早幾日, 博愛潮語浸信會東頭堂一位資深教友喺facebook出post, 開名指控教會牧師倪立賢性騷擾女信徒. 嗰個post喺達成引起公眾關注的目標後, 已經刪除, 篇文好長, 有很多細節, 按我自己理解, 其中一些重點包括:
1. 牧師的一貫手法, 係同一些青少年女組員建立父女關係, 同佢地講「比爸爸攬下」、「比爸爸舒服下」、「上嚟我屋企瞓」等等. 嗰個post冇明確講實際上有咩動作, 但指控至少係性騷擾的層面.
2. 受害人多於一人, 並自從舊年 (即2017年) 已經向教會投訴/求助, 似乎出post公開事件嗰位, 係有份喺教會入面處理或了解呢尐投訴的人之一.
3. 牧師反咬話尐女仔屈佢, 總之結果就係, 教會有點樣特別作出處分, 走向不了了之.
事件公開後, 博愛潮語浸信會就喺網站出聲明:
本會早前收到有關前職員倪立賢牧師的性騷擾投訴，並已展開跟進相關事宜。被投訴人已主動聯絡警方，事件現已交由警方處理，本會將全力配合調查。
其實反正都要面對, 出聲明就咪再玩埋尐語言偽術啦, 人地都唔係盲o架嘛, 你估全宇宙得你有腦咩. 投訴係舊年已經收到, 相隔現今差不多一年, 形容為「早前」收到投訴唔係謊言, 不過絕對係古惑花招. 另外, 倪牧師係事件被公開前一個月 (2018年5月) 先至被炒, 份聲明就懶係有技巧地標明倪立賢係「前職員」. 呢一切語言偽術, 都顯示出, 教會都知道自己的不作為很有問題, 希望公眾唔會發覺.
件事揚開後, 倪立賢牧師就主動報警, 現時查緊, 睇下有冇更多受害人肯現身投訴, 目前似乎至少有一位. 根據《時代論壇》採訪, 牧師話曾經對教會一些姊妹做過「過界、不恰當的行為」; 《蘋果》的訪問, 就反映至少一部份受害人可能是未成年. 不過, 人人對過界同不恰當行為的定義唔同, 其實未知牧師是為何事認錯. "Sorry, I'm too handsome and too attractive"都算係認錯, 所以未知具體情況.
2 comments:
HOWTIN，因為我唔少朋友同佢關係密切，由佢牧養，宜家成為傳道人。所以嚮度留言，唔FB講。
呢位牧師，母堂係呢間教會，之後過左恩福，之後返母堂，仲升埋牧師。
我尚算年青嘅時期由呢個人牧養。大部份人都好BUY佢（當然實際係咪就唔知），不過當年有啲被視為異類嘅三四隻小貓唔鍾意佢，都係一啲處事手法同性格（但我無八卦）。
雖然同佢合作過，但唔係深交，所以尚幸無不愉快事件發生，而佢母會對我亦不簿。
對於呢單新聞，我感到傷心同難過。
地上的事交由地上解決。希望真相水落石出。
如果我十八廿二，遇有呢啲事都唔夠膽出聲。所以希望大眾對性侵犯的處理有多啲認識。啲衰人就係睇中某啲人怕事或唔敢出聲。
我自己唔贊成只交教會處理，因為通常教會只係解僱就算，衰人會嚮第二度搵食。
不過，識講野真係好重要，我見好多上到位，受歡迎嘅傳道人、牧師，都係識包裝、識講野，但大部人都唔知佢地廢。
今次呢單係涉及性侵，之前有一單都係我識嘅，就渉及錢（見左報，有打官司）。
雖然話，上帝同教會係兩回事，但見到啲人搞啲咁嘅野，都會傷心。
有點累。
多謝留言分享. 其實今次牧師失足失見證就唔在講, 教會的疑似隱惡處理方針, 喺一般人眼中失的見證唔會更少.
其實我支持教會信徒尊重信任牧師, 不過實在見到有咩唔對路, 始終要仗義行事, 不能隱惡.
Post a Comment