逆轉裁判

NDS 出 d game, 十隻有九隻半係垃圾, 但係有個系列我好鍾意, 鍾意佢o既玩法, 角色, 故事, 對白; 第一集o既音樂亦非常出色, 可惜後來越走下坡. 呢個系列o係日本叫逆轉裁判, o係北美叫 Ace Attorney: Phoenix Wright. 呢個 game 入面幾個主要角色我全部都好鍾意, 特別o既係我連主角每一集o既頭號敵手我都好鍾意. 我未玩完第四集, 但係 so far 我最鍾意係第三集, 因為有好多驚喜, 可以控制主角已經死o左o個個女師父, 同埋第一集o個個敵手, o個幾個段落好好玩, 有新鮮感. 而第三集最後o個個故事亦係咁多集中最好o既一段故事, 個結局好感人. 其實呢個系列雖然 d 對白好多都唔正經, 成日搞笑, 但係 d 主角o既經歷都好悲慘, 不過亦因為咁, 而加倍得人鍾意.

成日聽有人講話會為o左 cooking mama 買 NDS, 佢地都痴線. 但係如果有人話為逆轉裁判買 NDS, 咁我覺得都合理, 因為角色故事都令人印象深刻, 只有少數好 game 可以做到呢點.

C+偵探

呢齣戲的確有驚喜, 因為姓彭呢兩兄弟, 自從見鬼之後就冇出過好戲, 見鬼2, 見鬼10, 死亡寫真, 阿孖有難, 妄想, 鬼域都認真麻麻, 不值一睇. 所以見呢齣由郭富城主演o既彭氏電影, 本來真係一 d 期待都冇, 點知原來幾好睇. 成齣戲由郭富城一個做晒, 都唔錯, 冇佢之前做三岔口o個 d 誇張難看o既表情; 廖啟智亦好好睇, 觀眾應該都會鍾意佢.

個故事有偵探片原素, 又有驚嚇片原素, 甚至有鬼片原素, 有時又出兩句搞笑對白, 睇得好開心, 由頭追睇到落尾都唔覺悶. 個故事最好就係夠平實, 所以亦冇夾硬扭橋o既必要. 呢齣戲唔係金田一, 觀眾唔使去諗誰是兇手, 只係郭富城查案o既經過, 但係因為個經過不斷出現有趣o既角色, 不斷有驚險事情發生, 所以由頭到尾都睇得投入, 去到結局, 有種好滿足o既感覺. 係一齣觀感一流o既電影.

Angry Video Game Nerd: Dragon's Lair

正呀, Angry Nintendo Nerd 最正o個 d review 都係最早期o個 d (我o既飛佛係忍者龜), 又簡單, 又搞笑. 最近呢個 review 有返以前o個種簡單 feel, 令人回味無窮, 個結尾就更加係高潮所在.

死不悔改: 挪亞方舟國際事工

頭先見到挪亞方舟國際事工個網頁有 d 新資料, 講到影音使團自從話"發現"挪亞方舟後有乜搞作. 其實一句講晒, 就係直到今日為止, 佢地都未能證實"發現"方舟, 佢地甚至唔知自己發現o左 d 乜, 但係佢地估係挪亞方舟, 不過就不斷巧言令色俾人一個真係已經發現方舟o既假象, 籌錢都仲算小事, 因為自己唔用腦就俾錢係自作自受, 死在佢地仲叫人信耶穌, 因為方舟已經"證實"係真... 大佬呀, 第日你真正查到話唔係挪亞方舟, 咁 d 因此而信耶穌又如何自處呢? 真係不負責任.

上次佢地話見到o個個望落似係大型木結構o既o野o係新報告中已經冇提及 (有冇搞錯呀?), 今次講o既係第二樣o野, 話有個當地人o係個洞穴中發現有舊化石木, 佢地去搵, 就o係個山洞中搵出一舊 11.5x2.6 米o既化石木. 你估都估到, 佢地一口咬定就話呢舊木來自挪亞o個隻方舟, 因為"亞拉臘山高處的嚴酷氣候，已持續4000多年，令高地缺乏樹木生長". 有趣, 咁我又想問, 創世記 8.10-11 話: "Noah sent out the dove from the ark. The dove came to him toward evening, and behold, in her mouth was a freshly picked olive leaf". 既然該處冇樹木生長, 又何來 olive leaf 咁奇怪呢? 佢地又話, "木結構的龐大體積，亦無法輕易運載登山". 首先, 比起金字塔, 比起長城, 都唔係好龐大, 亦唔係好難運載 je. 最後, 如果世上真係有過大洪水, 即是話世上不知有過幾多木當時被沖上本來唔應該出現o既地方, 你又何解咁神奇可以知道呢塊木就係挪亞方舟上面o既一塊木呢?

閻韋伶: 傻孩子

01.Be With Me
02.傻孩子
03.很用力
04.春夏秋冬
05.Sunday
06.黑白鍵
07.Olivia
08.這裡
09.有一首歌
10.Happy Birthday To Me

台灣 d 人唱歌係幾勁, 好多之前未聽過名o既人出o黎第一張碟, 好多時就好聽過 Parco 同英皇煲到懶係有實力o既人. 之前聽郭靜就已經大為驚艷, 呢個女仔 d 歌又係好聽. 我都係鍾意郭靜把聲同個樣多 d, 但係呢個閻韋伶呢張碟都幾好, 十首歌中, 傻孩子, 很用力, 春夏秋冬, sunday, 黑白鍵 (有 soler 和音!!!), olivia, 這裡, 成七首歌咁多我都覺得好聽.

Uncharted: Drake's Fortune

本來呢隻 game 係 20 號先出, 但係 d 舖頭偷步, 一早已經放晒出o黎賣, 所以我星期六已經買o左. 雖然我少玩動作 game, 但係呢隻 game 我好鍾意, 係我最鍾意o既動作 game 之一, 已經好耐冇試過連續兩日勁打機, 一氣呵成由頭打到落尾爆機, 當爆機畫面出現o個時, 真係覺得好滿足.

呢隻 game 好似係遊戲機版本o既 National Treasure 咁, 故事講 Nathan Drake 想搵出同自己祖先 Francis Drake 有關連o既寶藏, 佢有個老老地o既 partner 叫做 Sully, 亦有個女記者叫 Elena 跟住佢, o係尋寶途中又有好多海盜想搶佢 d 地圖... 所以個故事就好似睇戲咁, 有追看性, 想一路睇發展落去會變成點, 而且個 presentation 又同個遊戲本身好夾, 由 game play 轉去 cutscenes, 再轉返去 game play o既轉折非常流暢, 而且個 game 又頭到尾都唔使 save (佢會自動紀錄), 所以會唔覺唔覺就坐o係度玩o左幾粒鐘. 故事以外, 角色亦非常吸引, 主角同個記者妹都好有性格, 有時又會出句抵死對白, d 配音又出色, 所以玩到中段, 已經變得好鍾意呢兩個角色, 變成想一路玩到爆機o既動力之一, 想睇佢地下場如何. 非常期望佢地出第二集, 延續呢 d 角色.

至於玩法, 主要有兩個部份, 一個係槍戰同埋爬o野搵路. 兩樣都幾好玩, 不過我就更加鍾意爬山搵路同埋解謎o既部份, 如果少 d 槍戰, 多 d 搵路解謎就更加合我口味. 其實就係好似 Tomb Raider 咁, 但係就出色好多, 唔會迷路, 槍戰o既控制亦流暢好多.

我兩日勁玩就爆機, 大概十個鐘咁上下. 其實都唔算好短, 比起 Bioshock 同 Metroid Prime 當然係好短, 但係比起 Resident Evil 或者 Metal Gears 就其實都差唔多. 呢個 game o既步伐非常之快, 所以玩到爆機o個時都覺得差唔多. 不過當然, 咁好玩, 的確係越長越好.

Severance

Shaun of the Dead 係英國玩o野版本o既喪屍片; Severance 就係英國玩o野版本o既野外殺人片. 故事就係講一班人去野外活動, 點知俾人逐個殺, 當中又時不時搞下笑咁, 基本上就係 Shaun o既精神引申. 不過我覺得成績唔及 Shaun, 主要係因為 d 笑料冇咁好笑, 睇落冇咁過癮, 有時甚至會覺悶. 不過有 d 地方都有少少 surprise, 算係打倒一向野外殺人片方程式, 不過呢個小好處補償唔到劇情推進唔夠快o既缺點.

總括就係麻麻地, 唔推薦俾未睇過o既人, 與其睇呢齣, 不如翻睇 Shaun 可能仲過癮 d.

地獄第 19 層

本來對呢齣戲有 d 期許, 因為恐怖片係我心頭好, 個片名聽落幾吸引. 同埋一向鍾意譚耀文, 想睇下佢 d 戲, 作為精神上支持. 至於阿嬌做主角, 都 ok, 因為之前睇"公主復仇記", 佢o係我心目中加o左好多分.

可惜期望o既結果係失望. 首先, 呢齣戲一 d 都唔恐怖, 個地獄奇幻 feel 就有, 驚嚇度就真係不足. 所以雖然阿嬌要走入地獄, 但係觀眾亦唔會為佢擔心緊張. 唯一好o既就係 d 特技唔錯, 我覺得好過李心潔o個齣"鬼域". 個故事又混亂, 去到後面搞到可以進入其他人o既幻覺入面, 唔明佢搞邊科. 如果佢講明係奇幻故事, 咁又 ok 喎, 但係佢鬼怪得o黎要想用精神科學o黎解釋, 但係去到後面又有唔係理性可以解釋o既情節, 搞到好混亂.

至於演員, 全部演出都只屬一般, d 配音聽落怪怪地, 更加令人難以投入.

一句講晒, 睇呢齣戲等於浪費時間.

500 科大生無厘頭聲討校方

============================
500 科 大 生 聲 討 校 方

【蘋果日報】 科 技 大 學 化 學 系 博 士 生 葛 煒 煒 吊 頸 自 殺 身 亡 ， 500 名 科 大 學 生 當 中 主 要 為 內 地 生 ， 昨 日 向 校 長 朱 經 武 作 出 控 訴 ， 指 摘 科 大 將 葛 煒 煒 由 博 士 貶 為 碩 士 ， 其 指 導 教 授 徐 兵 又 決 定 離 開 科 大 ， 導 致 已 患 有 抑 鬱 症 的 葛 煒 煒 對 前 景 感 徬 徨 ， 最 後 走 上 絕 路 。 葛 煒 煒 雙 親 今 日 抵 港 辦 理 兒 子 身 後 事 。

研 究 生 出 路 不 足

不少 研 究 生 在 會 上 投 訴 ， 科 大 未 設 研 究 院 ， 對 研 究 生 就 業 及 心 理 照 顧 也 不 足 。 科 大 副 校 長 錢 大 康 說 ， 校 方 正 研 究 成 立 研 究 院 ， 為 研 究 生 提 供 更 全 面 的 照 顧 。

至 於 教 授 去 向 問 題 ， 朱 經 武 說 ， 單 是 商 學 院 今 年 已 被 挖 走 四 人 ， 其 中 一 名 教 授 被 美 國 以 150 萬 美 元 （ 約 1,168 萬 港 元 ） 年 薪 挖 走 。 科 大 強 調 ， 至 今 尚 未 收 到 徐 兵 的 請 辭 ， 正 了 解 事 件 。
============================

d 人都痴痴地, 咁都有得投訴, 仲要投訴埋 d 白痴低能o野. 大佬, 你當初搵學校o個時乜唔知科大冇研究院o既咩? 而家入o左學先o黎投訴? 學術世界就係咁o架啦, 你有本事, 咪考間有研究院o既學校囉, 又或者你而家唔滿意科大冇研究院, 咪轉校去間有研究院個囉. 如果轉唔到, 只有怪自己唔夠人勁, 又或者投胎冇投去 d 大富之家, 投乜鬼訴?

投訴科大將人由博士貶為碩士又係無聊. 被貶o個個覺得無理, 好簡單 je, 咪轉校囉, 搵過間承認你學歷能力o既學校囉, 如果搵唔到, 只有怪自己之前讀得唔夠好, 又或者入錯 d 雞校. advisor 跳槽亦好平常 je, 其實根本係好事, 之前親自教你o個個人有第二間更好o既學校賞識, 你做到個咁o既人o既學生, 直頭係行大運啦, 第日佢幫你寫封 reference 都勁好多啦. 如果個 advisor 走o左就怕冇第二個接手, 咁就係擔心太多, 又或者只可怪自己點解入間學校 d 老師咁易俾人挖走. 當初入間好 d o既學校, 咪冇咁多老師成日諗住想走囉.

辣塊媽媽, 咁都投訴得一餐.

The Best of mihimaru GT

我咁大個人, 但係從未聽過有隻碟係所有歌都好聽o既, 精選碟都係咁話. 但係呢隻 mihimaru 大碟有 16 首歌, 隻隻我都覺得好聽, 可以放隻碟入機, 唔使跳歌, 唔使自己再 burn 過, 又頂癮又抵買. 全部歌都好, 不過我就特別鍾意 tracks 1, 2, 3, 4, 5, 8, 15. 如果行住把刀o係我某 d 人體要害, 強迫我講一首最鍾意o既, 我諗會係第二首 Love is..., 又或者第十五首 Kaerou Ka, 睇心情.

佢地呢個組合真係絕配. 個女o既可謂聲色俱備, 唱又得 rap 又得; 個男o既就製作 d 歌好聽之餘又有特色, rap o個時同把女聲又夾. 期待佢地將來繼續製作出更多好歌.