屬靈 game

[全宇宙最"屬靈"o既 video game - 食鬼!!!]



"食鬼", 好一個適合 d 乜鬼都要有 "christian world view" o既基督徒玩o既電視遊戲. 呢個 game 其實藏有聖經真理o係裡面, 將一段經文完美地演繹得淋漓盡致. .

彼得前書 5.8: "務要謹守、儆醒. 因為你們的仇敵魔鬼, 如同吼叫的獅子, 遍地遊行, 尋找可吞吃的人."

嘩哈哈哈, 可見基督徒要多多打機, 尤其是 Namco 出o既遊戲, 更加係要多多捧場.

將心給我

突然發覺, 常常會唱的一首教會歌, 原來內有乾坤, 非常奸詐:

==============================
假若我有無限智慧，我甘棄主腳下，
假若我有財物滿貫，我交給主手中，
我願這生獻呈為你，願明白你心意，
不用獻我財物智慧，將心給我。
==============================

"假若我有無限智慧, 我甘棄主腳下"
言下之意就是說: "可惜我沒有無限智慧, 所以我不會棄之於主腳下." 須知道, "假若..., 我就..." 跟 "即使..., 我也..." 的意思差很多. 而這首歌所寫的是前者呀. 就像我對女朋友說: "假若我有十萬九千七, 我就買妳九百卡鑽戒一隻," 她只會"chiu"的一聲吧?

"假若我有財物滿貫, 我交給主手中"
即是說: "可惜, 事實上我沒有財物滿貫, 也不必交給主手中了." 哈, 奸到出汁.

"我願這生獻呈為你, 願明白你心意"
注意, 所講到的只是"願"而已, 絕對不等同於這奸詐傢伙會真箇落實照做.

"不用獻我財物智慧, 將心給我"
這實在是全首歌的高潮. 要注意, "我"是誰? "我"在對誰說話? 明顯地, 以上的幾句歌詞中, "我"都是普通人, 而"你"則當然是上帝. 所以, 就前文後理而言, 這句歌詞的意思是一個非常離譜的傢伙在對上帝說: "不用獻我財物智慧, 將你的心給我好了." 太大貪了.

所以, 我建議我們以後都不要再唱這首歌, 因為當中意識不良, it doesn't promote faith, 會令人覺得咱們失見證.

Shadow Hearts 2

哎 yaya, 玩完 Shadow Hearts 2 lar. 嘩, 個結局令人個心抽住抽住, 但係真係一個正 game、正故事, 而且咁o既結局真係令人有 d 意想不到, 當 Yuri 話 "sorry, can't keep this promise" o個時忍唔住"嘩"一聲. 其實, 除 FFX 之外, 呢個結局係一個少有地會令我覺得好傷感o既故事, 不過又好 fit 成個故事o既 feel.

而且隻主題曲好正好正, 單單為呢隻歌, 下次出街見到呢個 game o既 OST 的話, 我一定會買囉, 因為實在係太正 lar~~~

唉, 一玩完個 game 就開始覺得有 d 掛住裡面o個 d 角色 lar. 個個都好吸引, 個個都有自己o既故事同特色. Joachim 就最搞笑, 係成日扮有型但係其實勁樣衰o個種搞笑; Karin 就好 gentle, 成日都想睇多 d 關於佢o既故事; Kato 就係一個好正o既'大奸狗,' 佢唔係壞人, 而且有好合理而且高尚o既目的, 所以真係憎佢唔落; 本來唔鍾意 Gepetto, 但係佢o係 'Doll House' o個段好有意思, 講一個人失去o左最重要o既o野就搵其他代替品, 但係其實對o個 d 代替品作出好無情o既傷害; Anastasia 又係好搞笑, 有好幾幕佢同 Joachim d 對白真係 RPG 史上最搞笑o既 moments 之一; 甚至連出場機會接近零o既 Alice, 都非常吸引, 令我想買返 Shadow Hearts 第一集去知道番佢同 Yuri o既故事, 點解佢地o既感情o係生死相隔下都咁 firm; 至於 Yuri, 就唔使講啦, 好正o既主角, 表面上係又寸又口臭又搞笑o既死仔包, 其實係失去o左 Alice 之後完全冇晒目標等死o既態度, 而最煞食o既, 就係佢雖然係人人都當佢係死神o既 godslayer, 但係佢都有兩個鏡頭流眼淚, 一次o係 Alice 面前, 一次o係 Karin 面前, 真係正, 我係男仔都覺得佢好型. 希望仲有第三集出啦, 不過真係好難想像個故事仲可以點樣延續落去.

世上最堅

記得以前好細個o個時睇小說, "女黑俠木蘭花"系列其中一本有講到鑽石同埋玻璃係世上最堅硬o既o野. 到大個少少, 讀中學 lar, 開始睇 d 到處淋狗血o既愛情小說 (包括岑凱倫, yes, I'm ashamed of myself), 就話世上最堅硬o既係愛情先o岩...

但係今日, o係我自己o既日記裡面宣佈, 世上最堅硬o既, 既不是鑽石, 亦不是愛情, 而係............





.........大統華 (aka T&T) 賣o既叉燒!!!!! *$&%^@, 叫住佢話要半肥瘦 gar lar, 佢都仲係要切舊 100% 全瘦, 乾如柴皮o既"硬o野"俾我. 切叉燒o個位仁兄可能以為自己算係叉燒o既一部份: 100% 肥o既叉燒佬 + 100% 瘦o既叉燒 = 賣緊半肥瘦叉燒.

埋怨論

頭先收到一個 email, 的確係好一篇情辭並茂o既...廢話. 全篇如下:
================================

凡事從感激開始！因為你要知道，挫折就是人生最珍貴的禮物！
感激傷害你的人 因為他磨練了你的心志
感激欺騙你的人 因為他增進了你的智慧
感激中傷你的人 因為他砥礪了你的人格
感激鞭打你的人 因為他激發了你的鬥志
感激遺棄你的人 因為他教導了你該獨立
感激絆倒你的人 因為他強化了你的雙腿
感激斥責你的人 因為他提醒了你的缺點
更感激的是令你痛定思痛的人
因為他證實了你的存在
感謝我的鼻子，即使塌，也讓我我呼吸新鮮空氣。
感謝我的雙眼，再小再瞇，我也能可見日出，日落，花開，花謝。
感謝我的痘痘，它們告訴我...我還年輕！
感謝太陽升起，使我全身充滿希望的光芒。
感謝老天爺所降下的雨水，為傷心淤穢的心靈，刷洗潔淨。
感謝這一生能遇見值得我愛與付出的人!! You are lucky!
感謝寄給我這個message的人，我知道你們愛我。
感謝黑夜的來臨，我知道不論今天的我有多麼失敗，全新的明天仍然等待著我來證明自己。
感謝那些令我傷心難過的日子，我知道快樂已離我不遠了。
感謝我的勇氣，不論今天有多麼不順利，我將勇敢的活下去！

================================

望落就好似好有意思咁, 但係其實不過係一番空言廢話, 俾我感覺只不過係 d 死淨把口o既人o個種阿Q精神表達至高峰而已, 絕非甚麼高言大智. 佢話要感謝, 我夠可以話要抱怨啦, 以下係我頭先照住上面堆廢話寫o既:

================================

凡事從埋怨開始! 因為你要知道,
挫折就是人生最不知所謂的垃圾禮物.
埋怨傷害你的人, 因為他磨損了你的心志
埋怨欺騙你的人, 因為他增進了你的不幸
埋怨中傷你的人, 因為他辱罵了你的人格
埋怨鞭打你的人, 因為他激發了你的怒意
埋怨遺棄你的人, 因為他傷害了你的自尊
埋怨絆倒你的人, 因為他令你跌斷了雙腿
埋怨斥責你的人, 因為他忽略了你的優點
更埋怨的是令你痛定思痛的人, 因為他證實了你的痛苦
埋怨我的鼻子, 即使讓我呼吸新鮮空氣, 也是塌的.
埋怨我的雙眼, 即使可見日出日落花開花謝,
也是又小又瞇的.
埋怨我的痘痘, 它們告訴我...我太多臉油
埋怨太陽升起, 使我全身充滿臭臭的汗水
埋怨老天爺所降下的雨水, 常令華東華南水災,
搞得到處臭泥淤穢
埋怨這一生能遇見值得我愛與付出的人, I am not so lucky!
埋怨寄給我這個 message 的人, 我知道你想 hack 我.
埋怨黑夜的來臨, 我知道不論今天的我有多麼成功,
全新的明天仍然等待著我來再一次的要證明自己.
埋怨那些令我傷心難過的日子, 我知道快樂已離我而去了.
埋怨我的勇氣, 不論今天有多麼不順利,
我還是要那麼一貫的阿Q精神...

================================

我寫o既"埋怨論"唔會比o個篇"感謝論"更有道理, 但係亦唔會更無理; 因為兩者都係廢話, 無甚道理可言. 但係我又花咁多時間去改人地o既廢話, 而改出o黎o既結果又係廢話一篇, 我...我......好廢.

成龍真偉大

頭先睇娛樂版睇到成龍一段"精彩絕倫"o既剖白...

===========================

談到吳綺莉，成龍說：「如果一個女人懷了我的孩子，卻為了我著想，一個人偷偷跑去柬埔寨，我會對這個女人感到愧疚，也會為了她的顧全大局豎起大拇 指，一個躲起來的女人跟一個威脅你的女人，你會選哪一個。」成龍表示吳綺莉讓他感到被設計，所以事情發生後，令他對兩母女充滿怨恨，直到他反省追究都是自 己的錯，才能釋懷。

===========================

好似成龍呢 d 人真係偉大, 多得有佢呢 d 咁自私自利兼夾冇腦無厘頭但係又鍾意大大聲講o野o既人, 我先知道自己其實算係一個有內涵o既有為青年. 嘩哈哈哈, 真係低能仔, 對自己家庭不忠搞婚外情搞到個女人大肚, 仲話個大肚婆應該為佢犧牲喎, 係咪拍功夫片o個時跌親個腦呀? 你話要人地為你犧牲, 你自己唔為人犧牲下?

畢.華.流

今朝出街諗下諗下, 突然俾我參詳出畢華流個名o既"緣機."

畢華流o既真名係吳漢源; 仔細想想, 其實"畢華流"咪就係"吳漢源"囉.

"畢", 音同"不"; 用廣東話講"不"就係"唔", 音同"吳".

"華"者, "漢"也; 所以"華人"即是"漢人", make sense 到痺.

"流"者, 跟"源"一樣, 都同水有關.

嘩哈哈哈, 我好醒呀, 多年以o黎解唔開o既謎題終於都解開 lar.

情人

時近"情人節", 應該寫一篇有關呢個節日o既文章.

以我愚見, 情人節乃係一個見不得光o既節日, 完全不適合情侶或者夫婦之間祝賀. 絕對係可免則免者, 最好連提都唔好提.

我自己作為一個男仔, 同我拍拖o既就係我"女朋友", 同我結婚, 一世食住我o既就係我"老婆", 不論點叫都唔可能係"情人"囉, 咁我又點可以同一個唔係我"情人"o既人過"情人節"呢? 如果我有一個"情人", 咁我咪即是獨自去偷歡?

邊個會過"情人節"呢? 當然係有情人o個d 死佬啦. "情人"也者, 一就係狐狸精, 一就係衣櫃裡的男人. 乃係"二奶"o既一個另類講法. 例如, 一個大肚腩老闆o係香港有一個正室, 名媒正娶者, o係大陸又包有一個二奶, 無媒苟合者; 正室就當然係"老婆" (或"黃面婆") 啦, 二奶先會叫做"情人"o架嘛. 難怪所有包二奶o既麻甩佬於情人節當日都會同老婆話公司開會, 然後去同情人歡度一夜. 可見之傑並非一味胡扯.

換句話講, "情人節"係一個並不適合拖友或夫婦祝賀o既日子, 因為"情人"跟本就係正派女子o既命中死敵.

基督徒過情人節就直頭係有失見證 tim 啦. [哈哈, 又加多一個"失見證"o既例子]

戚姑姑

"過兒! 過兒! 你在哪? 姑姑找你找得好苦."

我回過頭, 一個穿著橘黃色毛衣戴著髮箍的女孩, 微笑著四處張望.

她的雙手圈在嘴邊, 聲音清脆卻不響亮, 還夾雜著些微嘆氣聲.

這是我第一次看見明菁.

她站在太陽剛升上來沒多久的東邊, 陽光穿過她的頭髮, 閃閃發亮.

距離現在已經七年多了, 我卻能很清楚地記得那天的天氣和味道.

~ 檞寄生

距離現在已經超過七年了, 我卻能很清楚地記得第一次看見戚詠麗的那天, 那幾個"配角", 那隻蜘蛛, 那個所謂圖書館, 那幾張爛鬼椅... 我想, 只要係有關於一個重要o既人, 不管過幾多年, 許多零零碎碎o既片段依然會出現o係回憶裡面.

沒法子

"拔死人頭髮, 是不對, 不過這兒這些死人, 活著時也都是幹這類營生的. 這位我拔了她頭髮的女人, 活著時就是把蛇肉切成一段段, 曬乾了當乾魚到兵營去賣的. 要不是害瘟病了, 這會還在賣呢...她幹那營生也不壞, 要不幹就得餓死, 反正是沒法子嘛. 你當我幹這壞事, 我也不幹就得餓死, 也是沒有法子呀! 我跟她一樣都沒法子, 大概她也會原諒我的."

~羅生門; 一個做壞事做得正氣凜然的世界, 很矛盾很離譜, 卻很真實...