Wednesday, 31 October 2007

Sicko



暑假上咁多齣戲, 其實我最期待想睇o既係呢齣, Michael Moore 新o既紀錄片. 今次佢個題目係美國o既醫療制度, 佢想講o既係, 美國有好多人冇醫療保險, 而美國人雖然知道呢個事實, 但係就一直都當睇唔見, 而佢今次就將好多個案放上畫面, 要美國人睇見一個冇保險o既阿婆俾醫院送出街, 睇見冇保險o既 911 英雄冇錢睇醫生, 睇見一個細路女因為醫院基於保險條例唔肯醫所以瓜柴, 然後要佢地回答, 佢地係咪可以接受美國係一個咁涼薄o既社會.

除o左冇保險o既人, 佢亦有講到有保險o既人. 講到好多個案, d 有保險o既人俾保險公司玩, 搞到一身蟻. 而呢 d 保險公司因為要增加利潤, 當然會將金錢放o係人身健康之上, 合理之餘亦好唔合理, 好吊詭.

總括o黎講, 我覺得呢齣戲好正, 雖然題目嚴肅, 但係拍出o黎幾搞笑, 有好多笑位, 亦有令人動容o既情節, 由頭到尾都唔覺悶, 拍紀錄片拍到好似 popcorn movie 咁, 算佢好o野. 雖然好多人都鬧佢個 solution 唔得, 但係如果問我, 交勁稅同埋要等, 但係人人有免費醫療, 我會覺得免費醫療比較好. 事關睇完佢齣戲之後, 第日當我可以交少 d 稅, 同埋睇醫生唔使等, 我就會不其然諗到有 d 人俾醫生拒於門外, 話之佢死, 真係會良心不安.

0 comments: