翻睇檞寄生

最近都冇乜特別, 又係返工, 而且已經做緊農曆新年特刊, 所以雖然快到聖誕, 但係全無任何xmas feel. 但係尋日有個喺youtube上面識o既女仔朋友, 佢喺香港過嚟西雅圖探家姐, 當佢地上嚟溫哥華行下嗰時, 順便約我出嚟見下面, 仲送咗幾樣嘢俾我, 真係非常感激佢, 一定留到boxing day嗰日先開D手信.



當然, 自從唔知幾多年前開始, 每年聖誕我都會翻睇痞子蔡嗰本經典小說檞寄生, 今年都唔會例外, 將會再翻睇多次. 雖然我都鍾意睇畢華流同金庸等, 但係呢本檞寄生先係我最鍾意睇o既中文小說, 真係寫得太好, 當寫好笑對白o既部份, 係真係好笑, 但係亦大量好有意思o既金句, 其中好多角色都好正, 而最聰明o既, 當然就係個書名檞寄生, 完全貼合晒本書o既故事同角色關係. 可惜呢本係蔡智恆o既最高峰, 連佢自己都唔可以再寫出咁好o既小說.

近況

由於早排大病一場，加上聖誕季度忙於打機，再加上民主黨區選並冇仆街性失利，對我脆弱心靈作出巨大破壞，所以已經好一排冇打blog，其實我都知咁唔係幾好，因為將來想睇返呢段時間我做過乜，只留下一片空白，冇可能會記得返。

最近返工好多o野做，因為我嗰組唔計個老闆，只得三個人，有兩個走o左，要請新人，我突然變o左做o野最快最熟手o個個，所以要寫好多o野。其實多o野做冇乜所謂，但係多o野交就多機會出錯，真係非常兇險。但係我老闆係個好人，私下亦係好朋友，又係第一個請我做份穩定職業o既人，所以呢段時間幫到佢我係非常樂意。不過聽佢講好似打算賣樓退休，而我而家呢份工基本上唔係人做的，都係睇在佢份上先冇周圍搵工，所以最近已有心理準備要搵過份新工。不過事業o既o野我都唔係好擔心，因為根本就冇任何前境，都係垃圾工換垃圾工，正是本來無一物，何處惹塵埃。

o係事業上我係唔會有機會得到任何滿足感的，所以要由我個youtube頻道填補，每次有人話我真聰明或真有學識o個時，雖然我知道自己只係小學，事實上既不聰明亦只係學識有限，但係都開心知道有人覺得我唔係一個 unemployable o既廢人，唔係好似我見過工o既所有教會咁諗。當然，最近特別過癮的，係見到影音使團單挪亞方舟o野，而家逾搞逾大鑊，本來都冇咁多回響，但係由於有幾位牧師傳道公開提出質疑，影音接連出o左兩篇號外數臭呢d教牧，成功爭取更多其他教牧反擊，而家變成被圍攻之勢。我唔認為影音會因此而改變，亦唔會因而收皮，但係佢地咁多倒行逆施o既作為多d人知道，總是好事。過幾日我亦會去睇佢地齣電影，我其中一個聽眾話，佢識得租地方俾溫哥華影音使團o個個業主，佢同影音班大佬講，如果佢唔同我地對話，就叫個業主收舖，所以電影播完後會同我地見面云云，唔知會點發展，不過就一定帶定錄音筆，希望訪問到袁文輝，俾個機會佢向我d聽眾澄清一下，俾晒位佢上，佢好應該多謝我先係。

我已經多次去教會講道，但係其實用嚟用去都係得兩篇寫得好o既，其他有幾篇用過一次之後我就覺得唔掂。不過最近去Coquitlam一間教會講嘢，竟然撞手神寫o左一篇特別好o既，所以而家我有三篇好咁大把，分別係"Aaron the Servant of God", "Ask and It'll be Given to You: Is that a Lie?", 同埋最新o既"The Temple, a Fig Tree, and Sandwiches in the Gospel of Mark"。而家嗰間嘢話想請我定期每兩個月去一次，我都唔介意去，不過我擔心之後我 d 講道質素會插水式下滑，咁就變咗搵人老襯。

基督教護教學已走到末路？

頭先o係網上新聞網站睇到近日幾單新聞﹕

http://www.dailymail.co.uk/news/article-2026470/Prof-John-Schneider-quits-Michigan-Christian-college-science-questions-Bible-stories.html

http://www.npr.org/2011/08/09/138957812/evangelicals-question-the-existence-of-adam-and-eve

主要就係講o係美國一間叫做Calvin College o既基督教機構，有兩個聖經教授，John Schneider同Daniel Harlow因為各自o係佢地o既文章中對聖經中一 d 故事o既歷史性提出質疑，所以好多當地基督徒向校方施壓，要踢走佢地。其中前者已經辭職唔撈，而後者就仲頂住... 暫時。

文中又提及，其實我母校Trinity Western University一個 Bio 教授亦講，雖然佢係基督徒，但係需要講人類冇可能源自兩個人（即亞當同夏娃）。不過我母校算開明，呢個教授仲未出事... 暫時。

其實呢 d 新聞令我覺得，其實傳統o個套基督教護教學本來就係非常脆弱，現今已經走到絕路，"聖經入面所有故事，每一個細節都係符合科學同歷史"，呢個係一條不可能守得住o既防線。不過，亦唔代表基督教護教學就此玩完，但極需要更新論述，唔好再當聖經係歷史教科書或天文通識書。我認為而家呢個階段，呢班基督徒學者出o黎指出聖經有邊幾條不可防守的防線，就係想進行呢個革新的第一步，可惜有班古老石山基督徒當正佢地係異端，唔肯及早面對現實，重新起步。

BibleWorks 9

頭先喺 email 度收到最新版本 BibleWorks 9 o既廣告. 雖然係唔會買, 不過都有留意下有乜新o野.

http://www.bibleworks.com/content/new.html

非常可惜, 基本上係冇乜有用o既新o野, 尤其係 primary text 方面, 非常缺乏. 唯一我覺得有少少興趣o既, 就係個 Manuscript Project, 據講有相片同埋 transcription. 對於時常要做新約 textual criticism o既人嚟講, 係有用o既, 對我就冇乜用, 只係得個有型.

結論: 買一定唔會; download可以考慮一下, 其實都未必. 令人失望o既新 version.

又多一個該亞法骨盒？

最近o係度諗，呢個blog用o黎做乜好，因為以前我會寫出o黎o既話題，而家就轉為錄落youtube度，個blog變o左冇乜用。

不過有時有d新料，又唔得閒錄youtube，其實都可以 講下。例如頭先食飯見到呢個新聞﹕

http://www.washingtonpost.com/world/middle-east/israeli-scholars-say-2000-year-old-burial-box-linked-to-bibles-high-priest-is-genuine/2011/06/29/AGOoCXqH_story.html

http://www.newsday.com/news/nation/israeli-scholars-say-biblical-burial-box-genuine-1.2993011

http://www.foxnews.com/scitech/2011/06/29/israeli-scholars-confirm-authenticity-2000-year-old-burial-box-belonging-to/

http://www.jpost.com/NationalNews/Article.aspx?id=227184

以呢d報導睇，就係冇幾耐之前，有幾個非法販賣古物o既人被差佬拉o左，o係佢地d貨入面，發現有呢個骨盒，上面寫住"Miriam daughter of Yeshua son of Caiaphas, priest of Maaziah from Beth Imri"。最近就出o左個官方報告，經Bar Ilan U 同埋 Tel Aviv U o既專家考核後，認為呢個骨盒係真貨。

而家未睇到骨盒上面d字，但係我會好想睇下該亞法寫成點。因為之前有另一個"該亞法骨盒" ，被Craig Evans等學者質疑，話上面其實寫o既並唔係該亞法個名，而係"高法"之類。呢個係一個值得 follow o既新聞。

[地球毀滅密碼] 基督教末世觀的問題

基本上就係我之前喺The Journal of Religion and Film刊登嗰篇影評o既youtube版本. 諗唔到呢條片咁多人睇, 頗感意外.

Definitely, Maybe

我一向都鍾意睇動作片，恐怖片，殺人片，鬼片，好少睇Romance Comedy，不過都有例外，例如Jerry Maguire就好鍾意，時常翻睇，另一例外就係呢齣Definitely Maybe。主角係Ryan Reynolds，自從睇過佢做Van Wilder之後就一直都鍾意睇佢，因佢好樣得o黎又幾搞笑。呢齣戲入面，由頭到尾都係關於佢，話說佢係一個正在辦離婚o既人，有個女，有晚個女逼佢講點樣發展到同佢個媽咪結婚，所以佢就開始講佢後生o既故事，有三個女人對佢都好重要，但係就唔會講邊個先係佢後來個老婆，叫佢個女自己估，有 d 似愛情版本偵探小說。





其實個故事講乜都唔係好重要，而事實上，個故事本身亦唔係突出，只不過其中夾雜好多男主角多次夢想被打破，o係好多事上"退而求其次"o既經歷，幾真實。呢齣戲最吸引我o既係 d 角色，除o左我本來就鍾意o既男主角外，佢個女亦非常討喜。須知道我一向都好憎細路，但係演呢個細路o既Agibail Breslin相當唔錯，完全冇細路演員扮 cutie o既舉止，同埋全片最抵死o既對白，都集中o係呢兩父女上面，例如﹕

Will Hayes: I had two serious girlfriends... and then some other smattering of other women.
[Maya looking strangely at him]
Will Hayes: What?
Maya Hayes: What's the boy word for 'slut'?
Will Hayes: They still haven't come up with one yet. But I'm sure they're working on it.

不過全片最突出o既係3個女仔中其中o既April，呢齣戲係我第一次見Isla Fishero既演出，做得非常好，同男主角之間 chemistry 相當不俗，又 sweet，又真正關心個男主角，完全可以感受到佢地之間若即若離o既感情，由佢演3個女仔中o既"真愛"非常有說服力，比著我都會最鍾意佢。其實我覺得佢之後做購物狂o個齣亦不錯，不過比起 Definitely, Maybe 中o既演出，係差幾皮。

Elizabethtown

好多年前已經睇過, 最近由於搬屋, 冇咗internet所以生活冇晒趣味, 得閒過頭, 所以攞返出嚟睇. 雖然好多人話唔好睇, 比起導演o既前作大為不如. 我都覺得冇Jerry Maguire咁經典, 不過都唔係差, 雖然對白同情節都欠缺重心, 但係由於男女主角我都覺得算討喜, 所以呢齣戲我其實係相當鍾意, 尤其係女主角, 因為我一向都唔鍾意蜘蛛女Kirsten Dunst, 但係喺呢齣戲入面, 我覺得佢好正, 簡直係 dream girl.







我最鍾意嗰幕係男女主角當時未熟, 不過有一次講通頂講電話, 索性順便約埋去睇日出, 好有feel, 我覺得咁安排幾好, 比起就咁"一見鍾情"式睇上眼更有說服力, 雖然都係快, 不過起碼觀眾睇得出呢兩個人係幾夾, 至少有做好朋友o既潛質, 所以撻著亦在情理之中.







導演Cameron Crowe電影入面o既女性形象都好正, 例如Jerry Maguire入面o既Dorothy Boyd, 樣又cute, 性格又好, 喺個男仔處於低潮o既時候講埋 d 勵志金句, 而Elizabethtown入面o既 Claire 亦一樣咁完美, 雖然係唔真實, 不過睇戲 je. 例如呢一幕, 個男主角搞老豆葬禮搞到一頭煙, 個女仔就適時以一個好鬼馬o既形式出現, 話: "How can I leave you in distress? I'm taking you out." 真係仲美好過睇格林童話.



另一幕我好鍾意睇o既就係女主角朝早走嗰時特登搞到好嘈, 想個男主角起身留佢食早餐之類, d 小動作好搞笑. 雖然個女主角贏晒, 不過齣戲本身係有多少令人失望, 完全冇Jerry Maguire嗰種令人睇完覺得有所得著, 精神一振o既感覺, 除咗Claire嗰部份之外, 故事幾條線都唔算好吸引. 不過當然, 我都係會推介值得一睇.

PGA College & Theological Seminary

我好似冇喺度提過, 幾個月之前, 我開始喺Surrey一間學校度教聖經科, 佢地只得幾個學生, 全部都係英文唔係好叻, 但係對聖經科好有興趣o既韓國學生. 初初我都唔係好鍾意喺度教, 人工超低, 每堂教3粒鐘, 不過後來同班學生熟咗, 覺得佢地好用心, 就覺得教下都無妨. 而且由於間學校長期冇人肯幫佢地教書, 所以個校長當正我係神咁拜, 我同d學生有時走入佢間office度偷佢 d 杯麵食都得, 佢又叫我做"professor", 雖然只係一個冇任何實質意義o既title...

我第一次教Intro to the OT, 後來又教NT Background, Psalms and Wisdom Lit., 下年會教Synoptic Gospels, 應該都會幾好玩. 同埋我上個月同個校長講, 我要加30%人工, 佢苦起塊面話好窮, 講一大輪, 然後加我20%...唉, 好過冇啦.

我都好希望呢間學校可以搞得好d, 多d學生, 第日喺度打份全職文員工都好, 但係個牧師校長唔似做嘢好叻o既人, 亦唔似有魄力搞起間學校, 所以睇怕都係冇乜前途, 只可以當玩下攞下經驗.

[兒童不宜] 讀聖經, 學希伯來文粗口