失見證

早幾日自己寫0左個 email 比 gideon d 人, 我自己睇返都覺得寫得好正, 真係笑到碌地, 原文如下:

我地做基督徒真係要小心呀, 唔好有失見證, 成為他人0既絆腳石呀.

具體 d 講啦, 我地要小心講0野, 唔好用 d 會令人唔安樂0既字, "隨緣"呀, "阿彌陀佛"呀, 唔可以講 gar, 人地會以為你係信佛. 唔可以講"睇下點啦", 唔可以講"我想", 想咩呀, 我地一舉一動都係上帝決定0既, 人地會以為你係唔順服0既信徒. 只要有一個人咁諗, 你就係絆倒人啦.

仲有呀, 做學生0既, 考試做 Multiple Choice 唔識答唔可以亂撞, 因為撞對的話, 你咪得到你唔應該得到0既一分? 你咪即係違反考試0既原意, 唔夠誠實? 雖知道基督徒應該克己, 對自己要求比非信徒更高咁先係嘛. 你如果有 d 同學係食煙0既, 同佢地絕交, 不然的話, 其他人見到你地傾計, 以為你埋去問佢借個火食煙呀, 只要有一個人咁諗, 你就係絆倒人啦.

打工0既, 真係要小心你做份乜0野工. 銀行就當然係唔得啦, 你即係幫人, 鼓勵人積聚財寶在地而唔積聚財寶在天啦, 仲唔係失見證? 你做銀行, 人地會覺得你數口精, 當正瑪門係你0既主呀. 做電腦當然係唔得啦, 我唔係話你係咁做緊, 但係令人以為你係做埋 d 咸 site 0既, 咁咪係不必要0既誤會囉. 做律師都唔係咁好, 因為好多其他律師都俾人印像唔誠實, 就算你係誠實都好啦, 人地都會誤會你係唔誠實, 一上法庭就亂講0野, 幫 d 變態佬打官司, 咁你咪不自覺之間絆倒人? 所以計我話呢, 最好係個個都全職事奉, 咁就好 d 啦, 唔會俾人我地係好屬世咁呀嘛. 你話, 人地見我地一個星期返教會一日兩日, 返工就返足五日六日, 會以為我地緊張份工多過緊張教會 gar. 如果我地係全職事奉咪唔會絆倒人囉, 乜誤會都唔會有啦. 不過又咁, 我地第日做晒傳道人, 唔可以著黑衫喎, 有兩個原因. 一, 好多人會以為黑色代表魔鬼黑暗, 費事俾人地以為我地係魔鬼教啦, 二, d 天主教神父成日都著黑衫, 費事令人以為我地係天主教 gar 啦.

娛樂方面, 我地要愛惜光陰呀, 0係屋企除0左讀書之外就應該讀聖經. 你話啦, 父母會覺得一個勤力讀書靜靜地讀聖經0既細路乖, 定係一個有時讀下書有時睇下電視有時打下機有時玩下 icq 然後臨眼睏前讀兩句聖經0既細路乖呀? 我地要做家庭裡面0既光呀. 大家睇下時下 d video games 幾多暴力, 又打又殺, 人地會覺得我 d 基督徒暴力 gar. 我地亦唔應該買電腦, 容乜易我地0既父母會以為我地會半夜0係度睇埋 d 唔好0既 web site 呀? 睇電視呢, 可以就唔好睇啦, 不然, 我地屋企人會誤會我地係膚淺0既年青人, 更甚者會以為我地係想睇靚仔睇靚女呀. 你諗下, 非信徒又睇電視, 我地又睇電視, 咁0係父母眼中我地同非信徒有乜分別? 報紙都唔好睇啦, 父母會有可能以為我地睇風月版 gar; 如果真係要睇, 就睇"人民日報", 內容健康, 包冇色情, 咪唔會失見證囉. 聽音樂, 要聽 d 屬靈音樂, 齊唱呀, 聖詩呀, classic 呀0個 d, 流行曲就唔好聽啦, 因為人地會覺得我地0既品味好屬世 gar. 因為有一個人誤會, 咁我地就係失見證啦.

返到教會, 就更加要小心, 因為教會係聖殿嘛...牧師話. 總之呢, 牧師就係我地屬靈0既領導人, 係上帝所膏立0既牧人, 佢講0既我地就要順服, 如果唔係, d 外人見到我地自己人都唔和平, 我地就失見證啦. 真係要小心呀, 好似馬丁路德呢 d 壞分子, 我地要以屬靈0既眼光去評判佢過激0既行為. 仲有呀, 唔信0既人都識神學 gar, 佢地知乜0野係三位一體 gar, 咁我地就要小心言行, 要比現出我地係明白三位同等同尊0既道理. 祈禱如果提到聖父, 就一定要提埋聖子聖靈; 人地問你鍾意邊"位"多 d, 你唔可以答 "耶穌" gar, 你要話父子靈都係一體 je, 我位位都咁鍾意. 唔係0既話, 俾 d 醒目0既非信徒聽到, 會誤會我地係異端 gar. 萬一有一個人咁誤會, 咁我地就失見證啦.

我地傳福音時, 唔好我地主動過去同人傾計呀, 如果人地係女0既, 街度 d 行人有可能會以為我地想口花花追女仔, 如果人地係男0既, 仲死, 會有可能以為我地係基民. 所以應該點呢, 應該乜都唔做, 等人地過0黎問我地福音係乜, 然後我地講俾佢聽, 咁就可以免除一 d 不必要0既誤會囉. 如果我地做基督徒0既又去拍門, 週街派傳單, d 唔識0野0既人以為我地係摩門教耶和華見證人咪死? 你唔好話 "咁咪唔使傳福音" 喎, 我地信上帝嘛, 佢會加添我地人數 gar; 佢想加, 我地唔出去都會加, 佢唔想加, 我地做幾多0野都係廢0既. 街外人見到我地咁做, 都會覺得我地係有信心0既基督徒啦.

我地要小心呀, 讀聖經要小心呀. 好似耶穌咁, 佢又同罪人食飯, 俾個有罪女人摸佢, 一日到黑飲飲食食, 連安息日都唔守, 絆倒幾多信神0既人呀, d 法利賽人呀, d 文士呀, 個個俾佢0既出位行為絆倒晒啦, 幾失見證呀. 你諗下, 如果耶穌唔做呢 d 有違當時傳統0既行為, 可以多幾多文士法利賽人得救. 又唔會少0左 d 罪人信徒 gar, d 罪人信佢唔係因為耶穌俾面同佢食飯, 而係因為耶穌有能力行神蹟嘛. 好似保羅咁, 0係教會入面同呀彼得弟兄吵大鑊, 又話唔使割禮, 又自己話自己係使徒之一, 0係教會裡面絆倒幾多人呀, 唔係佢都唔使寫信寫到水蛇春咁長去澄清啦, 真係乜見證都失晒啦. 你諗下, 如果保羅唔堅持呢 d 當時冇人堅持0既0野, 教會可以和平幾多.你唔好以為耶穌保羅可以咁, 你又可以咁呀, 你係耶穌咩? 你係保羅咩? 總之就要事事小心, 唔好失見證啦.

最後, 我地生活要有基督0既樣式呀, 要對生活生命充滿熱誠, 要活潑 d. 唔好俾到 d 非信徒一個誤會, 以為基督教好 strict, 呢樣唔做得0個樣唔做得; 要俾佢地覺得我地好自由, 係我地有型特登唔做 je, 咁先係嘛; 如果唔係, 嚇怕人地唔肯信父子靈我地就失見證啦.

唉, 總之就大把0野講, 一句到尾, 唔好失見證呀; 總之 d 非信徒認為一個好基督徒應該係點0既, 我地就照做, 唔好做少, 人地認為一個好基督徒唔應該做0既, 就一樣都唔好做, 呢樣唔好做0個樣唔好做, 咁就包唔會絆倒人啦.


[真話: 之前都係反話, 如果你到而家都未發覺的話.]