[荒謬到暈] 唐德玲 - 聖經啟示理財智慧

頭先喺晴報見到有篇文章, 作者唐德玲透過馬太福音入面嗰個才幹的比喻 (25.14-28) 講理財智慧. 故事講有個主人臨走之前分別留底5,000, 2,000, 1,000銀子俾三個僕人, 到佢返嚟之後, 得5,000同2,000銀子嗰兩個僕都都將本錢 double 咗, 但係1,000嗰個將錢收埋, 冇多冇少, 被主人鬧到反艇. 

唐德玲講, 呢個故事"可以詮釋為：不同人有不同的管理財富能力, 以及有沒有盡量發揮金錢的用途." 所以, 結論就係"有些人只懂得儲錢（其實已經不錯）, 卻從不懂得運用各種理財工具和財務技巧去理財, 結果, 財富便悄悄地貶值了." 

呢篇文章非常荒謬, 馬太福音24-25其實係講緊末世o既話題, 警告尐信徒喺主人突然回來之前, 唔好不結果子, 唔好喺度 hea, 絕對唔係教緊理財. 都已經末世, 聖經還會教人花時間理財投資? 痴孖筋啦. 教理財咪教理財囉, 完全冇必要夾硬引段完全無關的聖經填格仔, 令篇短文長少少. 咪咁啦. source

Kando家族賣死海古卷碎片

死海古卷喺50年代尾被發現, 最初有機會接觸呢尐珍寶o既文物賣家花名叫Kando, 當年佢最著名o既收藏係 Temple Scroll, 係現存最長o既死海古卷, 打開嗰時總長超過 27 呎, 當年佢將呢件寶物用鞋盒裝起, 收埋喺屋企, 留待第日大幅升值嗰時先賣出去. 後來1967年六日戰爭, 以色列領土擴大咗, 包括埋佢屋企, 所以當時軍人兼考古學家 Yigael Yadin 帶埋軍隊上佢屋企"探望", 以$125,000"買"咗卷嘢. 

近日佢個仔公開表示, 佢喺瑞士夾萬仲有死海古卷碎片可以出賣, 並指曾經向以色列出售, 但出唔起錢買, 所以現時向全世界所有買家招手. 以色列已出言譴責, 表示死海古卷係以色列文化遺產. source

學者回憶 Geza Vermes

陸陸續續有更多知名學者撰文講 Geza Vermes, 其中特別值得睇的, 包括有 Philip Alexander 寫o既呢篇長文, 同埋 Marginalia Review 特別邀請多位頂尖學者寫的特輯, 包括有Fergus Millar, Emanuel Tov, Paula Fredriksen, Tessa Rajak, Joan Taylor, Philip Alexander, Sidnie White Crawford, Timothy Lim, Charlotte Hempel, James D. G. Dunn, C. T. R. Hayward, James Davila..

尋晚已經如期出咗youtube片講 Geza Vermes, 希望今個或下個星期可以再寫篇文講同類型話題, 咁就完成我今次 Vermes 三部曲了 sosad

Geza Vermes對耶穌研究的貢獻

上個星期我好勤力, 前所未有地花咗好長時間準備做耶教異聞錄的節目, 因為係講Geza Vermes同死海古卷, 我好想講得好, 有多尐有意義o既資訊, 亦想有個合理o既結尾, 所以搞咗我好耐, 最後效果恰如我當初想像, 算滿意.

我打算今個星期喺youtube出條片再講Geza Vermes對耶穌研究的貢獻, 唔覺意聽到Mark Goodacre有一段錄音, 講第三波耶穌研究, 其中有提及Geza Vermes:
http://podacre.blogspot.ca/2011/02/nt-pod-49-what-is-third-quest-of.html

另外, N.T. Wright 2002年喺CS Lewis Institute一個講座入面講耶穌, 第一講"What's the Problem with Jesus?"亦有提及少少耶穌研究的歷史, 同埋Geza Vermes, Ben Meyer, EP Sanders等人:
http://www.cslewisinstitute.org/audio/by/album/finding_and_following_the_true_jesus

Martin Abegg, The Story of the Dead Sea Scrolls

為咗準備星期日耶教異聞錄講Geza Vermes同死海古卷霸權, 今日喺網上搵尐有關死海古卷o既嘢嚟聽, 溫習返. 唔覺意見到Martin Abegg幾年前喺西雅圖 Mars Hill Church o既一個講座, 不過冇乜我想聽o既嗰段故事 sosad.

http://theresurgence.com/2006/11/04/the-story-of-the-dead-sea-scrolls

Geza Vermes (1924-2013)

 

 

牛津大學的聖經學者 Geza Vermes (1924-2013) 今日由於癌症去世，生前曾經當過天主教神父，後來改信猶太教，是研究第二聖殿時期猶太教和早期基督教的頂尖學者之一，亦是牛津大學首個 Jewish Studies 教授。
 

Geza Vermes 曾出版大量書藉和學術報告，遍及多個與聖經研究有關的研究題目，其中最為人熟悉的包括有 Jesus the Jew: A Historian's Reading of the Gospels ，透過猶太人文獻和文化角度去了解猶太人耶穌，為當時的耶穌研究去除耶教神學包袱，而以歷史學家的視野去作探討。Vermes另一本最受歡迎的書，應該是死海古卷的英文翻譯 The Complete Dead Sea Scrolls in English ，在80年代，他亦曾經很勇敢地公開表示，有些學者把死海古卷私有化，是一宗醜聞。

河北毒殺兒童奇案

剛才喺文匯報睇到一篇報導文章《河北平山幼兒園投毒案抓獲兩嫌犯》, 提到河北有兩間幼稚園由於收生問題, 所以處於敵對狀態, 其中一間幼稚園o既園長為咗打擊對手, 將注射咗老鼠藥「毒鼠強」o既酸奶同埋幾本拼音本放喺路邊, 好似放舊芝士o既捕鼠器咁, 引人中招. 其實成件事好低能, 邊有可能會成功? 咁o既陷阱點會有人中招? 但係世事無奇不有, 有個老太婆帶孫女返學, 見到路邊有嘢執嚟飲, 竟然俾兩個孫女飲, 兩女童終於中毒身亡.

呢件悲劇頗有啟發性, 事件最壞嗰個人當然係個痴線園長, 但係都要有個極端無知o既受害人作出一定程度合作才可成事, 否則嗰盒酸奶只會永遠放喺路邊等生蟲. 不少喺教會發生o既悲劇, 其實除咗教會領袖之中多壞人之外, 另一個現實係因為教會受害人有時很天真很傻, 盲目信任領袖, 受害後又唔出聲, 更加助長壞人的氣焰. 所以我認為, 要減少悲劇發生, 除咗要對付壞人, 亦需要教育那些天真的人, 教育尐阿婆明白, 唔係成條村都係好人, 喺街邊執嘢飲係有可能會中毒的, 教育尐教會弟兄姊妹知道, 並非每個教會領袖都係聖人, 所有壞人喺做壞事之前都係成個好人樣的, 持有一定戒心係無可奈何的現實.

結論, 如果有人問我, 點解喺網站同節目成日報導基督教醜聞, 這就是原因, 要強逼天真信徒接受教會多壞人這個殘酷現實, 呢個就係我可以為基督教作出o既貢獻, 尐人應該多謝我先o岩.