新蜀山劍俠

好大機會會喺九月尾搬返溫哥華住, 前路茫茫, 好大壓力, 所以呢排日日做嘢嗰時都要開齣電影睇, 最近就喺 youtube 度見到有得睇徐克齣舊戲"新蜀山劍俠", 聽就聽得多, 不過未睇過.

故事講元彪做o既卒仔, 碰上鄭少秋做o既神奇劍俠, 跟住佢去斬妖, 又碰上其他怪事怪人, 後來故事急轉直下, 個卒仔身邊好打o既奇俠全部被血魔 KO 晒, 所以個卒仔就同兩個武功非常麻麻o既孟海同李賽鳳去搵紫青雙劍去拮血魔. 其實個故事麻麻, 雖然背後係有 d 意思想講, 不時透過元彪說教, 不過到底都係冇乜特別, 一般劍俠大戰魔教大怪獸, 有 d 打鬥鏡頭亦交待得唔夠清楚, 畫面一轉, 會唔知做乜有個人會突然被打到飛開, 又唔係好明鄭少秋到底係點樣中咗血魔陰招. 畫面特技當年睇, 班觀眾應該會覺得好勁, 但係而家睇就當然係非常麻麻啦, 最後大戰尤其唔掂, 反而係開頭鄭少秋飛一大堆劍出去嗰下好型. 以前細個好鍾意睇"人間道", 最鍾意係燕赤霞招飛劍, 而家先知原來個 idea 係抄徐克齣"蜀山".

成齣戲最令我震撼係忽然覺得, 以前港片 d 女角真係好靚. 故事中段講鄭少秋同卒仔去到一個冰宮, 個堡主林青霞一出嗰時, 就覺得佢好靚, 因為我睇佢做戲都係睇比較近期如"東方不敗"之類, 佢已經比較老同肥咗, 但係喺"蜀山"入面又後生又瘦. 但係我覺得最好睇其實係李賽鳳, 嘩, 真係極靚囉, 而家 d o靚模呀, angelababy 之類超碼差佢十幾廿皮, 每個動作都 cute 到無倫, 令齣戲可觀度大增. 可惜李賽鳳後來多數都係拍打交戲, 齣齣都差不多, 如果佢做文戲或笑片, 我都會好有興趣睇.