香港公安砌生豬肉

======================================
打完一鑊再砌襲警
2008-07-29

【東方日報專訊】警隊濫權變本加厲，觀塘法院昨日審理一宗襲警案時，爆出警員涉嫌在警署內毆打受查人卻反控對方襲警之醜聞，而兩名作供警員更在休庭期間公然「咬耳仔」，被法庭懷疑兩人有夾口供之嫌，裁判官鑑於兩警的行為可疑，加上他們的證供不盡不實，遂裁定涉事的區議員辦公室男助理一項襲警罪名不成立，將他當庭釋放兼判他獲賠堂費。

涉案被告謝德文（卅九歲），案發時為前區議員何秀蘭(相關)的辦公室助理，他原被控於去年十一月廿七日，在長沙灣警署內襲擊警員陳再武。謝當日到深水埗協助重建戶與房屋協會交涉期間，被指阻差辦公而遭帶署調查，其後有警員聲稱在搜身室遭謝踢打，警方遂起訴控謝襲警罪名，案件昨日開審。

同袍袖手於理不合

裁判官裁決時指，陳姓警員聲稱在搜身房內遭謝手｣撞胸及腳踢膝頭，但另一在場警員袁玉驅竟無出言或出手制止，其「置若罔聞」反應於理不合，認為兩名警員證供並非誠實可靠，加上兩警作供期間被揭發私下傾談，被辯方質問傾談內容時又有不同版本，顯然不盡不實，對控方案情構成打擊。

隸屬長沙灣軍裝巡邏隊的陳再武昨供稱，當晚八時許在福榮街以襲擊及阻差辦公罪將謝帶署調查，入房後謝抗拒搜身，並向他批｣及踢膝，更手摸腰間狀似取物，他大驚將謝推跌，並與警員袁玉驅合力將謝按在地，以襲警罪拘捕謝。袁亦供稱目睹謝襲擊陳，但未及即時制止，只稍後協助按着被告雙肩。

陳作供中途曾經休庭，惟再開庭時，辯方在庭上指出陳在休庭期間曾與稍後作供的袁傾談，陳直認不諱：「只係閒談，我唔覺得會惹人懷疑。」他更自言當差十三年作供數十次，明白作供期間勿與人交談的法則，卻解釋：「我只係問『尋晚華倫西亞場波係咪歐聯』及『個女警係咪守觀塘』。」認為與案無關，「傾都無問題」。袁則指二人只談及球賽。

謝德文自辯時則指，當晚被兩警帶入房後，他要求移往大廳作公開搜身但被拒：「呢度唔係你話事！」謝遂從褲袋取電話打算記下兩警編號及致電律師，豈料陳撲前想搶走電話，謝將手放後，陳即拳擊謝左胸再將他推跌，謝痛極蜷縮在地，陳竟再踢他左右小腿五、六次，每踢一次都大叫一聲「你襲警」。

邊踢邊嗌「你襲警」

謝一度向袁求助：「你同事咁樣打人屈人都得嘅？」惟袁只是旁觀，後來警署值日官高志明（譯音）入房察看及召兩警出房，謝再向高投訴：「呢度唔係大陸呀？」對方回應：「如果呢度係大陸就唔會係咁啦！」並派另一男警替他搜身。謝稍後聯絡到律師及拍下傷勢照片，他獲保釋後自行求醫，證實左胸及雙膝均有腫痛。

當日同被帶署的一名雜誌記者任辯方證人，他供稱被拘留時聽到有人大叫數次「你襲警」，但在場警員卻無動於衷，令他大感驚訝；他其後出房見謝已面容扭曲狀似想哭。而立法會議員張超雄亦撰信證明被告品格。

案件編號：KTCC 2673/2008
======================================

仆街差佬, 同大陸公安一樣, 打人仲話俾人踢下陰. 仲有, 我都唔相信長毛同陶君行襲警, 希望幾個月後o係法庭上一樣有一個公平o既審理.

少林奧運

經典港產片"少林足球"最後一幕講中國周街都係武林高手, 有人用神妙劍法修剪樹葉, 成班西裝友用輕功跳上巴士等等. 諗都諗唔到, 原來係真有其事:



真係勁呀. d 小市民用頂級輕功淩波微步打尖, 而且個個橫練上乘內功, 所以能夠輕易舉起巨型鐵欄. d 公安就更加犀利, 你睇佢地以圍欄檔住人潮o個一幕, 仲勁過西片 "300" 入面 d 大隻佬以盾檔人o個下, 明顯身負九陽神功內勁. 香港記者唔識武功, 所以俾 d 公安三十六路大擒拿手推倒, 七十二路小擒拿手叉頸, 幾下就俾人打倒, 只能怪自己學藝不精.

簷前滴水

尋日聽蕭若元節目, 其中一個小環節講到廣州大同酒家一對對聯:

大包易賣, 大錢難撈, 針鼻削鐵, 只向微中取利;
同父來少, 同子來多, 簷前滴水, 幾曾見過倒流。

我個人都幾易被人感動, 睇小說, 睇電影, 睇電視, 聽歌, 甚至聽道, 都試過. 但係聽電台/網台節目突然覺得好有感觸, 呢次係第一次. 由一個成六十歲o既人講, 更加有 feel.

新死海古卷流出 x 2

James Charlesworth o係網上發表o左兩塊之前未見過o既死海古卷碎片:

http://www.ijco.org/?categoryId=28682



http://www.ijco.org/?categoryId=28681



兩塊都係舊約聖經抄本, 一個係申命記 27.4-7, 另一個係尼希米記 3.14-15. 根據呢兩塊死海古卷o既收藏者, 兩塊都係來自昆蘭. 當然, o係進一步考究之前, 未可以確定來源. 不過假如真係來自昆蘭的話, 咁呢塊尼希米記抄本會係唯一來自昆蘭o既尼希米記抄本, 因為全本舊約聖經入面o既書本都有死海古卷抄本, 除o左尼希米記同以斯帖記以外.

唔知仲有幾多未見光o既死海古卷o係收藏家手中. 話唔定終有一日會出現以斯帖記抄本 tim.

港姐黑幕?

頭先o係其他論壇睇到呢兩張相, 都係 tvb 網頁上面, 唔係假圖:

http://misshk.tvb.com/2008/images/announcement.jpg

http://misshk.tvb.com/2008/images/announcement2.jpg

以免 tvb 消滅證據, 我 cap 埋圖. 不過最好快 d 自己親手 click 下上面兩條 link.





點解 tvb 會造定兩張唔同o既賽果圖?

Hazon Gabriel: 三日後, 復活!

記憶好o既, 可能會記得我之前有講過一塊怪石, 上面用墨寫有兩個 columns o既希伯來文, 學者 Ada Yardeni 相信呢塊石板係來自公元前後第一世紀, 耶穌o既時代. 佢叫呢份"文獻"做 Hazon Gabriel, 即是 vision of Gabriel, 因為裡面有講到有關呢個天使o既異像.

呢幾個星期突然好多報紙報導呢塊石, 主要係因為冇幾埋之前, 有個都相當出名o既學者 Israel Knohl 提出一個令人感興趣o既學說. 佢話, 如果小心睇呢塊石上面o既文字, 會發覺入面講到一個三日後復活o既彌賽亞 (即救世主). 對了解耶穌, 早期基督教會, 新約聖經好重要云云.

有興趣o既, 可以去搵佢份研究報告睇下: Israel Knohl, "'By Three Days, Live': Messiahs, Resurrection, and Ascent to Heaven in Hazon Gabriel," Journal of Religion 88 (2008) 147-58.

如果想睇 Ada Yardeni o既希伯來文 transcription 同英文翻譯, 可以睇:
http://bib-arch.org/images/DSS-stone-hebrew.jpg
http://bib-arch.org/news/dssinstone_english.pdf

o係 Yardeni o既翻譯入面, line 80 話: "lslwst ymyn h'[...]", 即是只睇到"三日後"兩個字, 然後就睇唔清楚後面, 只見到兩隻字母: het, aleph. 但係 Knohl 就認為, 細心睇之下, 可以見到清清楚楚: "lslwst ymyn h'yh", 即是"三日後, 復活!" 而佢認為, 文中三日後會復活o既人, 係以色列o既彌賽亞, "以法連".

所以, 基本上, 主要問題在於: 1) 呢塊石板係咪真貨, Yardeni 認為係真o野, 不過仲有待仔細考究; 2) 到底 line 80 有冇寫住 h'yh? 還是其實真係唔清唔楚? 我自己未睇過塊o野本身, 亦未搵到好高質素o既照片睇, 所以我係未可以下定論. 不過, 要一提o既係, h'yh 係一個有少少古怪o既串法, 因為通常係 hyh, 冇 aleph 呢個字母. 不過我同意 Knohl, 唔係最常見, 不過又唔係絕無可能; 3) 講緊復活o既係咪真係以色列o既彌賽亞? 其實我認為o係呢方面係有 d 唔清楚. 到底講緊邊個復活 (假設真係有"復活"呢隻字). 答晒呢幾個問題, 就可以開始諗下, 呢塊石板對了解耶穌同新約聖經有乜幫助. 相信以後幾年, 呢個都會繼續係聖經研究o既熱門話題.

REC

好似 Blair Witch Project, Diary of the Dead, Cloverfield 咁, 全片都用 hand-cam 拍. 我一向都覺得呢種手法只係綽頭, 尤其係 Cloverfield, 由於題材係怪獸大鬧紐約市, 同呢種手法想令人覺得"真有其事"o既目的背道而馳, 變成拍出o黎令人頭暈, 但係又冇相對o既大優點平衡返, 所以只係綽頭.

但係 REC 呢齣西班牙片, 真係令我改觀, 拍得非常恐怖, 非常出色, 比其他用相同手法拍o既影片出色幾皮. 故事就講電視台派兩個人出去做節目, 個男仔做拍, 個女仔做主持, 跟消防員出隊拍佢地o既工作. 點知去到一間大廈, 有個肥婆痴 q o左線咬 d 消防員, 又有差佬o黎封o左間大廈, 唔俾入o左去o既人出o黎, 而呢兩個電視台o既員工就要想辦法不被咬死同走出呢間大廈. 過程非常緊張, 一浪接一浪. 有 Blair Witch Project 結尾咁恐怖, 但係就冇o個 d 無聊而沉悶o既對白. 其實用呢種"手拍"技倆拍o既電影都有個通病, 由於想表現出實感, 往往加插大量生活化但係沉悶冗長o既對話 (Blair Witch 同 Cloverfield 都有大量, 幾乎佔影片一半), 但係 REC 冇呢問題.

我睇過唔少喪屍片, REC 係其中最好o既一套. 算係經典.

Princeton 遊

六月中我有個 Enoch Seminar 要去, o係 Princeton Theological Seminary, present 一份有關以諾一書第 14 章o既研究. 我o係阿媽屋企出發, 要由 New York Brooklyn 去到 New Jersey Princeton, 主要係坐火車. 雖然要坐成兩粒鐘咁滯, 不過好在都唔貴, $15 咁上下. 由 Princeton Station 行到過去 PTS 都唔算遠, 大約 15 分鐘腳程.



呢個係佢地個 library, 我冇行晒成間. 比想像中細, 不過點都一定好過 McMaster. 話時話, 呢度環境真係幾好, 有樹有草, 好靚. 拍得住 Trinity Western.



呢度係食o野o既地方, 一日三餐食 buffet, 對我呢 d 食o野冇要求o既人o黎講算係幾好食, 起碼餐餐食到飽, 又免費. 大家都食完飯o係度傾計, 但係呢方面我真係完全唔掂, 食完o野就坐o係度, 冇辦法同人開始話題, 都唯有早 d 返宿舍用電腦睇 x-files. 浪費晒呢 d 識人o既機會. 唉, 我o係呢行睇怕都係冇乜前途.



呢度入面係 seminar o既地方, 好似酒店咁, 幾靚. 不過 d seminar 好鬼悶.





呢度係我住幾日o既地方, 係學校o既宿舍, 好在有冷氣, 同埋一人一間房, 不過沖涼要去個公用洗手間, 好有福音營 feel.

總括o黎講, 今次收獲不大. 既識唔到新朋友, 又冇機會同 d 大粒佬/婆傾計; d 人亦似乎唔係咁欣賞我份研究. 不過呢個係意料之中, 因為我 present o個時有兩個 chairs, Gabriele Boccaccini 同 Martha Himmelfarb, 我一早就知佢地唔會同意我o既研究結論. 我覺得我都有 defend 到自己o既觀點, 不過有幾個問題我覺得答得唔係咁好, 有 d 後悔, 太過緊張亦有所影響. 我亦見到 James Charlesworth 同 Lawrence Shifman, 後者尤其有型, 真係好正, 做佢學生聽佢書一定好開心.

而今次唯一收獲就係.... 有機會同 Annette Reed 見面, 因為佢地第一日有請佢o黎做嘉賓. 真係唔明, 同佢傾計我明明就對答如流, 乜都敢講, 但係佢一走o左, 我就有辦法同其他人一樣咁傾計.