Sunday, 20 January 2008

玩到尾o既 RPG (4):Xenogears



自細我就最鍾意玩 RPG, 因為我打 d 動作 game 唔叻, 死得多都冇癮. 不過其實o係 xenogears 之前, 我主要玩o既都係 FF 同埋 DQ 系列. 其中都仲有玩過其他o既, 例如甲龍傳說, 3x3 Eyes, 但係都冇玩到尾. 所以當年 xenogears 新出o個時我都冇興趣玩, 因為唔係 FF/DQ, 興致不大. 直到出o左差唔多成年幾兩年, 我先見平買隻o黎玩下, 點知真係一見鍾情, 一打打到尾, 完全停唔落o黎. 我鍾意呢隻 game 仲多過 FFVII, 雖然前者其實畫面同音樂都不及後者.

Xenogears 咁吸引我o既原因好簡單, 故事、角色都一流, 引人入勝. 先講角色, 幾位主角 (隻怪物除外) 都各有自己背景同性格, 每一個都非常討喜, 其中幾個仲非常有型. 佢地o既機械人亦好正, 幾個主角發現出第一個 xenogear o個段真係好玩, 好似親自經歷一齣出色o既動畫咁. 至於故事, 就太過複雜, 講都講唔晒. 不過個故事超長, 好多難以預料o既事件發生, 除o左一開始o個段比較平比較慢之外, 之後就不斷有意外發生, 真係玩到唔停得, 想知道之後會發生乜事, 一路追落去. 雖然第二隻碟明顯係因為唔夠時間做, 所以非常求其, 搞到故事爛尾, 但係前大半都非常出色, 瑕不掩瑜. 最後想一提係 d 對白, 寫得好抵死, 係我玩過最搞笑o既 RPG 之一.

我覺得 Xenogears 係史上最正o既 RPG 之一. 之後幾集 Xenosaga 雖然都唔差, 不過已經去唔返第一集o既高度.

0 comments: