Tuesday, 10 June 2008

溫哥華遊

上個星期返o左溫哥華幾日, 因為今年個 CSBS o係 UBC 舉行, 而我就需要o係星期一做個 20-25 分鐘o既 presentation. 我星期五晚落機, 星期三朝早上機回航. 不過雖然話係"溫哥華一遊", 不過"遊"乜鬼, 只不過係返屋企, 我帶o左部相機, 但係一張相都冇影過, 因為乜都見過晒, 冇乜好影. 不過溫哥華 d 天氣同環境真係舒服好多, 落雨都唔會覺得侷, 出太陽又唔會覺太熱, 又周街綠色, 令人心曠神怡.

[屋企]

幾日都可以住o係老豆屋企, 睏返以前間房, 所以今年去 CSBS 支出少好多, 唔使住酒店, 早午晚都食老豆, 佢又車出車入, 所以唯一大支出其實只有機票. 幾年冇見, 其實有呢個機會同老豆見下面, 相處下都幾開心. 令我覺得神奇o既係佢而家搞到屋企好 high tech, 部電腦勁過我o個部好多, 同埋佢有成三部 laptop, 唔係因為佢需要, 而係有時見到 futureshop 減價, 佢忍唔住要買.

其實今次我返去時間剛好, 因為好多年前o係香港係佢帶我去海運戲院睇 Indiana Jones 3, 而家我大個o左就輪到我帶佢去睇第 4 集. 不過可惜我地都同意第 4 集唔好睇, 故事無趣, 對白無聊, 總括o黎講係令人失望, 事實證明咁多年來 Lucas 同 Spielberg 冇拍第 4 集係有其原因, 事關佢地都唔相信會拍得出好o野. 不過算啦, 當懷下舊啦.

[白痴五人眾]

除o左見返老豆, 亦好開心見返 d 故友. 打過電話俾 Maggie 妹妹, 傾o左一陣; 又同 Benson 去 crystal 食o左個唔好食o既豬扒飯. 不過高潮係見返大阪, 占爺, 同大力妹, 最可惜係欠o左德哥同妹仔, 儲唔夠六人眾. 德哥返o左香港後已經失晒消息, 可能俾共產黨捉o左, 懷疑佢係加拿大間碟; 占爺o係不久o既將來亦會返香港長住, 話係佢唯一生路, 盡地一煲咁話; 而大力妹讀完書後似乎亦會返香港做老姑婆... 所以今次四個白痴聚首一堂, 其實有歷史意義, 將來都唔知仲有冇機會再聚.

過o左幾年, 但係大家都同以前一樣, 冇乜分別, 一聚埋就亂 up, 吹水吹都天花龍鳳. 占爺依然咁無厘頭; (以我估計) 大阪仲係飛唔甩o個條"曾經滄海", 唉, 大阪咁正都唔識欣賞, "滄海"個屁, "坑渠水" je; 而大力妹就繼續遊戲人間, 蹂躪天下少男心.

[CSBS]

同去年一樣, 我 skipped o左大部份o既 presentations, 而有去o既, 亦大多聽唔明 d 人 up 乜. 我最鍾意o既 presentation 係 Marie-France Dion, "A New Comprehensive French Edition of the Qumran Texts : La Bibliothèque de Qumrân." 佢展示一連串o既相片, 話 DJD 有時會將 d 死海古卷相片上面o既陰影誤當成筆劃, 佢明顯係o岩, 而且易明.

另外特別o既係今次我見返好多以前o既老師、同學, 仲同 Martin Abegg, Dirk Buchner, Tony Cummins, Dorothy Peters, Matt Theissen 去食 lunch, 又同 James Scott 傾o左幾句. 係一個難得o既機會. 亦有機會同o係 email 上有來往, 但係未見過面o既 Ian Scott 同 David Miller 會面, 傾o左幾句.

而我個 presentation, 就比相像中順利好多. 本來我都覺得好緊張, 唔知點死, 準備定一大堆人地有可能會問o既問題, 寫定晒 d 答案. 點知真係行好運, d 人問著幾條問題都係我非常熟悉o既課題, 所以對答如流, 望落好似好識o野咁. 好險, 好險...

2 comments:

Osaka said...

When I was reading your blog at work (yes, I do that when I procrastinate), I had to fight hard to keep from crying...you are a good friend. ^v^ If you really want to know what happened, you can ask Annie and stop guessing! And yes, Annie, you can tell ar Kit. I give you my permission. Or you can just dig in your msn history, I told her all about it in msn.

Howtindog said...

一定係我o係 CSBS o既英雄事蹟太過感人, 令人流涕.