Friday, 28 September 2012

輕鬆


是咁的, 有間教會定期請我去講道, 雖然間o野好遠, 但係當為興趣, 我差唔多次次都會答應. 我知道佢地早幾個月前, 有個女仔傳道走o左, 個牧師有時會試探性咁問下我工作呀, 有乜打算呀之類, 完全 feel 到佢有考慮緊要請我. 由於怕佢會請錯人, 所以我最近幾次去佢教會講o野, 我都有刻意同佢提及多樣不利我自己o既事實, 例如我唔係次次講道都會講得好 (要強調呢樣, 因為撞o岩去親佢教會都寫到好講章), 冇穩定返邊一間教會, 同埋我被老婆飛o左之類. 一方面當然係因為我份人最唔鍾意受壓力, 有o野隱瞞住真係好大壓力, 另一方面我亦唔相信o係教會可以瞞呢 d o野瞞得幾耐.

早排個牧師約我去Aberdeen Center食飯, 佢咁遠走出o黎見我, 都估到乜料, 雖然我覺得唔會有教會想請我, 不過佢一向對我很好, 又考慮到可能有免費飯食, 所以就去o左. 先講o野食, 我o係萬寶要o左個雞扒焗肉醫意粉跟凍奶茶, 超正.

傾一陣廢話之後, 佢就話想物色緊人做佢教會 youth pastor, 又問我而家幾錢人工同埋辭職要幾耐時間通知之類. 我完全 feel 到佢好迷戀我, 想我做, 但係佢又話, 我乜都好, 係屋企o野麻煩 d, 同埋佢自己話唔到事, 要佢教會執事同意先得, 有可能佢 d 執事都會想見下我之類. 我就立即同佢講, 我完全唔怕見任何人, 因為乜人問我o野, 我都係好似同佢講o野咁照實答. 佢立即話, 不如唔好提我屋企o野啦. 不過我話佢知, 一定要提, 唔係遲早都會發現, 不如自己主動講出o黎仲好, 並且叫佢同 d 執事 sell 我o個陣一定要講埋, 我就係咁樣, 請就請, 唔請就唔請, 很有霸氣. 所以我心情很輕鬆, 佢請我都要考慮過先, 可做可不做, 心態很瀟灑.

當然, 我份人貌似好很正直, 唔係因為我人品好 (呢方面真係麻麻, 弱項), 而係因為我覺得咁樣到最後其實係有著數. 不過呢個係另一個故事, 得閒再講.

1 comments:

Anonymous said...

好同意你做法,去事奉要坦誠.

以前,某教友曾經介紹我參與某醫院義工服務,但報名者條件係必須受(教會機構/組織)洗了的教徒. 個教友叫我報名時"say yes",佢話佢會幫我搵熟人整張教會reference letter俾我.

嘩,佢咁都過都自己?!! 我就唔得喇. 雖然成日有人話要靈巧像蛇,但呢次,我只覺得"像蛇"咋喎. 咁小既事都講大話搞小動作做串聯&出賣誠信, 仲點有面目提服務呀事奉呀.

耶穌講道,唔係淨係係聖殿入面講, 佢會係街邊講山邊講湖邊/中講樹下講人地屋企講, 總之周圍都得. 我覺得事奉都係一樣, 邊度都得, 只要真心抱住想學耶穌服待人咁去對人,就得.