Wednesday, 10 September 2008

英雄救美之計

最近因為黃毓民關係, 係我第一次咁關注選舉經過同結果, 真係非常有趣, 睇到好多我之前冇留意過o既嘢. 最過癮者, 莫過於有日喺 youtube 見到梁燕城為梁美芬站台拉票:

http://hk.youtube.com/watch?v=ImySlFq9280

http://hk.youtube.com/watch?v=68SroaEMfTQ

對梁燕城, 雖然佢成日講埋 d 佢唔識o既嘢 (如考古, 聖經) 但係又講錯晒, 唔識又扮博學, 但係對佢冇乜厭惡感, 但係今次佢幫梁美芬拉票, 就真係令人心生厭惡, 又話佢係"鄰家女孩", 又話佢有"獨立思想", 真係唔知佢係有心講大話定係咁天真咁傻. 其實唔止佢, 仲有好多其他基督教大佬, 如李炳光, 陳世強, 陳樹安, 呂宇俊. 當中最出位者, 則當屬蘇穎智牧師, 佢喺主日崇拜聚會中要求會友為梁美芬代禱, 疑似為佢拉票. 而家梁美芬選上, 香港基督教會都幫佢唔少, 否則未必可以勝過毛孟靜.

梁美芬係乜人呢? 佢雖然以獨立參選人身份參選, 但係人人都知佢係共產黨無間道. 首先, 佢支持廿三條:

===============================
2007年5月11日。

【明報專訊】策發會委員老鼠芬、鄭赤焱和鄭國漢,昨日在策發會工作坊上建議,若不想下屆特首選舉提名門檻過高和有篩選機制,當局應盡快為《基本法》23條立法,並把條例內分裂國家、竊取國家機密等罪行,列入《行政長官選舉條例》,令干犯有關罪行者不能參選特首。
===============================

一個有正常獨立思想機能o既人又點會主動要求廿三條立法? 搵鬼信咩? 仲有, 喺選舉期間, 就俾人踢爆佢同共產黨選舉機器民建聯配票, 有晒證據, 俾人搵到工聯會 (亦係親共產黨) 內部信件, 其中1.69 萬份叫會員投俾梁美芬, 另外2.3 萬份就叫會員投俾民建聯.

到選舉當日, 由民建聯一早就收檔, 停止拉票, 原因當然係因為已經夠票當選; 而同時梁美芬就有成千人幫佢拉票, 明顯係民建聯幫晒手分票俾佢, 大家齊齊入立法會, 而結果亦係成功收場, 大團圓結局.

我真係唔明, 點解香港教會要支持一個支持廿三條o既人? 教會係咪 buy 廿三條先? 尋晚聽譚志強節目, 佢話曾經有教會領袖喺大陸出事, 不過梁美芬出手搞掂, 成功救人, 所以同教會關係密切云云. 假如屬實, 咁大佬呀, 呢條係 TVB 用到爛o既英雄救美之計嚟啫!!! 搵人搞你o個個又係佢, 英勇救你o個個又係佢, 咁白痴o既招數都睇唔出? 唉, 真係唔知佢地搞邊科.

0 comments: