Wednesday 30 April 2014

聽歌聽到手軟



今日發現嗰個女仔Fran, 真是很有才華, 作曲作詞都係佢自己寫的, 而且唱腔很有味道, 非常好聽, 佢嗰隊法蘭黛樂隊有很多好歌, 例如呢首寵. 不過最驚人的, 係CD雖然好聽, 但係當我聽佢唱live...



...就更加有味道! 雖然收音不好, 但係把聲真係令我聽到手都軟埋, 加上佢站姿, 扭下扭下, 真是很有feel.

Tuesday 29 April 2014

很攰

今日返工很攰, 上司放了假, 交低佢的工作俾我跟進, 但係有預想之外的情況, 多咗好多佢完全冇教過的嘢要做, 但是要搞掂的嘢就要搞掂.

返到屋企, 本來應該準備今個星期日講道的, 已經星期二, 連經文都未選定, 耶教異聞錄唔知講乜好, 但係很攰, 不想用腦, 心情不好, 所以唔餓都煎碟鍋貼食, 浪費一些時間, 跟住戴住headphones, 開大聲聽法蘭黛樂團, 會令自己開心一點.

Robocop



今朝六點就醒咗, 直頭夠時間開齣新齣睇, 最後睇了新的Robocop. 其實以重拍片嚟講, 都算不錯啦, 故事人物同舊版都有很大出入, 不會覺得白白又再翻拍多次, 不會很悶, 又唔係好好睇, 中中間間咁. 但我最不滿係配樂運用, 舊版最突出就係個招牌melody, 很型很熱血的, 但新版只用個melody一兩次, 而且連十秒鐘都不足, 真係好鬼浪費. 

Fran - 我不等



雖然呢一個月都冇得聽魏如萱節目, 但突然想起, 喺網上有佢之前做節目播歌的playlist, 所以我喺度聽返佢以前播過的歌, 有好多未聽過, 又很好聽的, 例如呢隊法蘭黛樂團同埋個女主音, 尐歌的歌詞寫得很好, 亦唱得好聽.

Her



差點就喺香港睇咗, 而家我覺得有點後悔冇喺大影幕睇, 成齣戲都拍得很漂亮, 明明只係實景, 但係成功出到多少未來feel, 很奇幻. 本來聽故事簡介, 話同個電腦program拍拖, 一個男主角做晒成齣戲, 估佢實悶到抽筋, 但其實唔係, 片長兩小時, 我覺得連一分鐘悶場都冇, 每一刻我都想追睇落去, 其實很有娛樂性. 唔係話故事很曲折, 或者有大道理, 純粹係畫面靚, 演員出色, 對白寫得好, 令整個睇戲經驗覺得很愉快, 一些回憶關係破裂, 或者想念的幾幕, 亦很有feel, 但是不濫情嗰種.

我最喜歡的是對白, 因為齣戲主要就係男主角同個電腦program透過對話建立感情, 對白寫得極好, 非常漂亮, 所以我覺得, 呢段感情其實是成立的. 我快手抄低了幾句, 如果有任何人, 同我咁傾計法, 無論佢喺邊, 見不見到佢, 我都會鍾意佢:

"Sometimes I think I have felt everything I'm ever gonna feel, and from here on out I'm not gonna feel anything new, just lesser versions of what I've already felt."

"It was exciting to see her grow and both of us grow and change together. But that's also the hard part: growing without growing apart or changing without it scaring the other person."

"I keep waiting to not care about her."

"You know, I can feel the fear that you carry around and I wish there was something I could do to help you let go of it because if you could, I don't think you'd feel so alone anymore."

Monday 28 April 2014

試新壽司

前日行出街食嘢, 經過一間壽司店, 看似是抵食夾大件 (但不好食) 嗰種. 尋日星期日雖然朝早已同老豆飲茶, 但夜晚一個人在家實在太悶, 所以都搵尐嘢搞, 出去買咗個壽司combo試下, 價錢同我一向食開嗰間劣質壽司一樣, 但竟然更加大件! 真是令我好震驚. 味道就OK啦, 不是好食, 又不難食, 不過係將來想食壽司時, 另一個選擇.

臨瞓前的playlist



喺電影《High Fidelity》入面, 主角鍾意坐喺屋企錄錄音帶送俾人, 我唔係十分鍾意齣戲, 但覺得這件事很有格調, 可惜我屋企冇卡帶錄音機. 不過尋晚心血來潮, 突然想整個可以夜晚瞓在床上聽然後瞓著的playlist, 用電腦整, 但堅持一邊聽一邊錄音的方法嚟整, 咁對我嚟講先係一個完整的經驗, 雖然音色差咗.

開頭兩首歌不是瞓覺音樂, 不過我認為平日聽太多拾音社又或者TVB膠劇主題曲垃圾旋律, 開頭需要些有beat的歌洗一洗腦, 忘記尐港女K歌, 跟住先可以好好聽清後面的歌. 故意避過歌詞呼爺喊娘的苦情歌, 臨瞓就好好relax, 不必連聽歌都濫情. 雖然係瞓覺歌, 不過唔係透過專搵些悶到抽筋的歌聽嚟瞓著, 都是我自己覺得好聽的歌.

下載

Password = howtindog

魏如萱, 我愛你

雖然我為人很冷淡, 不過其實我係會陪朋友的人, 我認為是自然定律, 就好似尐畜生咁 sosad, 一生就成十集八集甚至上百隻仔女, 死咁幾個都不會珍惜, 但係如果只生一兩隻仔女, 就會好保護, 而我係很少朋友的人. 但是我心情不 high 的時候, 通常我是自己處理, 不會有人陪我的. 但係最近心情覺得悶嗰時, 剛好就係我發現可以聽魏如萱節目的時候, 聽佢節目都為我花費了很多個小時, 加上佢聲音活潑, 令人感覺開朗精神, 某種意義上, 佢係陪伴我的人, 真是好. 不過佢開始請假一個月做演唱會, 叫我日子怎麼過? sosad



Sunday 27 April 2014

飲早茶

尋晚有點特別, 我只能講, 我覺得自己真係很好人 sosad, 不過亦令自己今日精神不好, 超眼瞓. 心情亦有點不好, 雖然同我沒有直接關係, 但是聽到別人的故事, 會影響到我情緒的. 雖然其他人都覺得, 我係唔理人, 不受人影響嗰種性格, 其實只是表面, 我反而覺得自己太易受人影響就真.

準備朝早瞓幾粒鐘嗰時, 就接到老豆電話, 叫我一齊去飲早茶. 為了免費食一餐, 我真是一直在玩命, 很攰都揸車上山.

花車


我住嗰度雖然幾靚, 成條街都係櫻花樹, 一眼望過去都係一遍粉紅. 不過年年都搞到架車滿晒花瓣, 其實很麻煩的, 如果不立即掃走, 一乾咗, 會黐住架車黐得好實, 要用硬物去用力括先會甩, 好大工程的.

Saturday 26 April 2014

粉紅色街道

最近屋企門口開咗好多櫻花, 一陣風吹過來, 灑滿一地花瓣. 感覺上幾好睇, 不過我是鐵錚錚的硬漢, 呢尐咁嘢不會令我心情變好, 所以都是廢的.

星期六很無聊

又係未到六點就醒咗, 所以晨早出去買個麥記早餐食, 跟住做HowtinLive, 心情有點鬱悶. 不過我的性格係, 心情愈不好, 愈想做點嘢出嚟, 證明自己可以正常運作.

到三點幾, 很好太陽, 就出去周圍行, 去一間未試過的餐廳食咗個焗飯. 價錢正常, 份量算細, 但係焗得幾好食, 飯粒好好咬. 返到屋企實在太無聊, 剪咗堆頭髮. 而家先至6點, 仲有6個小時要挨, 今個星期六先算完結.

仲未死


Thursday 24 April 2014

Shuhei Yoshida + Mark Cerny



I never realized that these two guys are such fun personalities. They're funny. It's a great interview.

新眼鏡

我而家戴緊嗰副眼鏡真係抵買, 戴咗至少有八/九年, 依然狀態良好. 其實之前我喺McMaster做嘢, 可以免費買一副眼鏡, 嗰時買嗰副到而家都未用過, 仲搬屋搬到唔見咗, 而家搵唔返 sosad.而家明報每兩年可以買一副$300的眼鏡, 嗰日出去求其搵一間眼鏡舖, 我同個姐姐講, 我有$300, 佢就幫我整副$300的, 都唔理佢有冇賣貴, 反正保險俾, 總之免費又好戴就得. 今日去攞, 戴得很舒服, 幾好睇. 跟住反正都出咗街, 順便買盒劣質壽司食. 都係搵下嘢搞咁啦.

[娃娃推介] 小人 - 1/2



嗚呀, 原本以為今個星期唔會有魏如萱聽, 點知今朝六點半醒咗有得聽! 意外驚喜.

Wednesday 23 April 2014

搵嘢嚟搞

嚴格上嚟講, 其實冇嘢發生喺我身上, 但係以前做過心理測驗, 聽講我呢類人, 會很敏感地幻想到令自己情緒低落. 呢兩日就是這種情況, 所以雖然唔肚餓, 但都搵嘢搞下, 煎鍋貼食, 睇TVB膠劇, 過下日辰.

我的日子怎麼過?

成個星期都冇魏如萱節目聽, 生活變得很空虛 :(

Tuesday 22 April 2014

Enemy (2014)



我屋企有好多嘢可以睇, 有愛我請留言, 有Sherlock, 有Game of Thrones, 但係既然呢齣戲有男神Jake Gyllenhaal同女神Melanie Laurent, 首先睇咗先. 點知齣嘢真係好痴線, 故事冇頭冇尾, 唔講求故事合理, 而係純粹要觀眾"感受"嗰種無厘頭戲, 所以連故事都費事喺度summarize, 講都sai氣. 故事有等於冇, 節奏緩慢, 睇到R頭. 唯一亮點係幾個演員, 做大肚老婆的Sarah Gadon非常不錯, Melanie Laurent沒有表現機會, 但有露點鏡頭, 男主角一人做兩個角色, 做得很好. 話好睇嗰尐人, 根本上只係懶有品味, 唔明扮睇得明. 痴孖筋.

Saturday 19 April 2014

娃娃唱廣東話




魏如萱喺節目度用廣東話唱歌, 真係好搞笑. 得意唔係因為唱廣東話, 而係佢9嗌咁唱, 完全不顧自己歌手形象.

自己同自己玩

今日精神不錯, 瞓到七點幾先醒, 至少起床嗰時已經有少少太陽. 今日的HowtinLive四目膠頭同無敵神駒都打上來, 是開心的時間.

但係, 同時又覺得, 有時人會因一些小事搞到很大鑊, 真是令人深感厭煩. 自己一個出街食個焗飯, 飲奶茶, 睇睇書, 跟住坐喺床睇NBA, 咁先最安樂開心.

椰子味

青蘋果嗰支沖涼液終於用完, 下一支轉用椰子味, 好香, 有咖喱牛腩飯的風味.

Friday 18 April 2014

放假一日

今日放假6am就醒咗, 剛好可以聽娃娃音樂節目直播, 今日好正, 佢真係好搞笑. 跟住中午買sushi食, 間嘢之前休咗一排, 但今日佢漏我單, 又差尐找少$10, 不過我冇俾個靚女侍應迷惑到, 還是義正辭嚴地要返佢$10 sosad. 不過, 坐喺床食sushi, 飲花茶, 睇TVB膠劇, 是很relaxing的. 跟住聽住笑死朕瞓個晏覺, 精神尐今晚錄<異聞錄>, 今日是好日.

屋企門口




一個月零一日


Thursday 17 April 2014

假期晚餐

為慶祝long weekend開始, 今晚決定食晚餐, 自己煎, 冇落油, 好健康的. 聽日中午已經訂了食sushi, 嗰間cheap嘢已經一排冇食, 有少少懷念.

[娃娃推介] Fall Out Boy - What A Catch, Donnie



好聽

聽見下雨的聲音



本來我不打算睇的, 但係尋日落雨, 突然抽起條根想睇 <聽見下雨的聲音>, 之前導演方文山話會以詩的意景嚟拍齣戲, 我已經覺得佢死硬, 出道作就搞埋尐咁o既造作嘢, 所以係以零期待心態去睇齣戲, 結果比我想像中可以接受.

我肯去睇, 其實係睇在女神徐若瑄同支持魏如昀份上, 可惜佢地兩個都戲份不多, 魏如昀嗰首主題曲喺故事入面根本上係冇角色, 連唱出來的機會都冇, 只係片尾聽下. 徐若瑄就好正, 超靚, 真是100分. 最有驚喜係徐嬌, 輪廓幾靚, 完全聽唔出大陸鬈脷國語, 而且非常好戲, 尤其有兩場戲, 佢鬧男主角同埋見家姐彈琴嗰度, 眼淚係慢慢流出來, 表情內歛, 很厲害, 成齣電影最好戲係佢. 最多戲份的男主角柯有綸反而非常麻麻, 擔唔起咁多screen time, 表演誇張, 睇得多就煩. 我唔憎佢, 我好鍾意佢尐歌的, 例如戲入面嗰首<故事畫面>就好好聽, 但做戲真係唔掂.

故事係講得清楚的, 唔係方文山之前講到咁有「詩意」, 問題係故事集中喺男主角身上, 但男主角唔好睇, 故事講校園比賽, 有少少熱血 feel 的, 但係柯有綸同徐若瑄都幾廿歲, 搞校園熱血真是沒有感覺. 三角戀亦怪怪地, 呢個講下嗰個講下, 感情很淡, 兩頭唔到岸, 是不好睇的感情故事. 另一大問題係方文山想為電影加入詩意, 成日加入些影景的鏡頭, 畫面出現一些詩句, 其實都可以的, 但係融入得不好, 現實就係齣戲兩個小時太長, 一係 cut 走這些扮嘢鏡頭, 或者大手 cut 走一些故事, 例如女主角醫耳仔嗰段, 真係使唔使咁詳細呀?

Wednesday 16 April 2014

魏如萱 - 好嗎好嗎



魏如萱呢排完全唔得閒做節目, 正在準備出新碟《還是要相信愛情啊混蛋們 》. 新碟入面將會有呢首歌, 實在太好聽, 歌詞很正, 很有 feel.

========
送一個禮物不如寫首歌給你
至少裡面都是我們的畫面
數不清吵吵鬧鬧和哭腫的雙眼
當然有我們最快樂的那天
喜歡故作堅強裝得無所謂
要是一天忘記了怎麼辦
要把對你的愛大聲唱出來
一直唱一直唱還要一起唱

看你看的書 聽你聽的歌 喝你喝的湯 想跟你一樣
穿你的衣服 走你走過的路 幻想一起走 到忘記了孤獨

生命的默契不就是這樣 無論在哪裡一樣互相牽引
如果有一天 離得好遠好遠 記得這首歌 好嗎好嗎
這是我們的 好嗎好嗎

The Way



尋晚睇咗齣冇乜人睇的戲, 叫The Way, 主角有Martin Sheen, 老戲骨唔錯, 其他幾個配角亦唔差, 係個女配角樣衰尐, 故事講主角死咗個仔, 想幫個仔完成心願, 行完整個El Camino de Santiago旅程. 齣戲就唔算係好精彩o架啦, 對白寫得不算精練, 劇情平淡, 最大問題係太長, cut 短半個鐘可能更好. 不過, 好處是不玩煽情, 都係一齣輕輕鬆鬆, 睇得舒服的戲.

呢個聖雅各之路係真有的, 我係因為對呢條路有興趣, 所以先去搵齣戲嚟睇. El Camino相傳係以前的朝聖之路, 以Cathedral of Santiago de Compostela為終點, 起點可以喺任何地方. 最多人行的路線, 由法國邊界出發, 由東至西橫跨西班牙, 行到去目的地有800km路程, 約需要行30日時間. 行朝聖路o既人會有證明文件, 經過中途站會打印證實到過, 沿途可以好平有住宿床位.

我沒有事業的, 但將來如果我想要做一件好瘋狂的事o既話, 呢件事會係首選之一.

Tuesday 15 April 2014

Stephen A. 節目中 KO 聽眾

我最鍾意聽的網上節目主持, 唔係黃毓民, 亦唔係黃洋達, 而係爆 seed 王 Stephen A. Smith. 佢語氣很有獨特風格, 爆 seed 嗰時勁度十足, 而且一口漂亮英語辭彙, 真係好好口才. 今日佢喺節目度鬧爆個踩場聽眾, 好好笑:
http://espn.go.com/espnradio/play?id=10786341&s=espn

同場加映, Stephen A.狂插New York Knicks:
http://espn.go.com/espnradio/play?id=10677128&s=espn

Monday 14 April 2014

阿伯的放蕩夜生活

一個獨居阿伯, 夜晚喺屋企, 有咩嘢好做呢? 正解: 飲茶.

Oh夜DJ 魏如萱瘋狂表現 sosad



Sunday 13 April 2014

星期日浪費時間三步曲

今日天氣很好, 非常難得, 所以決定出去行下, 縮喺屋企太可惜了. 不過好想再食嗰個土豪便當, 所以第一站都係去三味食堂食飯先, 間嘢真是好食, 而且好少人去.
食完飯去碼頭行下, 吹下風. 本來去到碼頭, 傳統上應該食下Fish & Chips, 不過實在太飽, 同埋好多人, 懶得排隊, 所以冇食到.



返到屋企, 太多時間唔知點浪費好, 所以沖杯Chemex咖啡飲, 真是特別好味, 而且唔苦, 真係好神奇. 今日出街, 見到的bluray set半價, 買咗, 考慮今晚睇, 不過亦有可能睇Nicolas Cage嗰齣, 聽講都唔錯.

Saturday 12 April 2014

不知不覺又一日

又係瞓得很差的星期六, 半夜四點就已醒咗, 幾經碌床先再瞓得返, 但係七點又再醒, 跟住等到九點開始做Howtinlive, 到做完同埋upload晒尐files, 都已經一點幾.

頭暈暈, 又唔知有乜做好, 所以迷迷糊糊就瞓著咗, 直至四點幾, 跟住去老豆屋企食飯, 返屋企做少少運動, 沖涼, 都已差不多瞓覺了, 咁又一日. 我的生活真係好無聊, 很墮落.

周末換水

又到周末換水時間, 依然很綠. 其實溫哥華陽光都唔多, 難得棵嘢可以頂到咁耐, 好勁.

麥記 $1 iced coffee

每年夏天,麥記都會有$1的iced coffee, 好正. 尋晚又4am扎醒, 我估碌咗一個鐘之後有瞓返, 不過到六七點, 終於都係醒晒, 所以食返個麥記早餐, 做howtinlive之前精神下. 今晚約咗老豆食飯, 所以唔會食lunch, 咁食個早餐都好.

Friday 11 April 2014

花茶禮物

今日喺公司收到箱嘢, 入面有花茶壼同幾包茶, 真是驚喜. 係金德寶送的, 很多謝佢, 成日都在tum我.

而家幾乎每個星期五晚都係錄<耶教異聞錄>的時間, 因為我想空個星期六晚出嚟, 有時老豆會約我去佢屋企食飯, 一星期一次, 唔想為咗錄節目而少見咗老豆. 今晚錄得頗順利, 睇 <蒙大恩的女子 未婚麗人祈禱手冊> 的內容, 本嘢真係好癲, 聖經亂quote, 而所謂的見證故事, 其實係個逼婚的鬼故嚟, 令人心寒.

[娃娃推介] Sixpence none the richer - Don't dream it's over



我本來就好鍾意Crowded House的原版, 首次聽到首歌係喺電影Adventureland入面, 嗰幕幾個主角喺度睇煙花, 很有 feel. 剛才聽娃娃節目, 佢播咗個我冇聽過的翻唱版本, 估唔到亦很好聽, 女聲有唔同的味道, 但一樣好聽.

有食晚餐!

雖然我肥屍大隻, 不過其實我生活習慣係一日食一餐, 只食lunch, 非常節儉. 都唔係刻意唔食, 只是唔覺肚餓, 自然就懶得搵嘢食.

但係尋晚有食晚餐, 因為出去買咗對earphones, 咁反正都已經出到去, 就順便食埋嘢, 薯條、炸雞脾、凍奶茶, 真是無敵組合, 又冇益又好味, 超正.

Wednesday 9 April 2014

有返節目聽了!


好嘢! 有得聽返娃娃節目了!! 我唔會較鬧鐘, 但希望可以自動6am起身錄到.

美國隊長 2

頭先望下張睇戲積分卡, 由舊年四月到尋晚, 課金去戲院睇咗8齣戲, 全部都係自己一個人去睇的, 但睇過乜嘢唔係好記得晒, 好似有Oblivion, Olympus Has Fallen, Gravity, 哈比人, Non Stop, 同埋尋晚去睇美國隊長2, 仲有兩齣諗唔起係乜, 真係白睇了 sosad.

尋晚星期二睇戲比較平, 同埋時間太多, 不想成晚喺屋企, 好想出街浪費下時間, 所以決定出去搵齣戲睇, 最後選咗美國隊長2. 其實我一向都唔鍾意睇Marvel尐戲, 除咗The Incredible Hulk, 純因為有Edward Norton同埋Liv Tyler, 同埋美國隊長都算OK, 算係有些故仔, 男女主角曖曖昧昧幾好睇, 結局幾有傷感 feel, 所以都俾面去戲院睇睇第二集.

可能因為係星期二晚, 好多人, 本來想睇8:30, 不過7:45去到已爆晒, 轉買9:00, 排隊排成粒鐘先等到入場霸中間位, 排隊期間同坐低後, 都被班學生妹夾實 sosad, 可惜係班又嘈又唔靚的學生妹.

至於齣戲, 我覺得第一集故事好睇好多, 第二集只係一般Marvel戲, 有大場面, 有幾好笑的對白, 但故事同角色真係冇料到. Robert Redford可以好型, 但係冇乜發揮機會; Scarlett除咗個樣之外, 其實冇第一集個女主角咁好睇; 男主角第一集做弱仔嗰時幾好睇, 但第二集全程大隻, 反而冇咁討好, 雖然睇住佢攞住個盾牌狗衝都幾好睇. 最突出可能係個Winter Soldier, 造型甚有霸氣, 但係一除走個面具, 立即謝晒, 霸氣盡失.

CHEMEX 水煲 = $99,999.00

Seriously? What the heck's with that price tag sosad

晴天綠色

今日好好天, 已接近一個月, 依然很綠.

Nerd的人生



有少少感人

Tuesday 8 April 2014

自然捲 - 像我這樣的女孩

 

可能魏如萱要準備演唱會, 連續兩日都請假, 所以聽返首自然捲時代的舊歌, 回味下. 頭先食完 lunch, 出去買咗尐很 cheap 的復活節禮物送俾朋友, 希望佢鍾意. 其實我好鍾意寄嘢/收嘢, 因為比起email同facebook, 真係好唔方便, 咁麻煩都搞, 即是好有心啦.

爛書包


通常我著衫著鞋, 都係著都爛先會換, 其實我有其他新鞋新衫, 因為阿媽係天生購物狂, 成日亂買嘢, 不過我著開嗰件就狂著, 新的放埋一邊, 直至爛先換嚟著下. 右邊嗰個舊書包已用咗好多好多年, 色都變了, 但之前覺得真是太舊, 好似爛布一樣, 所以舊年開咗個買咗好多年但未用的的新書包嚟用. 點知尋日就爛了, 好鬼化學. 嗯, 還是舊的好.

Monday 7 April 2014

溝女不離三兄弟



有個朋友成日睇葉念琛尐戲, 所以有齣葉氏新片忍唔住好奇睇下, 不過我一向都唔鍾意葉念琛, 加上片名咁爛咁求其, 所以都不抱任何期望, 點知結果係比期望中更差.

論故事, 葉念琛之前尐戲都差不多, 由於佢為人欠缺幽默感, 拍出嚟尐戲, 全部都係想搞笑而不好笑, 娛樂性低, 不過每次都有些關於男女關係的想法表達到出嚟, 所以到尾, 拍出嚟的作品都係不好但又不太差, 至少係有故事想講. 但今次三兄弟就唔同, 根本冇嘢想表達, 加上笑位又完全失效, 連詩雅突然喺街跳舞, 隊band改個諧音粗口名, 陳奐仁扮東南亞口音英文, 拍嗰時都應該知道唔會有觀眾笑得出o架啦, 咁搞嚟浪費情節時間做乜?

論角色, 片叫乜嘢三兄弟, 但係故事入面呢三個人根本就唔係咩兄弟, 去到盡都只是點頭之交, 根本無兄弟情誼可言. 三人之間交集不多, 亦令成齣戲幾條故事線凌碎散亂, 連TVB膠劇水平都不如.

論演員, 唔用明星演員唔係問題, 其實之前成日用方力申同Stephy, 我認為佢地都唔係咩明星. 但係今次有好多地方, 明顯覺得一些演員做得很差, 但係導演竟然又收貨, 例如連詩雅講的一些對白, 感覺真係好假, 好造作, 根本係中學話劇水準, 一定要佢再做, 直至做到合乎專業水平先得囉, 咁都收貨, 令我好懷疑葉念琛拍呢齣嘢是 hea 拍. 陳奐仁尐廣東話講得唔好, 幾乎聽唔到佢講乜咁滯, 雖然唔怪得佢, 但係導演又係要拍到佢講得清楚自然先收得貨囉, 有冇搞錯呀? 全片唯一亮點係吳若希, 幾靚, 有尐似周麗淇以前.

藍又時 - 孤單心事



既然今日冇魏如萱聽, 我就自己上 youtube 亂嚟, 務求要搵到一首我之前未聽過的好歌為止. 幾經索盡枯腸, 不斷亂 click, 終於被我找到 sosad, 完成了今日心願. 聽完歌, 仲要聽埋人妻先修班訪問MK男子天團FAITH的網上節目.

我要娃娃!!!

OMG!!! 星期一開工當日, 竟然冇魏如萱節目聽, 搵咗第二個女仔代班!! 咁多個鐘頭叫我點過? 辣塊媽媽, 突然覺得做人好灰, 想詐病返屋企碌床. 希望聽日有返娃娃, 我要聽好歌!

Sunday 6 April 2014

我是土豪

今日出去講道, 雖然係遠, 不過碰巧今日好天, 當遊車河都幾舒服.

下午又去三味食堂食嘢, 試嗰個土豪便當真係超正, 飯盒入面所有嘢都係好食的, 包括菜同沙律, 全部都超正. 雞脾, 腸仔同燒肉都非常惹味, 非常豐富, 實在太正. 以後去食嘢都要叫呢個套餐.

返到屋企, 做咗幾嘢運動, 沖完涼洗完頭, 開咗齣葉念琛新戲溝女不離3兄弟, 電影質素同片名一樣預期之中咁差. 而家未睇到尾, 但相信係葉念琛最差的作品, 考慮到葉念琛之前尐戲都相當麻麻, 可見呢齣真係雞到無倫.

Saturday 5 April 2014

我要生勾勾!

今日成個朝早都奉獻晒俾HowtinLive, 雖然唔難做, 都係9up, 播下自己鍾意的歌. 不過今日女神嘉螢話有嘢唔開心, 唱歌時段佢打入嚟, 同金德寶同包包幾個女仔喺度傾計, 到完嗰時, 都已經過咗中午12點.

到食飯時間, 突然覺得好肚餓, 想去食生勾勾放題, 不過放題都冇乜好嘢, 所以品質惡劣就必然o既. 之前想嚴格實行的事, 今日實行得唔錯, 自制力很高, 不過真係不容易.

Friday 4 April 2014

[娃娃推介] Sotte Bosse - 君がいるだけで



今日魏如萱節目好正, 佢播呢首原唱係米米Club, 我知道, 因為係我嗰個年代的. 佢播呢個版本雖然冇聽過, 但係我覺得更好聽. 不過最正係娃娃播嗰時, 不時會插嘴唱金城武嗰個國語版本, 唱得好好聽, 可惜節目冇得 download. 實在太正.

Kenichiro Nishihara



尋晚返到屋企, 由於心情太狂躁, 為咗令自己冷靜, 狂聽西原健一郎的歌, 佢尐碟通常都好多首歌都好聽, 真係可以放隻碟入機, 跟住出去行街由頭聽到尾都咁 enjoy, 好正. 仲有, 佢已出過好幾隻碟, 不過好似都唔係好紅, Youtube的歌點擊率不高, facebook page 仲少人 like 過我 sosad. 我要多些幫佢推介, 佢值得更多人聽到.

我情緒好平穩, 有嘢我覺得好討厭, 我就會走開唔理, 好少會覺得好嬲的, 但係今日有覺得非常憤怒. 之前我返香港, 將車留喺阿媽屋企, 順便放底條鎖匙, 費事帶嚟帶去搞到唔見埋. 點知返到嚟, 發覺阿媽上過我屋企, 當時已覺得好討厭, 我冇講過准許佢嚟, 但我都忍咗, 都已經發生咗, 唯有下次唔留鎖匙喺佢度.

今日, 我中午同同事出去食飯, 佢又走上去我屋企, 原來佢之前偷偷複製咗我的鎖匙, 簡直不知所謂. 我喺電話度警告佢不可再咁做, 當時我真係用盡500%力, 先可以忍得住唔喝罵佢, 但係實在太過份. 我十幾歲時, 佢走去美國唔見佢湊, 而家我35歲, 仲湊乜能嘢? 想玩湊仔補償下, 買個椰菜娃娃喺屋企玩飽佢, 唔好搵我嚟舞, 容忍有個限度. 而家我見屋企的嘢唔同咗位置, 我好想喊, 好辛苦.

Thursday 3 April 2014

一個人的午餐

我班女同事今日想出去食lunch, 但係佢地冇車的, 所以要我車佢地出去, 不過我唔想同佢地一齊食, 因為佢地食貴嘢, 而我係下等人, 命賤不能食咁貴, 而更重要係佢地約見的朋友有個BB帶埋出嚟, 而我係好驚BB仔的.

所以車咗佢地到埗後, 我就自己去間台灣小館食lunch, 全場只得我一個, 今次試牛肉飯, 雖然都不錯, 但係冇之前嗰幾次咁正. 不過, 得我一個, 睇住書食lunch, 還是很好feel. 自己一個食飯, 感覺很舒服.

ps, 曾思瀚嗰本壞鬼釋舊約就快睇完, 下個星期可以攞嚟做至少半集耶教異聞錄.

[娃娃推介] 西原健一郎 feat. B.D. - Kingyo

 

今日聽魏如萱節目, 又再聽到首好歌未聽過的, 好正, rap得嚟又竟然感覺慵懶, 非常神奇, 很好 feel.

Chara - あたしはここよ

 

另一首魏如萱播的好聽歌, 之前未聽過呢個女仔的歌, 聲音很特別, 不令人作嘔的娃娃音, 感覺很活潑.

Blitzball 之王

好多人話Final Fantasy X個Blitzball game好難玩, 很低能. 但係我好鍾意, 當年狂玩, 尐人話難只係佢地唔識玩. 最難嗰場其實係第一場, 因為尐拍檔太水皮, 但係我連第一場都可以贏到, Wakka 揸住個冠軍杯 sosad

決心

無厘頭四點幾醒咗瞓唔返. 喺床度碌碌下之際, 突然有件事覺得無論如何一定要做到, 雖然對我嚟講很困難, 之前已失敗過多次, 但今次要更有決心, 必須嚴格落實執行! 再失敗的話, 我就是沒有尊嚴的龜公王八蛋, 到時我切腹加自焚! 我相信我可以做到, 而且是必須要做到, 不可再拖.

ps, 不是寫論文.  嗯, 而家打陣FFX先, 等陣六點聽魏如萱直播節目.

Wednesday 2 April 2014

November, December and all through the winter I'm alive, I'm alive



頭先聽魏如萱的節目, 家姐播好多我從未聽過的歌, 有首日本歌好得意的, 但聽唔切歌名叫乜, 搵唔返, 另一首係呢隻, 加拿大獨立 band Stars 的 The Calendar Girl, 立即愛上. 我覺得好好聽, 歌詞很熱血, 最鍾意結尾數月份嗰段.

If I am lost for a day try to find me
But if I don't come back then I won't look behind me
And all of the things that I thought were so easy
Just got harder and harder each day

December is darkest in June there's the light
But this empty bedroom won't make anything right
While out on the landing a friend I forgot to send home
Who waits up for me all through the night

Calendar girl who's in love with the world, stay alive
Calendar girl who's in love with the world, stay alive

I dreamed I was dying as I so often do
And when I awoke I was sure it was true
I ran to the window threw my head to the sky
And said whoever is up there please don't let me die

But I can't live forever I can't always be
One day I'll be sand on a beach by the sea
The pages keep turning, I mark off each day with a cross
And I'll laugh about all that we've lost

Calendar girl who is lost to the world, stay alive
Calendar girl who is lost to the world, stay alive

January, February, March, April, May I'm alive
June, July, August, September, October I'm alive
November, December and all through the winter I'm alive, I'm alive

家姐女神 vs 細妹女神



聽住做嘢. 雖然家姐唱歌勁好多, 但係講嘢把聲差不多一模一樣.

OH夜DJ

今朝六點幾醒咗, 唔覺意發現, 原來我呢邊時間6am至8am可以聽魏如萱音樂節目的直播, 又或者11am至1pm聽重播. 第日起身起太早有嘢聽, 真是開心大發現.

線上收聽     Playlist

Hit FM Radio Apps:
Apple store

Google play

Tuesday 1 April 2014

Infamous: Second Son

在聲色犬馬, 酒池肉林中忘掉一切世俗煩擾...

TouchPad送老母

是咁的, 我香港尐舅母姨媽之類, 個個變晒MK潮童咁, 人人出街都帶個iPad, 無論見到乜嘢都好似水和田咁扎行馬喺度影相, 玩facebook玩得落力過我. 早幾日, 阿媽喺佢屋企唔知邊度執到個手寫板 (!) 出嚟, 興致勃勃地問我係咪可以好似尐親戚咁攞嚟玩. 好啦, 既然佢咁有興趣, 唯有轉送我個HP TouchPad俾佢, 反正我都唔係經常用.

TouchPad很有記念價值, HP出嗰時係威係勢, 同iPad差不多價錢, 但係質素差好遠, 又厚又重, 又唔用Android, 所以幾乎立即就宣佈收皮停產, 將餘下所有貨物以超低價 ($100!) 賣出, 反而成為人人搶住買的熱貨 sosad. 當時我見平都 bid 咗部返嚟, 好似大約$200咁上下, 連埋個好型的叉電器, 唔需要插制的, 只係放上個架度就可以叉, 很神奇, 所以我覺得放喺屋企, 係一個好有型的電子鐘嚟. 後來我又按照網上教學, hack咗部嘢, 轉用Android, 所以部嘢除咗重之外, 我覺得係唔錯的, 如果HP一早就以$100-$200賣, 唔去同iPad鬥, 可能已經發咗達. 不過既然阿媽想有嘢喺屋企玩下, 益下佢啦, 好過成日開咁Q大聲唱卡拉OK, 嘈住阿妹.

鋼琴版 Bloody Tears





好勁, 用鋼琴彈惡魔城的 Bloody Tears. 雖然少咗點霸氣, 但係本身音樂係 gothic feel, 係適合彈琴, 好聽.