Monday, 20 August 2007

Sunshine, Fracture, Tripper, 多羅羅

Sunshine



係 上太空救地球o個類電影, 個題材冇乜特別. 不過我覺得比起一般同類型o既電影好睇, 因為 d 演員好正. o係太空船入面差唔多個個演員我都鍾意. 其中 Cilian Murphy 算係主角們中o既主角, 最多 screen time, 我都好鍾意佢. 睇 28 Days o個時都未對佢有好感, 但係後來睇 Batman Begins 同 Red Eye, 佢真係奸得好正, d 眼神好鬼邪. 個故事推進都唔錯, 一 d 都唔悶, 不斷有事發生, 將 d 主角帶離佢地原來計劃. 不過個結尾麻麻地. 唔係話個 twist 冇可能, 但係我就情愿個導演安排過第二種危機. 相反個開頭就好正, 好有懸疑 feel, 因為呢班主角係第二隻出發o既太空船, 第一隻係無厘頭唔見o左. 所以當佢地決定去搵第一隻太空船o個時, 觀眾會諗, 搞瓜第一隻太空船o既o野會唔會食埋呢班主角呢? 答案係會, 但係俾呢樣o野搞瓜會令觀眾覺得好無謂囉.

Fracture



食 人醫生一向都係我同妹仔o既偶像, 所以呢齣戲好o岩睇. o係呢齣戲入面, Hopkins 殺o左自己老婆, 但係佢有一連串好聰明o既計劃, 令到自己o係法庭上好有利, 連律師都唔使, 自辯搞掂. 至於 Gosling 就係 prosecutor, 本來佢以為可以輕易搞掂 Hopkins, 點知一開波就俾 Hopkins 大比數領先. 所以呢齣戲大部分時間就係講 Gospling 點樣苦苦掙扎, 想搵方法入 Hopkins 罪. 個故事都唔錯, 有追看性, 不過主要鍾意呢齣戲都係因為食人醫生, 型到爆.

Tripper




呢 齣係超級大爛片. d 人成日話香港成日出爛片. 可能都o岩, 但係以我了解, 北美爛片仲多, 仲要係爛到天溶地爛o個隻. 齣戲講一班嬉皮士去個森林度開 party, 點知有個痴孖根殺人狂周圍用斧頭殺人... 個故事就係咁, 冇其他. 其實呢齣比較似笑片, 因為 d 嬉皮士 d 打扮睇落好過時但係又似為自己好型咁, d 殺人場面又誇張, 直頭有少少漫畫化. 不過成齣戲都好悶, 觀眾唔可能會去關心 d 嬉皮主角會唔會死. 其實, 最好快 d 死晒佢, 個個主角都好討厭.

多羅羅



本來對呢齣戲都幾有興趣, 點知都唔好睇o既, 直頭有 d 流於沉悶. d 人物造型唔錯, 但係個故事冇乜推進, 打交場面又非常一般. 總之就係麻麻地, 悶悶地.

0 comments: