Broken Sword: The Shadow of the Templars (NDS)

最近喺 NDS 度玩呢個 game. 呢隻 game 好合我口味, 係解謎嗰類型, 有故事, 有角色, 永遠唔會死. 呢個 game 喺好多年之前已經喺電腦上面出過, 而家已經出到成個系列, 不過就一直都冇接觸過. 個故事主要講有宗命案發生, 個主角就一直追查落去, 點知發現 d 殺人案同中世紀一 d 傳說有關, 好有尋寶 feel. 基本上就好似睇小說咁.

呢隻 game 我大力推薦, 值得一玩. 希望將來會喺 NDS 或 wii 度出埋系列入面o既其他 game.

Xbox360 六紅

四年內第二次三紅, MS 分明就係賣次貨俾人, 你話唔改佢機係咪對自己唔住? 尋晚同 Henry 打打下機就開唔返部機, 一直三紅. 而家我要攞部機去俾幫我改機嗰個人 un-改返部機, 之後就會寄去 MS 維修部, 睇下佢會唔會免費幫我整囉, 如果要收費, 就唔鬼整, 遲下有我想玩o既新 game 出嗰時去買過部新o既.

Push

睇在 Camilla Belle 份上, 頭先睇咗佢最近齣新戲, 叫做 Push, 聽講係改編自漫畫, 不過之前未聽過. 個故事講有 d 人有超能力, 但係俾另外一班同樣有超能力o既人追殺, 其實同之前嗰齣 Jumper 有少少相似, 不過呢齣有 Camilla Belle...

有靚女睇, 特技亦算 OK, 全片都係香港景亦幾有趣, 不過個故事就真係麻麻, 開頭都仲算可以, 但係去到中後段實在搞到太複雜, 扭來扭去, 睇到幾近令人厭煩. 不過睇在 Camilla Belle 份上, 係可以原諒的.

總結: Camilla Belle, Camilla Belle, Camilla Belle...

評分: Camilla Belle/10

Tales of Abyss

上個星期係我半年一度o既 committee meeting, 我要會見我o既三個 advisers, 睇下我寫論文進度如何, 所以過去幾個星期我都特別勤力, 真係 keep 得住"一日寫一頁"o既計劃. 而家我有超過六十頁, 其中有四十頁係講 3 Baruch, 交咗俾佢地睇. 本來我都已經有晒心理準備, 諗住實俾 Schuller 同 Reed 話係垃圾, 點知回應出乎意料之外咁正面. Schuller 仲話 "very good", 佢係我所認識最嚴o既人, 喺 Mac 已經四年, 從未聽佢讚過我 (亦冇聽佢讚過其他學生), 今次係第一次, 所以真係好大鼓舞. 真係要多謝 3 Baruch. 其實而家睇返, 我都覺得寫得唔錯, 因為喺學界入面 3 Baruch 唔算好受歡迎, 所以有唔少空間俾我講我自己o既想法, 係其他人之前未講過, 所以覺得實在係幾好玩.

而家已經過咗關, 今個暑假亦冇 conference 要去, 所以基本上成個暑假唯一要做o既嘢就係寫論文, 如果可以一日寫一頁, 呢個假期其實可以寫成百頁, 算係好好. 希望可以 keep 住啦. 我仲希望可以寫個影評 (Knowing) 俾 Journal of Religion and Film, 好似幾好玩, 又可以寫落 CV, 一石二鳥; 寫成 OCP 個 4 Ezra 嘢; 同埋過幾日要交個 syllabus, 因為 Mac 有一科叫做 The Bible and Film 會請教師, 雖然機會極低, 但係試下冇壞. 同埋加多句, 非常不幸地, 下年我又攞唔到 OGS, 非常失敗, 下年又唔知仲有冇 department scholarship, 所以都有嘢應該要擔心, 但係而家我學緊唔好諗埋 d 諗都冇幫助o既嘢, 現階段, 對我自己最有益o既就係寫論文, 仲要寫得好, 呢樣係最重要, 其他嘢就煮到埋嚟先食囉.

最近幾日有時間, 睇咗齣動畫叫 Tales of Abyss, 26 集, 算幾短. 本來我一向都唔係幾鍾意 Tales 系列, 但係呢個故事算OK, 雖然好多嘢都搞到太複雜, 但係勝在幾個角色都有一定深度, 呢方面唔錯. 係一齣我會推薦o既動畫.

The Spirit

呢齣嘢真係垃圾到令人難以置信, 爛到令人啞口無言. 所以我都冇乜嘢可以寫.

結論: 辣塊媽媽.

評分: 0.5/10

The Uninvited

就快出 OGS 結果, 反正都冇心機做嘢, 所以頭先就求其開齣嘢睇. 呢齣戲, 本來開之前, 睇個 poster 似係日式鬼片之類, 不過其實似 thriller 多 d. 故事講個女仔屋企大火燒死咗佢媽咪, 而佢就嚇到失憶, 唔知當晚發生乜事. 佢喺精神病院出嚟就返到屋企, 佢老豆已經娶咗之前屋企個後生看護, 後來仲同佢個姊妹發現個看護古古怪怪... 故事最後都有個 twist, 唔算離譜, 唔係完美, 不過仲算 OK 合理. 不過呢類型o既 twist 已經睇過好多次, 冇驚喜. 故事中幾個角色亦唔覺特別吸引, 女主角又唔靚, 好似細路仔咁. 而我覺得最失敗o既, 就係睇完全片都冇被嚇到過一次, 驚嚇 feel 非常薄弱.

結論: 故事性 OK, 不過冇任何突出之處, 唔係差又唔係好正.

評分: 6.5/10

任天堂正仆街: Fatal Frame Dead!!!

有時好激氣o既時候, 你話點可以唔講句"仆街"?

本來 wii 就已經有乜 game 好玩, 但係我就一向都好期待 Fatal Frame 4. 本來 Fatal Frame 出喺 wii 唔出喺 PS3/Xbox360, 我都已經好不滿, 不過有得玩都算啦. 點知而家日本版出咗成年幾之後, 竟然話唔會出歐/美版, 你話係咪仆街?

據 Tecmo 講, 只有任天堂先有權出, 而任天堂就完全冇計劃要出... 有 Fatal Frame 咁出色o既系列竟然唔出, d 人係咪壞腦呀? 最衰就係 d 對打機其實冇興趣o既人無厘頭又買部 wii 返屋企擺, 搞到 wii 呢部廢機竟然咁好賣, 搞到咁多好 game 要衰喺呢部機能低下o既衰嘢手上, 真係冇天理.

秒速 5 厘米

上次睇新海誠嗰齣"雲之彼端"真係令人非常失望, 睇到 d 精緻畫功就令人怒火中燒, 唔明點解畫到咁靚, 但係個故事如此不濟. 頭先喺不抱任何期待o既心情之下, 睇咗佢比較新o既另一齣動畫電影, "秒速5厘米", 不過同個半鐘o既"雲之彼端"唔同, 呢齣只有60分鐘長, 分開三個小故事 (不過都係嗰 d 角色). 竟然覺得好好睇! 證明呢個導演拍一個長故事唔掂, 但係短故事就OK.

三個故事係"櫻花抄", "太空人", 同埋"秒速5厘米". 其實故事方面, 呢個導演真係較弱, 因為幾乎係冇故事咁滯, 但係因為三個段落都咁短, 所以觀眾唔會覺得有何不妥. 配合佢嗰 d 極靚極細膩o既畫功, 同埋幾好聽o既音樂, 好似睇緊一個有少少故事, 又有對白o既劇場版 MV 咁, 剛好可以突出導演o既長處, 亦令佢講故事唔叻o既短處變得冇咁明顯.

我覺得第一段, "櫻花抄", 睇得最有 feel. 講一男一女o既舊同學, 因為搬屋分開好遠, 冇得見面. 但係仲 keep 住寫信, 並打算畢業前搭火車見一面, 不過約會當日落大雪, 個男仔遲到成四粒鐘... 故事就係得咁多, 但係漂亮雪景同埋吸引o既背景音樂, 任何人都會睇到好有 feel. 主角喺火車上o既冰冷孤獨感, 透過畫面, 觀眾可以接收得到.

第三段, "秒速5厘米", 其實係完全冇故事咁滯, 只係草草交代男女主角都已經大個咗, 男o既依然好懷念女主角, 不過工作同生活已經令佢冇力氣胡思亂想; 女o既就已經要嫁人, 男主角只係佢o既兒時回憶. 最後一幕喺電車前面, 就交代咗佢地咁o既關係. 呢段第一次睇時, 覺得導演好Q懶, 單係播歌就用咗一半時間, 但係回味一下, 又覺得幾有 feel, "秒速5厘米"o既 imagery 亦用得好. 5cm/sec 係講櫻花瓣落下o既速度, 不過人同人之間, 亦好似花瓣一樣, 不由自主地, 以一個不可變更o既速度, 慢慢散開, 同其他來自同一顆樹o既花瓣散落到唔同o既地方去. 係一個有心思o既比喻.

總論: 雖然故事有少少過份地簡單, 第二段其實甚至同第一/三段唔係咁夾, 但係全部都夠短, 要表達o既信息透過畫面成功交代到, 睇落有 feel. 我個人係覺得好鍾意. 不過導演唔係宮崎駿第二, 因為佢仲未識講一個90分鐘長度o既完整故事. 希望佢將來花多 d 花思喺故事推進上面, 配合佢畫面觸覺上o既天才.

評分: 8/10

每年四月一日...

ZONE o既散 band 週年. 呢個星期我要勁煲 ZONE 隻 DVD.

賤買 4 本貴書

上個星期喺網上見到幾本原本勁貴o既書賣得好平, 本本都原價過百蚊, 而定賣十蚊以下, 俾埋 shipping 都仲係平到爆, 抵買到極. 讀開 Biblical Studies o既人, 一睇個封面就知有個價錢有幾震撼. 今日終於寄到, 真係高興. 呢幾日唔再見到有咁抵買o既書, 希望遲下再見到有新嘢.

On the Way to the Postmodern, Vol. 2
by David Clines, $6.99, 原價 $168

An Elementary Grammar of Biblical Hebrew
by Edwin Hostetter, $4.99, 原價 $168

Biblical Hebrew: Studies in Chronology and Typology
by Ian Young, $9.99, 原價 $240

Goulder and the Gospels: An Examination of a New Paradigm
by Mark Goodacre, $9.99, 原價 $192