女人與雞

多年前, 香港有條粉腸叫詹培忠, 口出狂言, 話所有女人都係雞, 十個女人十隻雞, 老婆就係私家雞. 呢個人分明就係壞腦, 所以家下佢甩晒頭髮我一 d 都不覺奇怪. 須知道, 雞, 即是妓女, 乃係一門職業, 又邊有可能所有女人都係妓女? 我就唔信所有女人同人上完床都會問人收肉金.

諗唔到香港人中壞腦o既唔止呢個詹培忠. 最近倪震單嘢人人都加把口, 好多學生哥臨近聖誕唔使返學, 特別得閒, 一單小新聞抄到咁大, 幾年前吳鎮宇喺 karaoke 咀陳雅倫咪一模一樣, 又唔見佢煲到咁大. 我特別留意到, 好多人都針對個學生妹張茆, 上 youtube 或高登睇下, 人人都話佢係雞, 又話佢姣, 又話佢勾佬之類... 佢當然唔係雞啦 都冇證據佢靠賣肉收錢. 如果"雞"o既定義連佢都可以包括在內, 咁詹培忠就真係講得冇錯, 所有女人都可以叫做"雞". 姣? 首先, 姣o既定義唔清晰, 如果係指鍾意識男仔的話, 邊個女大學生唔鍾意? 仲有, 勾乜佬? 倪震又未結婚, 莫講話佢有自由去結識可能更適合佢o既女性, 就算當佢已經係人老公, 佢去滾係佢o既錯, 鬧個女仔做乜? 我又唔見有任何人鬧倪震係鴨喎.

我不得不認為, 香港人都係習慣賤視女性, 有乜唔啱睇, 就標籤人係妓女, 所作所為可謂幼稚頂透兼夾賤到無倫.