Sunday, 19 August 2007

神蹟

有人將耶穌行神蹟同一 d 第一世紀o既猶太人比較, 因為耶穌唔係唯一一個可以行神蹟, 施法術o既得道高僧. 有幾個人可以一提. 學者通常會提到以下呢幾個人.


Honi the Circle Drawer

o係 Josephus, Antiquities 14.22 入面有提及佢. 話佢係一個義人, o係以色列地冇雨落o個時, 佢禱告神要求落雨, 後來真係有料到. 不過嚴格o黎講, 求雨唔算係神蹟. o係 Mishnah (m. Taan 3.8), 關於佢o既故事更加詳盡. 話 Honi 第一次禱告神o個時其實冇雨落, 所以佢就畫個圓圈o係地, 同神講, 唔落雨佢就唔一世都唔出呢個圈. 後來落少少雨, Honi 就話有冇搞錯, 落得咁微弱唔算數, 所以後來就勁落雨. 同 Antiquities 一樣, 求雨唔算係神蹟. 所以我認為 Honi 其實唔可以算係神蹟人.


Hanina ben Dosa

o係記載入面, Hanina 係一個禱告超人. 佢最先出現o係 Mishnah (Abot 3.10-11; Sota 9.15; Ber 5.5). b. Ber 5.5 提及到, 當 Hanina 為人禱告o既時候, 如果佢禱文講得流利, o個個人就會病好, 如果禱文講到 luck luck kuck kuck, 咁o個個人就唔會好得返. 呢個記載有 d 唔係咁清楚, 到底係 Hanina o既流利禱告可以醫好人, 定係佢可以透過觀察自己o既禱文流唔流利去 predict 其他人o既命運. 似乎係後者居多. 如果係咁, 咁其實都唔算係行神蹟.

o係 Talmud 就唔同, Hanina 真係一個神人, 好多奇事o係佢身上發生. b. Ber 34b 話, 佢幫人禱告, 見自己個禱告好流利, 所以佢知道o個個人一定已經好返, 所以有 d 人去 check 下, 後來再夾返 d 時間, 發覺o係 Hanina 禱告o個時, o個個人真係o係o個個時候好返晒. 有 d 類似耶穌醫人o既故事咁 (John 4.46-53; Matt 8.5-13; Luke 7.1-10). b. Pesah 112b 又講到有一次, Hanina 夜晚o係街度行走, 見到魔鬼女皇. 個女皇好寸咁話, 如果 Hanina 唔係有天堂照住, 佢一早殺鬼o左佢. Hanina 於是乎就趕走呢個魔鬼女皇, 有 d 似耶穌趕鬼. b. Ber 33a 亦講到有次 Hanina 禱告o個時有條蛇走去咬佢, 後來反而係條蛇瓜o左, Hanina 就一 d 事都冇.

不過, Talmud 係比較後期o既記述, 學者都認為呢 d 記載o既歷史性成疑, 只有 Mishah 比較冇咁誇張o既記述先可能係真. 所以 Hanina 算唔算有行過神蹟其實係一個疑問.


Eleazar the Exorcist

Josephus, Antiquities 8.45-49 提到o係 Vespasian 時期有個神人叫做 Eleazar, 係一個驅魔人. 佢識得好似所羅門王咁, 用 d 草藥可以將 d 鬼由人o既鼻哥度拉出o黎. 佢驅魔o個時仲會放個杯o係 d 人o既面前, 所以當 d 魔鬼俾佢拉出o黎o個時就會打跌個杯, 等人知道佢唔係神棍.

0 comments: