Sunday, 21 December 2008

玩到尾o既 RPG (7):Shadow Hearts: Covenant



老老實實, 雖然全世界講到 RPG 就會諗起 Final Fantasy, 但係我覺得呢隻真係歷史上最好o既 RPG 之一, 雖然名氣唔算大, 但係絕對算得上係經典. 呢隻係 Shadow Hearts o既第二集, 故事直接繼承第一集, 一開始就知道第一集個女主角 Alice 已經死咗, 得返男主角 Yuri 一個, 無無聊聊, 明顯有一定o既自殺傾向. 雖然我玩呢隻 game 嗰時未玩過第一集, 不過個故事都明, 跟到冇問題.

到底有乜咁好玩呢? 先講角色, d 角色真係寫得太好, 多個角色都好立體. 男主角 Yuri 係我最鍾意o既 RPG 角色, 佢性格設定寫得好深入, 表面上佢係個把口好衰, 乜都唔驚o既半人半怪獸. 呢隻 game 其中最搞笑o既 gag 就係 Yuri 多次開口勁寸 d 敵人大佬, 真係仲好笑過好多笑片. 但係內裡, 佢又極之脆弱, 由故事一開始佢就已經係一個內心支離破碎o既人, 朋友係隻狗, 同埋一個同樣失去咗親人o既一個老人家. 所以去到故事後半, 當 Yuri 再見到前女友一面, 但係又唔能夠幫佢復活嗰刻喊咗出嚟, 我覺得係好合理o既劇情發展, 亦好 touching. Alice 喺今集冇乜出鏡 (因為已經死咗), 但係佢同 Yuri 同 Karin o既三角關係都好深刻. Yuri 係好掛住 Alice, 但係隨住故事推進, 受 Karin 同埋其他朋友影響, 可以感覺到 Yuri 其實都改變好多.

除 Yuri 同埋 Karin 兩個非常討人歡喜o既主角, 仲有好多佢地身邊好精彩o既角色. 佢地其中一個隊友叫 Joakim, 係我打唔埋 RPG 以來最搞笑o既一個角色, 真係經典之中o既經典. 隻狗 Blanca 亦好型, 同埋個俄國公主 Anastasia 亦係一個好搞笑o既角色. 不單止佢地, 連敵人都好精彩, 例如 Lenny 同 Veronica, 佢地同幾位主角之間o既對話真係好笑到痺. Lenny 相當受歡迎, 所以喺 Shadow Hearts 第三集甚至安排咗個正派角色俾佢.

至於故事, 喺呢一班咁出色o既角色推進之下, 當然係非常吸引. 尤其係故事一開始就講到 Yuri 身受詛咒, 應該係冇得救, 雖然佢本身亦唔係好 care, 因為佢都有少少想死, 但係玩家就會由頭到尾都會諗到, 佢點算好呢? 不過我就唔係咁鍾意結局對 Yuri 同 Karin o既安排, 有點兒美中不足.

0 comments: