Sunday, 25 January 2009

My Bloody Valentine 3D



難得今日天氣好好, 冇雪落, 地上亦冇積雪, 所以同妹仔出去多倫多一日遊. 首先去 P-Mall. 其實都冇咩特別, 係勁食嘢, 食咗個好好食o既叉燒飯, 妹仔就買好多燒味攞走, 又買咗個大蛋糕, 又飲凍奶茶, 臨走仲買多兩底雞蛋仔, 由頭到尾都係食食食. 本來想買返隻魏如昀 CD 以表支持, 因為實在好鍾意呢隻碟, 不過竟然一隻都見唔到, 唯有遲下網上訂.

之後就過去 Mississauga 間 Silver City 睇 My Bloody Valentine 3D. 要去到咁遠睇, 因為 Hamilton 有一間戲院有做, 真係廢到無倫. 正如個戲名講, 呢齣係 3D 片, 要眼鏡睇. 齣戲冇乜特別, 係殺人狂電影, 講有條友仔周圍用鋤頭殺人. 立體片唔奇, 殺人片亦大把, 但係兩者合埋就令到呢齣戲好好玩, 當個兇手飛把刀埋你塊臉到, 當個被害者 d 血對住你噴埋嚟, 就會覺得張戲飛真係值得. 當然, 有好多專業影評話故事無聊, 演技差勁等等; 呢 d 評語真係可以不理, 因為人地好明顯只係要拍齣立體 b-movie 出嚟, 而結果我認為係非常成功. 作為一個對立體電影有興趣, 鍾意睇殺人狂電影o既觀眾, 我覺得睇呢齣戲嗰時得到好大o既樂趣. 我甚至認為, 其實從今以後所有 slasher movie 都應該咁拍, 要立體先夠真正好玩.

0 comments: