Saturday 27 February 2010

上網公司



之前喺 Ontario, 都係用 Bell o既 DSL 上網, 但係當時就已經聽講過 TekSavvy 係一間好好多o既公司. 返到嚟 Vancouver, 我就開始用 TekSavvy, 因為 Shaw 同 Telus 都冇無限頻宽, 用到 60-100 GB 咁上下, 就會 cut 你, 好麻煩. 而 TekSavvy 就價錢差唔多, 但係用幾多都冇所謂, 理論上, 一個月可以用 200 GB, 如果俾多十蚊雞就可以變無限, 但係我其實每個月都一定用多過 200 GB (因為最近好多新 game 出), 佢地都冇出聲. 速度正常. 同埋以我個人經驗, 電話服務 d 人相當有禮, Bell/Telus 班不該差好遠.

唯一唔好就係因為 TekSavvy 其實都係用 Telus d 工具, 所以當 setup o既時候, 其實係要透過 Telus 嚟做, 而 Telus 就會玩嘢, 拖遲 d 嘢嚟做, 簡單事情複雜化, 令 d 無知o既人以為係 TekSavvy o既服務差. 賤到無倫. Telus 同 Shaw 一向都係獨大, 玩晒, 所以不管服務質素幾差, 溫哥華居民都要忍佢, 雖然 TekSavvy 喺 set up 嗰時有可能會麻煩少少, 但係都唔要用 Telus/Shaw, 作為抗議.

Wednesday 24 February 2010

痞子蔡: <鯨魚女孩‧池塘男孩>

鯨魚女孩‧池塘男孩

http://jht.pixnet.net/blog/post/30473052

剛剛完成溫哥華冬奧嗰份工, 係一個好搞笑, 好奇特o既經驗. 雖然比預計中少賺一千蚊, 但係都唔係好緊要, 本來有嘢做就係額外, 應該覺得感恩先係. 而家先休息幾日, 之後就將成個經驗寫出嚟, 做個紀錄.

難得o既係, 一開始失業, 就開始有好多嘢玩: Heavy Rain 已經出咗, Final Fantasy XIII 就快出, 而今日又突然見到痞子蔡有新書出... 咁多好嘢玩, 所以都唔會覺得好落寞.

Monday 8 February 2010

Adventureland

有 d 電影, 雖然唔係特別好睇, 但係唔知點解會特別鍾意. 早幾日睇到一齣我覺得唔算係好特別, 但係我自己就好鍾意o既電影, 叫 Adventureland. 幾日前睇咗另一齣我好鍾意o既戲, 叫 Zombieland (第日再寫), 好鍾意入面個男主角, 所以順便睇埋佢o既另一齣新戲, 就係 Adventureland. 本來以為係好似 Euro Trip 之類o既青春喜劇, 但係其實故事相當成熟寫實, 甚至有少少負面.



我好少特別鍾意邊個男演員, 但係呢個我鍾意. 故事講佢係一個讀比較文學o既人, 考咗入哥倫比亞大學o既研究院, 但係唔夠錢去讀, 想搵暑期工又乜都搵唔到, 最後去咗一個遊樂場做嘢, 齣戲就講佢呢段時間o既經驗. 唔使多講, 知我背景o既, 都應該能夠明白點解呢齣戲一開始我就睇得投入, 因為主角嗰種迷失 feel, 我真係身同感受. 其實故事冇乜大上大落, 平平咁講到尾, 但係我就由頭到尾都唔覺有任何一刻悶場. 睇個主角最後終於去咗 New York, 雖然唔係佢計劃咁發生, 但係都為佢高興.



另一個我好鍾意呢齣戲o既原因係因為佢o既音樂, 個導演選 d 歌真係好好聽. 呢齣戲個 setting 係喺 80 年代, 所以個故事有講到對草, 連反猶主義都有講到, 但係最能夠突出 80 年代 feel o既, 始終都係 d 音樂.



除主角外, 其他幾個配角我都鍾意, 其中最正就係呢個食煙斗, 讀俄羅斯文學而失戀又失業o既 Joel, 佢不時講 d 好正o既金句, 又係主角o既益友, 好正. 做靚女 Lisa P. 嗰個女仔亦幾靚, 有說服力, 後來睇返, 先知原來呢個就係喺 The Invisible 入面做 Annie 嗰個, 當時就已經覺佢靚. 以下係其中一段我最鍾意o既對白, 我打算背起佢, 將來人地問到, 我就照答.

Sue: What are you majoring in?
Joel: Russian literature and Slavic languages.
Sue: Oh wow, that's pretty interesting. What career track is that?
Joel: Cabby, hot dog vendor, marijuana delivery guy.

Wednesday 3 February 2010

12 Angry Men



最近溫哥華冬季奧運嗰份 x-ray 工開始咗, 所以都冇乜時間寫嘢, 不過今日難得放假, 又有精神, 就講下最近睇過一齣我覺得好正o既舊片, 叫十二怒漢. 差不多成齣戲就由十二個人做晒, 場景亦主要只得一個, 就係一間房, 但係齣戲由頭到尾都好刺激, 絶無冷場, 真係神乎奇技.

故事講到有個由十二人組成o既陪審團, 要決定一宗殺人案o既 suspect 係咪有罪, 而結果一定要十二人都同意先可以成立. 故事開始嗰時, 本來十二個人當中有十一個人覺得立即就可以達成一致意見, 定個人有罪, 但係其中一個人覺得有花多少少時間討論o既必要, 而成齣戲, 就講如何由一個人覺得要判無罪, 變成十二人認為要判無罪, 當中過程好好睇, 雖然只係得把口講, 但一 d 都唔悶. 而我最鍾意o既地方, 就係嗰十二個主角, 到齣戲完o既時候, 會覺得對佢地每一個都相當熟悉, 雖然話"主角"係當初力排眾議嗰個人, 但係都唔係佢一個人玩晒, 因為佢都有盲點, 其他成員都不時有 d 精明o既發現, 好多角色都有表現o既機會.

總結: 連我呢種只鐘意睇動作片/恐怖片o既人都咁鐘意睇呢齣全無動作, 只有對白, 場景簡單o既電影, 算係一個異數. 大力推薦, 應該必人都會鐘意睇.