聽說

繼影音使團世紀鉅作"驚世啓示"之後, 最近返團契又睇到另一齣非常嚇人o既教會電影, 叫"Fireproof", 竟然係一齣宣揚港女價值, 金錢至上, 物質主義o既教會福音電影, 可謂奇片, 日後會講下.

回想, 其實我好少會鍾意睇教會電影, 因為通常都拍得太露骨, 反而有時睇普通電影, 我覺得當中講/宣傳基督教價值仲來得有效. 例如呢齣"聽說" (唔係教會電影), 講基督教家庭o既兩姊妹o既生活, 我就覺得好好睇, 自然得來又感人, 拍出兩姊妹否定自我, 爭先為對方犠牲o既精神. 一般咁o既角色, 都會令人覺得好假, 不過就正是佢地o既基督教背景, 令成件事變得合理.有時唔係要 hard-sell 先至入腦的; 不停夾硬來的, 叫"催眠".

"聽說"係我最鍾意o既 2009 電影, 雖然故事簡單, 但係幾乎每個角色我都好鍾意, 唯一差少少係個男主角比較淺薄. 而我最鍾意係全片o既氣氛, 因為故事講聾/啞人, 大部份對白都用手語交代, 但係個導演冇用另一把聲配音落 d 手語度, 而係要觀眾睇字幕, 效果竟然極為出色, 反而令人睇得非常投入. 當然, 自從"這裡發現愛"後, 早就鍾意睇陳妍希, 所以喺呢齣電影入面有佢做家姐, 我就更加鍾意睇.

評分: 4.5/5