Thursday, 30 August 2007

Alone

今日中午o個時, o係屋企同妹仔睇o左齣幾正o既泰國鬼片, 叫做 Alone. 個女主角個樣有 d 似郭羡妮. 個導演就係之前拍 Shutter o個個, 同樣係一齣好睇o既鬼片. 我覺得兩齣都不相伯仲, 夠驚嚇, 故事性亦唔錯. 其實我鍾意呢兩齣泰國鬼片多過好多日本鬼片. 好似午夜兇鈴咁, 個故事同氣氛係唔錯, 但係隻鬼好少出場; 咒怨就不斷有鬼睇, 但係就全無故事咁滯. Shutter 同 Alone 就兩者兼備.

呢齣戲個故事幾 懸疑, 慢慢睇落去先會發現個女主角同佢個姊妹o既故事, 一邊又不斷有個女主角俾鬼嚇到彈起o既橋段, 一路追睇落去完全唔覺悶, 個節奏控制得好好. 理論上齣戲要慢慢睇到去中間 d 觀眾先會發現個女主角原來係連體嬰, 不過當然, 齣戲個中文俾人改做"連體陰", 再加上張 poster, 觀眾睇怕一早就已經知道. 不過去到臨尾, 個故事另有個 twist, 係一個早有安排, 之前隻鬼出現o個時不斷俾 hints 觀眾o既 twist. 所以去到o個到, 觀眾諗返轉頭, 就會有"係喎"咁o既滿意想法. 不過其實個 twist 都有 d 唔合理, 現實中冇乜可能會實行到, 不過我覺得都算可以接受, o係鬼片o既 context 入面 ok 啦.

已經好耐冇試過睇鬼片覺得咁 satisfied. 我覺得好過西片o既 28 weeks later, 好過港產片o既降頭. 呢個泰國導演拍呢類鬼片係有一手, 好o岩我呢類鬼片迷睇.

0 comments: