玩到尾o既 RPG （8）: Suikoden Tierkreis

一向都好鍾意水滸傳系列, 因為一向都係故事性強, 同埋一手一腳由冇人冇物玩到成為一支義軍, 好有滿足感. 呢隻喺 NDS 上面o既水滸傳, 都有少少呢種 feel, 都係講社會不公, 令到一班人要反一個權力. 但係有幾點我覺得不滿:

首先, 喺玩法上, 水滸傳系列一向都有種大局觀, 會 feel 到真係成千上萬人為你上戰場打仗, 但係呢隻新 game 冇晒打大仗o既玩法, 次次都只係好似一般 RPG 咁隻揪隻, 次次出戰都只係得幾條友. 好冇癮.

其次, 雖然個故事算好成熟, 但係唔知點解凡係喺 NDS 上面出o既 RPG, d 主角就總係細路樣. 今集個主角就只得十三歲, 而故事做到成班英雄好漢無厘頭會以呢個細路為首領, 真係非常難以令人入信, 好難玩得投入, 假到爆.

最後, 故事推進比較單調. 水滸傳系列 d 故事一向都好多 twists, 但係今次就較少, 冇乜邊一 part 特別深印象.

總結, 雖然我係有玩到尾, 但係呢隻唔算係好o既 RPG, 最令人不滿o既係 NDS d game 成日無厘頭將 d 角色低齡, 低B化.

inFAMOUS

早兩個禮拜爆咗 PS3 上o既一隻新 game, 叫 inFAMOUS. 我屋企有好多 game, 多數都係冇玩到尾, 而呢隻會玩到爆機, 就證明其實我都幾鍾意玩. 畫面, 音樂, 玩法, 同故事我都覺得好好, 玩到尾嗰時, 覺得非常期待下一集, 想知道故事發展落去會點.

玩法有 d 似 GTA, 你可以去邊都得, 做乜都得, 你有超能力, 可以控制電. 玩法我覺得同 Prototype 好相似, 不過畫面靚好多, 故事同角色亦有趣好多. 唯一唔好係 d mission 唔夠多元, 好多重複. 喺我心目中, 喺 PS3 上面o既最愛依然係 Uncharted 同 MGS4, 但係呢隻亦唔錯, 絕對玩得過.

mihimaru GT: とろけちゃうダンディ~

mihimaru GT 喺繼上次 Switch 後, 一個月內又出咗隻新 single, 不過今次隻歌我覺得好聽好多. とろけちゃうダンディ 係 party 歌類, 雖然唔係佢地最好聽作品之一, 但係我都鍾意聽. 個 MV 亦拍得幾抵死, 有返佢地比較早期嗰種玩嘢 feel.

mihimaru d 歌係多多益善, 越多越好. 期待佢地下一隻碟.