Tuesday 20 November 2007

死不悔改: 挪亞方舟國際事工



頭先見到挪亞方舟國際事工個網頁有 d 新資料, 講到影音使團自從話"發現"挪亞方舟後有乜搞作. 其實一句講晒, 就係直到今日為止, 佢地都未能證實"發現"方舟, 佢地甚至唔知自己發現o左 d 乜, 但係佢地估係挪亞方舟, 不過就不斷巧言令色俾人一個真係已經發現方舟o既假象, 籌錢都仲算小事, 因為自己唔用腦就俾錢係自作自受, 死在佢地仲叫人信耶穌, 因為方舟已經"證實"係真... 大佬呀, 第日你真正查到話唔係挪亞方舟, 咁 d 因此而信耶穌又如何自處呢? 真係不負責任.

上次佢地話見到o個個望落似係大型木結構o既o野o係新報告中已經冇提及 (有冇搞錯呀?), 今次講o既係第二樣o野, 話有個當地人o係個洞穴中發現有舊化石木, 佢地去搵, 就o係個山洞中搵出一舊 11.5x2.6 米o既化石木. 你估都估到, 佢地一口咬定就話呢舊木來自挪亞o個隻方舟, 因為"亞拉臘山高處的嚴酷氣候,已持續4000多年,令高地缺乏樹木生長". 有趣, 咁我又想問, 創世記 8.10-11 話: "Noah sent out the dove from the ark. The dove came to him toward evening, and behold, in her mouth was a freshly picked olive leaf". 既然該處冇樹木生長, 又何來 olive leaf 咁奇怪呢? 佢地又話, "木結構的龐大體積,亦無法輕易運載登山". 首先, 比起金字塔, 比起長城, 都唔係好龐大, 亦唔係好難運載 je. 最後, 如果世上真係有過大洪水, 即是話世上不知有過幾多木當時被沖上本來唔應該出現o既地方, 你又何解咁神奇可以知道呢塊木就係挪亞方舟上面o既一塊木呢?

2 comments:

Anonymous said...

說話講到咁絕,如果人地真係揾到呢?聖經係真係咁寫架麻,冇人去搵,又點會搵唔到呢?

Howtindog said...

首先, 講得絕嗰個係影音使團, 唔係我. 佢地一口咬定呢舊不明物體就係挪亞方舟, 我又問你, 如果唔係, 咁又點呢? 咁多幫佢講過好說話o既牧師係咪要向公眾道歉呢? 影音使團係咪會同睇完"挪亞方舟驚世啓示"信咗耶穌o既人解釋返其實部電影o既信息係錯誤? 教會而家喺香港起緊挪亞方舟o既大型公園, 起完先發現其實舊嘢唔係方舟咁又點? 基本常識就係: 你未證實, 就咪煲到單嘢咁大.

其次, 你話"聖經係真係咁寫", 你冇清楚說明, 我估你係話亞拉臘山上就應該有方舟? 如果係咁, 你就係冇小心睇聖經. 中文聖經話: "方舟停在亞拉臘山上" (創 8.4), 不過呢個翻譯係錯. 正確係: "方舟停在亞拉臘的眾山之上", 喺呢度, "山"一定係眾數. 所以亞拉臘係一個當時地域名稱, 方舟停喺其中一個山上, 而唔係一個叫做"亞拉臘"o既山上, 而影音使團就喺"亞拉臘山"上搵方舟, 我好懷疑佢地到底有冇睇清楚聖經講乜.

第三, 我冇叫人唔好去搵喎, 我對影音使團o既批評係, 佢地未證實就咬定話已經發現到方舟, 而唔係批評佢地去搵方舟. 去錯地方搵方舟, 我至多只會覺得佢地蠢; 但係未經証實就放晒風話搵到乜搵到物, 咁就係無恥o既所為.