Monday, 12 May 2008

An American Crime



尋晚同妹仔睇o左齣都幾激o既電影, 叫 An American Crime, 故事係基於真事, 以法庭資料做藍本. 主角係一個十幾歲o既少女叫 Sylvia, 由我好鍾意o既 Ellen Page 演出. 佢父母因為工作關係, 將佢同佢細妹交俾一個陌生o既女人寄宿. 呢個女人叫 Gertie, 由好戲o既 Catherine Keener 演出, 係一個失婚窮女人, 有六個仔女, 最大o個個女同 Sylvia 年齡相若. 開始仲 ok, 但係後來 Gertie 開始以各種原因打 Sylvia, 而為要保護細妹, Sylvia 次次都受兩倍. 開頭係打, 後來用煙頭燒, 將個玻璃瓶塞入 Sylvia 下體, 掉佢落 basement. 不單止 Gertie, 後來連佢 d 仔女都加入虐打 Sylvia, 仲叫埋 d 同學o黎"玩", 打係常事, 仲用煙頭燒佢, 個個都玩到上晒癮. Gertie 甚至用燒熱o既鐵線, o係 Sylvia 個肚上面劃穿皮肉寫字: I am a prostitute, and proud of it. 最後 Sylvia 終於死o左, 事情發生都呢步, Sylvia 個細妹先同警察講真相. Gertie 被告一級謀殺, 佢話乜都唔記得, 話 Sylvia 身上 150 個傷口全部都係佢 d 仔女同鄰居做成. 不過當然冇人信, 最後都係要去坐監, 唔洗坐電椅.

雖然內容係非常暴力, 但係個導演明顯係非常節制, 極力低調處理暴力畫面, 有 d 必然o既情景亦冇交代, 例如 Sylvia o係全身唔郁得o係 basement 度, 佢點大小便呢? 佢食乜呢? 同埋 Sylvia 死o個時個樣亦冇嚇人化妝, 因為真實係 Sylvia 屍體非恐怖, 佢因為太痛, 死前將嘴唇都快要咬落o黎. 但係, 雖然導演已經好克制, 但係睇完之後, 我依然覺得呢齣戲真係好恐怖, 只能作出目瞪口呆o既反應. o係唔訴諸血腥而令觀眾有如此驚愕反應, 我覺得係高手.

片中令人心寒o既係所有角色, 除 Sylvia 外, 全部都係冇心肝o既冷血動物. Gertie 當然唔使講, 仲有佢 d 只有十歲咁上下o既仔女同埋佢地 d 同學, 個個都不單唔幫 Sylvia, 仲加入虐待佢o既行列. Sylvia 父母又係痴線, 將兩個女去個陌生人屋企住? 仲有個細妹, 雖然係驚, 但係家姐俾人搞到咁都唔幫, 其實亦係非常自私. 而演出 Sylvia o既 Ellen Page 就真係做得好, 同呢班衣冠禽獸相比, 佢個樣蒼白柔弱, 同埋佢痛到尖叫o既聲音真係聽到個心都震一震.

0 comments: