雲之彼端, 約定的地方

今日都做咗唔少嘢, 所以花少少時間睇咗齣一路都想睇o既動畫電影, 新海誠o既"雲之彼端, 約定的地方". 有人話呢個人係宮崎駿第二, 睇完呢齣, 我覺得佢係有排都未夠班, 先學好講個動聽合理o既故事先啦唔該. 好多人都話呢齣嘢好睇, 因為畫功靚, 有型, 再加上一個冇人睇得明o既故事, 令人覺得呢齣嘢好 deep.

先講長處, 呢齣動畫係畫得靚, 除咗 d 人畫得一般之外, 所有其他嘢都畫得非常細緻, 算得上美輪美奐. 音樂亦算不俗, 不過就當然遠遠不及久石讓幫宮崎駿寫嗰 d, 但係配合上靚畫面, 都算 OK 啦.

雖然喺技術層面上, 呢齣動畫算得上出色, 但係最差o既係故事, 差得連佢有o既幾大長處都唔能夠抵消. 首先, 我唔係批評佢故事中o既 concept, 佢話呢個世界會發夢, 而個女主角就喺夢中接收晒呢個世界o既夢境, 令到其他平衡世界唔會食 Q 咗呢個世界... 係好混亂o既 concept, 但係都算, 佢要咁設計, 我都可以接受. 問題係, 世界觀可以唔合理, 但係存在於呢個世界入面o既角色o既反應同行為唔可以不合理囉.

我隨便都可以數幾樣. 例一, 故事講到個昏迷咗不停發夢o既女主角咁重要, 政府 d 人講到如果佢一旦醒返, 就會世界末日, 但係兩個男主角非常輕易, 完全冇人理就可以將個女仔帶離政府重要基地, 頂, 係咪兒戲成咁呀? 例二, 其中一個男主角因為佢發o既一個夢, 而認為只要佢帶個昏迷咗o既女主角去個高塔度, 佢就會醒返, 而另一個比較理性o既男仔就話佢痴孖筋, 唔可能因為佢發夢就幫佢偷走個女仔, 兩個仲打起上嚟, 但係一分鐘後, 反對嗰個男仔突然又話都覺得個夢係真, 帶個女仔去個塔度佢就會醒返... what??!! 例三, 到結尾, 個男主角帶條女飛到去個塔度, 個女仔醒返, 咁觀眾就會諗, 咁即係世界末日啦, 點知佢喺飛機度, 飛一枝導彈出去炸爆個塔, 咁就已經解決晒問題, 極救咗地球... 喂, 乜容易成咁, 咁之前就咪話乜乜救條女定救地球啦, 根本就冇 dilemma. 同埋講到個塔會食晒成個地球, 世界末日咁, 但係原來用一枝導彈就可以搞掂, 一路千方百計 keep 住個女仔昏迷發夢根本就係多餘, 求其叫阿邊個去飛枝導彈就得啦, 使乜要個中學生去做? 呢個故事入面 d 角色o既所作所為真係不合理到極點.

總結: 背景同死物畫功一流, 音樂不俗, 但係故事不知所謂, 角色言行不合情理, 令人懷疑之前拍慣短篇o既導演根本就唔識講一個 90 分鐘o既故事, 所以要 d 角色做埋 d on9 嘢, 又不時口水多過茶咁講點整飛機, 又強逼人聽埋 d 平衡世界o既理/謬論. 呢方面, 真係非常差勁, 完全掩蓋晒技術上o既可取之處.

評分: 5/10