人翻拍我覺得冇乜所謂, 多多益善. 之前睇好多影評, 有人話好睇過原版, 所以好期待. 睇完後就真係唔多覺.
故事方面, 同原版非常貼近, 只係細節上有分別, 同埋嘗試去補足原版中有 d 不合理o既地方. 例如, 原版主角部手機最後入晒水都仲用得, 當時我睇就覺得好無厘頭, 所以港版冇呢一幕, 同埋喺中間提及張家輝部手機入過水壞咗, 似乎係笑咗原版一嘢. 但係港版好多嘢拍得誇張過原版好多, 例如班 FBI 喺機場開槍殺人都仲想冇事, 又例如香港警察如何同班壞鬼 FBI 勾結上完全冇交代, 我就唔覺得喺"合理性"上有任何改進. 而原版其中一個吸引人o既地方, 就係兩個主角要不斷想辦法刻服佢地唔可以收線呢個難題, 由頭到尾都有事發生, 故事好緊湊; 但係呢 d 情節橋段喺港版中都冇乜分別, 重複用返晒, 所以已經冇晒第一次睇原版嗰時嗰種驚喜.
至於角色, 我最鍾意原版男女主角年齡上o既大差別, 所以睇到最後佢地見面, 為佢地之間o既友誼覺得好新鮮, 終於有齣荷里活片, 入面男女主角之間只有友誼, 完全冇其他幻想空間. 港版就唔同, 女主角年齡細咗好多, 男主角就大好多, 兩個都有個細路, 兩個都係失婚, 搞到最後曖曖昧昧咁, 仲荷里活過荷里活. 呢方面我覺得失望. 不過港版我好鍾意張家輝, 原版嗰個演員都好, 但係張家輝有種好討喜o既幽默感.
而港版拍最得好, 比原版好得多o既, 就係動作場面, 亦係陳木勝o既絕招. 飛車呀, 槍戰等等, 都拍得比原版厲害. 呢方面係出色o既.
總論, 我唔覺得港版比原版好, 最多只可以話, 香港成功拍出一齣比荷里活原著更加荷里活o既電影.
No comments:
Post a Comment