YUI: Love & Truth

第一次見到張 single 封面就打個突, 嘩, 今次張碟 d 相影得咁靚, 好似變o左第二個人咁o既? 可惜隻碟兩首新歌都麻麻地, 同佢之前o個 d 經典差一截. 佢把聲當然係好, 不過係 d 歌寫得唔好, melody 唔吸引, 又冇乜特色. 希望下張碟可以相靚兼歌正.

兩隻老虎, 兩隻老虎...

尋日同 Schuller 見面, 講下邊個會係我o既論文 advisor. 之前阿 Reed 同我講, 佢而家唔o係老麥, 不如咁啦, Schuller 同 Reed 都做我 advisor. 尋日我就係去同 Schuller 講呢樣o野. 嘩, 唔好講笑, 真係緊張到我... 上次碩士論文個 oral defense, o個朝早我仲o係度睇漫畫; 去 CSBS present 亦好冷靜; 考 comps. 亦冇乜緊張; 但係要同 Schuller 單對單講正經o野真係非常驚嚇, 好恐怖. 過程真係冇乜特別, 佢又唔惡, 但係佢成個人就好似 d 咩 holy presence 咁, 真係令人覺得緊張.

不過都好, 佢都同意我o既提議, 人人都有一個論文 advisor, 而我就有兩個: 一個就世界重量級o既名人, 一個就而家o係 U Penn 教書o既明日之星, 正呀!

超任 DS

上個星期發現, 原來可以o係 NDS 上面打超任 d game! 只要將 emulator 直接放入 R4, 再加上自己o係網上搵返o黎o既超任遊戲 rom, 就可以將 NDS 變成 portable 超任. 雖然個 emulator 仲未完善, 有 d game 都仲未玩到, 但係大部份都冇問題.

而家我部 NDS 上面有 R-Type 3, Breath of Fire 1, 2, Chrono Trigger, Demon's Crest, 勇者鬥惡龍 5, Final Fight 1, 2, 3, Indian Jones' Greatest Adventures, Secret of Mana, 勇者龍劍傳 1, 2, 3, 新女神傳生 2, 超惡魔城, 魂斗羅 3. 經典呀, 有 d 仲係我以前細個都未玩過o既. 最可惜係 Star Ocean 同勇者鬥惡龍 6 唔 work. 我o係 ibook 度都玩到, 但係冇 NDS 咁方便, 同埋咁好控制嘛.

玩返呢 d 舊 game, 先發覺以前 d game 真係幾好玩, 簡簡單單咁, 好過而家 NDS 本身 d game. NDS 都唔係有好 game, 好似Phoenix Wright 系列, 同埋 d 用腦 puzzle game 就唔錯, 用o黎過下日晨唔會覺悶. 但係除此之外, RPG, 射擊, 動作 game 都冇乜真正好o野, 連超任都不如.

奇人 Neil Altman

有位奇人名叫 Neil Altman. 香港教會早陣子高呼"耶穌在中國," 這位仁兄則多年以來不斷在大眾報紙中刊出 article, 說"死海古卷在中國." Altman 表示, 他可以在死海古卷中看見有中文字 (!!!), 所以死海古卷的年期絕不可能在中世紀之前. 網上依然可以找到他寫的幾篇文章:

這裡, 這裡, 還有這裡. 須要留意, Altman 常在文中引述一些知名學者跟佢"證實"有的沒的, 但其實他時常曲解別人原意, 很多被他引述過的學者後來要在公開 email 或他們的個人 blog 中解釋自己的立場與觀點都被 Altman 曲解了.

一四零八

我唔理, 我考試表現失準, 我一定要賴落呢齣戲度. 簡單講, 如果今次我考試肥o左, 一定係因為尋晚睇o左呢齣戲, 唔係講笑, 真係睇完人都癲, IQ 至少下跌三百點, 美國減息半厘都升唔返.

齣戲開始o個時幾有趣, 講個鬼書作家四圍去 d 猛鬼酒店過夜, 睇下係咪真係鬧鬼. 去到 John Cusack 同 Samuel Jackson o係度講間 1408 號房o既猛鬼歷史o個時, 我真係覺得好想睇落去, 到底間房搞乜鬼.

點知到 Cusack o係間房度正式開始見到怪事發生齣戲就開始好似戲中男主角一樣"直插水底". 呢間房發生o個 d o野實在太怪, 去到一個地步只令人覺得"有冇搞 x 錯", 而全無驚嚇緊張o既感覺, 非常失敗. 佢又有少少野心, 想拍到好似有 d 意思咁款, 但係一樣冇乜特別, 冇 feel, 同齣戲個怪雞格局根本就唔夾.

Roooooound 2: KO'd

今日考第二輪, 又係考三題:

1) Form criticism 對研究對觀福音o既好同壞處.

2) 討論歷史耶穌研究入面用到o既 criteria of historicity

3) 講讀新約 as canon 同 not as canon o既分別, 兩者有乜好處

頭兩題我好熟, 但係第三題真係唔識, 一味老作o左兩粒鐘咁滯先作到四頁紙 double spaced. 考完走去圖書館睇睇, 仲發覺一路都有o野講錯... 一句講晒, 就係俾佢 KO'd 囉, 真係諗唔到佢會出題問 canon, 冇辦法, 衰o左. 希望其他地方拉到分, 唔會搞到 fail 啦.

唉, 冇晒 mood, 唔講 lar.

Half Time

今日係中場休息, 尋日考o左 Hellenistic Judaism 同埋約翰福音. 一打開張卷就驚訝一o野, 因為原來只有三題, 即是只係考 3-4 個鐘, 短過我本來以為要考四題, 係好事, 上次考四題, 次次都打字打到手腕痛.

第一題: 透過 Letter of Aristeas 同埋 Philo 討論猶太人 scripture o既地位.

第二題: o係 Against Apion 入面, Josephus 點樣 defend 猶太人, 佢講過 d 乜. 同其他同類型o既猶太人著述有乜相同/分別?

第三題: 講解約翰福音入面有邊 d 地方突顯出佢背後複雜o既 compositional history. 討論學者有邊幾類學說去解釋約翰福音呢 d 奇怪o既地方.

其實第一、二條問題寫到水蛇春咁長, 非常複雜, 我都已經唔係好記得. 我最唔熟悉係第二題, 因為讀 Against Apion 讀得唔夠熟. 都冇辦法啦, Josephus o個部份我讀得最唔熟o個樣佢就出o個樣, 不過應該唔會 fail o卦?

Roooooound One!!!

聽日開始考 comps lu. 聽日會先考 Hellenistic Judaism (主要應該係 Philo 同 Josephus) 同埋約翰福音. 我一向捉題目都有一手, 上次考舊約 comps 我就捉中兩題, 而且係兩題中兩題, 可謂百發百中. 不過今次真係捉唔到路. 不過應該都冇問題o既. 本來今日o個科佛教 intro 有個 tutorial 要去, 不過都 skip o左, 都係留o係屋企輕輕鬆鬆比較好.

心情如何? 冇乜特別. 同一般考試測驗前o個種少少緊張冇乜分別. 我唔會臨尾走去狂背書, 唔會冇胃口食o野, 相信亦唔會失眠. Just another day. 反而係今朝等o左成個禮拜o個個黃毓民節目講台灣, 冇上個星期講香港o野咁激, 有 d 失望. 慘.

郭靜: 我不想忘記你

尋日聽到有個之前冇聽過o既台灣妹最近出o既一張專輯, 令人意外地好聽, 對考試前o既心情都有幫助. 本來連試聽o既興趣都冇, 因為台灣年年出咁多碟, 邊聽得晒? 不過早幾日佢上"康熙來了", 唱過幾句, 把聲好特別, 聽落好舒服.

隻碟有十首歌, 其中有一首同 d 阿姐 (張韶涵 + 范瑋琪) 合唱, 我最唔鍾意就係呢首. 其他隻隻都唔錯, 我就最鍾意"我不想忘記你", "想個不停", "離開", "有生之年". 其實最近好多人都出新碟, 有潘瑋珀, 楊丞琳, Soler, 但係我最鍾意郭靜呢隻. 所以o係度為佢宣傳下. Howtindog 推薦.

Hultgren, The Rise of Normative Christianity

A. J. Hultgren, The Rise of Normative Christianity (Minneapolis: Fortress, 1994).

有個 term, 叫做 catholic christianity, 指成形後o既教會, 邊個同呢個大教會唔同o既, 就會被叫為異端. 呢本書討論o係有 catholic christianity 之前, 有冇一個未完全成形, 但係唔同o既基督教圈子之間又有共識o既 christianity 呢? 作者話有, 佢叫呢個做 normative christianity.

本書有兩個最重要o既 chapters. 一個講 70 年前o既基督教圈子, 一個就講 70 年後. 70 年前, 作者講到巴勒斯坦o既耶教圈, Q community, 同埋保羅 d 教會. 值得一提o既係, 唔係個個學者都認為o係巴勒斯坦有耶教圈子o既存在, 因為有 d 重要o既學者, 如 Gerd Theiseen, 認為早期o既耶穌 movement 係一個 charismatic movement, 以耶穌自己為首, 由一班四處流浪o既 charismatic wanderers 組成. 既然係無處為居, 咁就唔算係有"圈子"o既存在. 不過 Hultgren 唔同意, 佢話o係使徒行傳同保羅書信中睇到o既畫面唔係咁樣. 例如, o係使徒行傳中, d 早期o既信徒都有地方聚會, 一齊飲飲食食之類; 保羅雖然有四處去, 但係佢亦o係以弗所同安提阿停留過一段長時間.

70 年後, Hultgren 就講 Syria o既圈子 (以馬太福音為例), Asia-Minor (以 pastoral 書信為例), 同埋約翰福音背後o既圈子. 睇過晒咁多個佢認為存在o既耶教圈子之後, 佢得出一個結論: 雖然佢地之間有好多唔同o既地方, 但係o係信仰上, 有幾點係好 constant o既. 1) theology: 佢地都信上帝係造物主, 係佢地o既父神. 2) christology: 耶穌係神派o黎世上o既. 3) soteriology: 上帝有救贖人類o既計劃, 透過耶穌搞掂. 4) ethics: 信徒要去愛其他人. 5) ecclesiology: 信徒會聚埋一齊.

而o係第一/二世紀, 抱持呢幾個信仰要點o既, 就算係 normative christianity, 而o個 d 唔接受當中作何一條o既就會被邊緣化. 例如 Marcion, 佢認為舊約o既造物主同新約充滿慈愛o既天父係唔同o既神, 同 Hultgren 列出o既第一個要點有出入, 所以 Marcion o係其他教會圈子眼中就係問題人物.