Mary Douglas, Purity and Danger: An Analysis of the Concepts of Pollution and Taboo.
由於近日師生戀/性o既新聞, 令我想起幾年前睇過o既呢本書. Mary Douglas 係一個非常重要o既人類學學者, 同我專注o既聖經研究無關, 本來唔係我會睇o既書, 但係其中有講到猶太人律法, 所以我都有粗略睇過下. 雖然係 1966 年o既書, 但係入面講到人類對不潔同禁忌概念o既型成我覺得都 make sense.
正如個書名交代, o係呢本書入面佢係講 pollution 同 taboo o既概念如何型成. 不論任何民族, 任何時候, 都有"不潔"o既概念. 但係點解人類會指定一 d 物件, 或人, 或事係"不潔"/"禁忌"呢? 例如, 舊約聖經入面話豬係不潔, 但係點解係豬而唔係牛或其他動物呢? 一個好多人講o既答案係"不潔"同"衛生"有關; 例如, 人類覺得狗屎係不潔, 因為食屎會令人生病. 呢個解釋o既問題在於"衛生"係一個相當現代o既概念. 以前 d 人根本唔知乜係細菌或病毒之類, 但係一樣有不潔o既概念.
Mary Douglas o既見解係, 人類會認定一 d 人/事/物為不潔, 唔係因為o個 d o野有菌唔乾淨, 而係因為o個 d o野不能被分類, 出現o係佢地唔應該出現o既地方. 例如, 一隻新o既波鞋, 放o係一堆鞋中間佢就非常乾淨, 但係放o係雪櫃入面同 d 食物放埋一齊, 就會令見到o既人覺得"污糟". 一張紙巾平平放o係度就係乾淨, 但係"拿"埋一舊, 人睇到就會覺得污糟, 幻想其實入面包住鼻涕之類. 口水鼻涕屎尿屁都一樣, 放o係人體內就冇人會覺得污糟, 但係呢 d 本應o係體內o既o野一但越過身體o既界線, 就會令人產生厭惡感. 你睇 fear factor, o個 d 人食蟲食蚯蚓會食到嘔, 唔係因為佢地覺得 d 蟲/蚯蚓好多病菌, 驚會事後生病, 而係因為佢地認為蟲並唔係紅肉/白肉/海產/蔬果, 係佢地餐單中常見分類中以外o既生物, 所以會覺得厭惡. 未結婚就大肚o既女仔會令人覺得不潔, 唔係因為佢有病, 而係因為佢唔係人地老婆, 但係會變成人地媽媽, 係一個難以分類o既人. 至於性行為, 係兩人越過身體多條界線o既行為, 所以傳統上亦被視為不潔, 甚至羞恥o既行為.
我覺得 Mary Douglas o既解釋都幾聰明. 當然唔係一個可以解釋所有人類行為同概念型成o既學說, 但係都解釋到好多o野.
咁師生戀呢? 點解 d 人咁討厭師生戀/性呢? 我覺得o係呢個 case, Douglas o既解釋係適用. 老師就係老師, 學生就係學生, 當老師變成情人, 當學生變成性伴侶, 呢兩個人就變成不能被分類o既人, 佢地o既身份就變成"不潔", 佢地o既行為就變成"禁忌". 所以呢個可能唔係道德o既問題, 當然亦唔係法律o既問題, 而係 perception o既問題. 旁觀者睇唔慣不能分類o既人/事/物, 所以就主觀地將呢 d 人/事/物扣上"不潔"o既帽子. 不過, 我地又點可以因為自己 perception 覺得唔舒服就去懲罰人地呢?
No comments:
Post a Comment