Super Dead Air

上個星期日突然發覺屋企附近有一間廣東話教會有早堂崇拜的, 所以去試下. 雖然崇拜步驟不多, 時間都已經不算很長, 但係呢間教會尐人似乎很愛拉布, 令到我真係超眼瞓, 好辛苦.

個領詩祈禱都祈成五分鐘, 長氣到hihi, 個牧師仲勁, 佢講道內容冇乜問題, 因為超簡單, 接近冇乜內容, 基本上就係你死後想人點記得你, 但至少不是差的內容啦. 但最大問題係, 佢喺報告嗰時說話語速很正常, 但係一到講道, 就突然變"深情mode", 語句極短, 但係每一句語句之間有好大一段dead air. 講道嗰時, dead air有時候係有用的, 無聲亦可以係吸引注意力的一種方式, 亦可令人有思考空間, 但係每一句說話之間都是dead air就令人很難受, 超辛苦. 假設佢講咗30分鐘道, 即是有15分鐘是冇聲的dead air. OMG.

所以完咗之後要去喜相逢食個焗飯回下神 sosad. 我估佢換咗廚房, 個焗葡汁雞扒飯唔同晒樣, 但係好好食喎, 尐汁依然係好o岩味.

The Grand Budapest Hotel

出乎意料之外, 我睇過2014頭半年最好的戲竟然係呢齣. Wes Anderson之前的Moonrise Kingdom我亦覺係好戲, 同呢齣一樣咁靚, 不過好睇得嚟娛樂性唔算很高; 呢齣Hotel就真係百份百完整, 每個畫面都高度漂亮, 主角兼配角全部都很令人鍾意, 大量寫得極好的對白, 故事曲折有追看性. 我覺得係技巧, 美感表達, 娛樂性兼備, 真係好犀利, 極少有電影喺屋企睇, 我係連一個鏡頭都唔敢望第二尐嘢而錯過, 呢齣就有咁大吸引力. 

結尾我甚至覺得很感人, 因為Bellboy同佢女友, 同佢老師之間的關係很真摰深刻, 主要由於對白寫得好. 

For my dearest darling, treasured, cherished Agatha whom I worship. With respect, adoration, admiration, kisses, gratitude, best wishes, and love from Z to A.

The Edge of Tomorrow

Tom Cruise新片係一定要去戲院睇的, 所以星期六完咗honey的節目後, 就撲出去食咗個日本放題, 因為唔食壽司真係會身痕. 去睇戲是開心的事, 但係呢齣戲喺溫哥華的大戲院竟然冇2D版本, 只有3D或3D IMAX, 真係好離譜. 

我覺得The Edge of Tomorrow齣戲本身很好睇, 但係3D令我很失望, 而且我係睇3D IMAX, 更加貴, 更加令我憤怒. 呢齣戲根本就唔適合做3D, 第一佢唔需要3D, 第二佢好明顯唔係為3D而拍, 色調係唔o岩的, 好多幕係出大太陽, 但係戴住對低B 3D眼鏡, 依然係暗暗地, 令人感覺難受. 動作場面很刺激, 不過同樣唔係為3D而設, 畫面超級快速, 放喺3D上, 畫面就亂到阿媽都睇唔切, 讀到博士個腦都運作唔到咁快, 根本唔存在乜嘢景深景淺的問題, 乜都睇唔到, 浪費晒尐精彩動作拍攝. 結論: 3D吔cake啦! 根本上就係電影界o既毒瘤. 

但如果純講齣戲, 我覺得是很正的娛樂片, 劇本步伐安排得好, 每次開始覺係咪在重複的時候, 就突然加入少少新的元素, 扭一扭, 由頭到尾都在推展當中, 唔係隨便寫寫就寫到出來的, 係精心設計. Tom Cruise真身很痴線, 但係做戲都係好好睇, 真係動作片嚟, 冇花冇假, 有些加強電影娛樂性的笑位, 佢亦都做得到, 令到呢個講死亡同世界末日的故事不會過度灰暗絕望. 最驚喜是Emily Blunt, 之前已睇過佢其他做主角的戲, 好奇怪點解咁樣衰都做到女主角, 但呢齣戲令我改觀, 造型設計型爆, 但又不是男人婆, 保持女性媚態, 好適合佢做, 加好多分.

七月轉工?

上個星期五係第二次的interview, 過程很順利, 嗰邊的代表話星期一要再去見埋個終極大老闆, 但係星期一大家都冇聯絡, 到夜晚收到 email 話佢地太忙, 未有時間傾, 所以星期二先同老闆約時間. 點知到星期二下午, 突然收到電話, 話已經決定請我, 連老闆都不必見了, 七月開工, 突然咁快手 sosad.

但係目前其他嘢我都唔知, 只知人工比之前高. 我希望仲有其他各樣 benefits 啦, 唔係人工高咗都唔係高咁多. Anyway, 我估, 應該會七月轉工吧?

魏如萱旳記憶力...

Post by Andy Chi Kit Wong.

Sea to Sky

今日好好天, 反正五點幾醒咗, 趁機揸車去坐Sea to Sky Gondola, 周圍行下, 有風景睇, 有行山徑, 個零鐘車程, 都唔係好遠. 由於我9點已經去到, 冇乜人, 好多免費泊車位, 由Shannon Falls行到過去都係十零分鐘, 喺樹林入面行好舒服, 好涼爽, 聽住歌嚟行唔覺得攰.

唯一唔好, 係喺某個地方睇風景時, 有個阿伯用電話開speaker嚟聽張學友, 係咪痴線o架?