Star Ocean 4: The Last Hope

由於最近壓力大, 所以完全冇晒 mood 寫論文, 終日以打機打發時間為樂, 連本來唔想玩o既 game 都玩埋. 尋晚剛剛玩完 Star Ocean 4. 呢隻 RPG 我總有玩到爆機, 都唔算係太差, 不過其實我去到最後個迷宮都有諗過放棄, 算係處於合格邊緣. 呢隻 game 好奇怪, 佢其實都有不少優點, 但係造呢隻 game 嗰班人, 又同時製造出相應o既缺點去消滅返呢 d 優點, 真係非常 on9.

首先, 一開隻 game, 第一樣就會留意到畫面好靚, 雖然有好多不夠細緻o既地方, 同 MGS4 之類冇得比, 但係畫面都算好 sharp. 最靚係 d 環境, 花草樹木, 沙漠, 海邊, 非常巨型o既建築物, 全部都好靚. 問題係佢地將 d 環境造得太大, 而全個 game 你都只可以行, 冇任何交通工具可以用, 所以由一個城鎮行去另一個城鎮, 往往要用成半個鐘以上, 煩到死, 令人唔想玩任何 side quests. 好多時走入一個迷宮, 打完隻大佬之後, 你仲要用腳行返轉頭, 而個環境地圖又大到無倫, 簡直就係令人覺得係浪費時間.

而班主角, 畫面係靚, 但係人物設計根本就不知所謂, 除咗個機械人之外, 所有主角都算得上係樣衰, 而不幸地, 個主角就最衰, 成個港式 MK look, 而偏偏又對住佢最多, 真係冇可能投入角色. 其實當中 Faize 同 Lymle 個關係都幾好睇, 但係係大佬, 當你將 Lymle 設計成一個 6 歲孩童, 我點可能幻想 Faize 同 Lymle 之間有曖昧? 呢 d 唔係叫愛情, 呢 d 係叫做變態. 如果班設計者, 有些少常識, 將 Lymle 設計成一個年記大 d o既女仔, 個結局咪好睇好多囉, 同埋呢 d 白痴 RPG 成日都總係有個把聲勁 cute/低B o既女童角色, 其實根本就唔 make sense, 一個 toddler 救返個宇宙?

而故事, 呢隻 RPG 有好多故事, 而我一般都係好鍾意故事性強o既RPG. 但係呢隻 RPG 真係特別, 佢係多故事得嚟多到令人厭煩o既程度. 原因有幾個. 首先, d 主角樣衰就係一個問題, 要睇班冇表情o既公仔頭口郁郁成半粒鐘, 真係好悶. 其次, d 英文配音真係不知所謂, 難聽到令人要發脾氣o既地步, 而最嚴重o既係班 cute 樣o既女角, 全部都係把聲勁尖, cute 到令人作嘔. 第三, d 對白寫得差, 同一樣嘢講一幾廿次, 重複又重複. 例如, 故事中段講到個主角意志低沈, 而呢段歷時成幾個鐘都係咁, 個主角成日死老豆咁款, 不斷講佢做錯乜做錯乜, 講成十幾廿次, 到佢想重新做人嗰時, 我已經心諗: 不如你死 X 咗佢好過啦. 至於角色, 呢隻 game 所有角色都有不少 development, 但係當個角色本身係令人生厭的話, 不論幾多 development 都係多餘.

而玩法, 今集 item creation 易用好多. 但係佢地搞到只有喺你隻太空船上先可以用 item creation. 之前已經提及過, 呢隻 game d 地圖係超大, 所以當你去到一個城鎮, 買到一 d 原料, 你就要行成至少半個鐘返去隻船上先可以用 item creation, 而當你行到返去, 先發覺原來喺個城度買少咗一樣嘢, 你真係會想打爆個電視. 所以, 雖然 item creation 個 system 係容易咗好多, 但係我情願用返 Star Ocean 2 嗰個成日要 reload 但係任何地方都可以用o既 item creation.

總結: 太多致命缺點, 除消晒隻 game 本身有o既優點, 非常可惜. 唯一最好係個 battle system, 但係如果我想玩打交, 我就直接玩 Devil May Cry 或忍者外傳, 唔係玩 Star Ocean.