Thursday 30 November 2006

問得好, 答得差

又係奇文共賞o既時候. 係真理報 2006 年十月號o既讀者問答, 由王順強牧師作答. 想睇全文可以自己 click 去睇, 呢度我只係 summarize 一下.

問題主要係"如何證明耶穌是神?" 牧師當然答話耶穌係神啦, 主要有六個理由: 1) "從耶穌的自稱及言論中說明祂是神", 2) "從祂所行的神蹟說明祂是神", 3) "從祂接受敬拜說明祂是神", 4) "從祂預言準確說明祂是神", 5) "從聖經的形容說明祂是神", 6) "祂從死裡復活說明祂是神".

以我睇, 六個理由都無厘頭到極.

1) 首先, 牧師列出超多佢話係耶穌自稱為神o既經文, 不過睇清楚 d, 其中九成都唔係耶穌話自己係神. 而且, 自稱自己係神, 咁又點? 自己話係就係呀? 曾灶才夠話自己係九龍皇帝啦, 咁唔通九龍真係佢管呀? 成龍夠話自己係好男人啦, 咁唔通我就要當佢係人呀? 假設耶穌真係有自稱為神, so?

2) 牧師話, "只有耶穌是神才能行神所行的神蹟". 就呢句說話, 我相信牧師係唔相信舊約聖經o既! 因為聖經大把故事講一 d 唔係神o既普通人一樣可以行神蹟. 以利亞, 以利沙, 摩西, 數都數唔晒.

3) 牧師話, 聖經好多地方話, 人唔可以敬拜神以外o既對象. 咁既然耶穌受人拜佢, 咁就證明佢係神啦. 白痴到痺, d logic 搞到亂晒籠. 神受人敬拜, 唔代表受人敬拜o既就係神o架嘛. 我夠可以話, 耶穌受人敬拜, 咁就證明佢有犯過罪, 做o左一 d 聖經講明唔可以做o既事. 而且, 秦始皇都受人敬拜啦, 大肚腩佛像都受人敬拜啦, 紅太陽毛主席都受人敬拜啦, so? 證明佢地都係神呀?

4) 牧師話, 耶穌預言準確就說明佢係神. 咁約拿 d 預言準唔準確呢? 以賽亞 d 預言準唔準確呢? 以利亞 d 預言準唔準確呢? 咁係咪就說明約拿, 以賽亞, 以利亞都係神呢?

5) 牧師話, 聖經將耶穌形容為神. 喂, 大佬, 我係信聖經o既, 咁使鬼你答我如何證明耶穌是神咩? 如果我係唔信聖經o既, 你開本聖經俾我睇, 咁有鬼用呀? 可蘭經夠話亞拉係真神啦, 佛教 d 波蘿耶子蜜瓜經夠話邊個邊個係真佛啦, so?

6) 牧師話, 耶穌從死裡復活, 咁就證明佢係神. 唉, 牧師呀, 聖經裡面有好多人都從死裡復活o架, 佢地全部都係神呀? 例如, 舊約o既以利沙, 新約o既耶穌同埋後來o既門徒, 全部都有故事講佢地令死人復活. 唔通全部o個 d 死人都係神呀?

Sunday 15 October 2006

太陽報愚見

==============================
15/10/2006
文: 小白

海關引用刑事條文打擊BT侵權行為,成為全球首個成功案例,食髓知味,與香港大學開發網上監察軟件,說是可以二十四小時追查BT,有效掃蕩這些網上族群。 小白老弟對海關部門賣力地打擊非法行為當然舉腳支持,但對於從來不是與時並進的政府部門,能否如他們誇下海口所說嚴打高科技罪行,卻有一百萬個懷疑。

BT是這個年代最流行的點對點(P2P)程式之一,因為它有快速的下載效率,而且在網絡上有無限下載交換檔案的優點,是新生代知識資源傳遞的大革命,絕不 能將之視如洪水猛獸。另外,網民的智能遠高於政府官僚,在香港架設的BT網站數目少得可憐,一來此地年輕人不少是雙失又雙K,一天二十四小時無所事事,大 都花在唱K與索K上,根本不會有閒情自製種子。

二來大部分BT網站是在境外運作,這是法律的百慕達三角,以海關根據的版權條例:「任何人沒有版權持有人的特許下,非法以貿易、業務為目的,並在任何過程中分發該版權人的作品、達到侵權人的權利。」連一個初中生也知道官大人根本拿他們沒辦法。

愚見以為,政府手上早有斬腳趾小刀一把,如禁帶攝錄器材入戲院壓制非法盜錄,雖略見笨拙,卻已顯成效。由於BT對硬盤容量要求,海關不妨將高於2GB以上 的硬盤列為非法器材,而BT重複讀寫時會對硬盤產生高溫,故有關方面亦務必立例所有電腦要安裝高溫警報器,違者送官究治,看這些網民橫行到幾時。
==============================

呢位小白老兄真係值得令人同情, 白痴成咁都真係唔容易. 不過佢有一度講得好o岩, 令人無法不同意, 佢講o既o野的確係"愚見"...

Friday 15 September 2006

傳說中的 concordance

今日好精采, 係我o黎 McMaster 讀書之後, 其中少之又少o既其中一個高潮. 但係好複雜, 要從頭說起...

話說我以前o係 Trinity Western University o個時, 其中一個最出名o既老師叫做 Martin Abegg, 係死海古卷界入面無人不識o既人物. 佢做乜會咁出名呢? 就咁, 其實死海古卷最先係o係 1947 就已經被人發現, 帶o左出山洞, 呢堆古卷o既數量超大, 仲要大部份都係碎晒o既. 所以 d 學者就好似玩緊一個成幾萬塊砌圖咁, 仲要係唔見o左個盒面, 所以唔知本來係點樣o既砌圖! 所以 d 學者要花好多時間先至 publish 到少少古卷. 由 1950 一直去到 1989, 成四十年之久, d 古卷只不過係 publish o左好少一部份. 問題係負責研究o個 d 古卷o既學者係唔會俾其他人睇佢地o既古卷個喎, 唔係咪俾人飲o左頭啖湯先? 所以學界就開始好多人不滿, 叫呢 d 做 "monopoly", 覺得有 d 學者自私, 專登做o野做得咁慢, 佢 d 古卷一日唔正式 publish, 佢就一日都仲係o個張古卷世界上o既唯一一個權威, 冇人可以 challenge 佢o既結論, 因為人地連張古卷都未見過, 點 challenge? 變成歷史上o既最大考古發現過o左成四十年都仲係冇乜幾多個人見過.

o係呢個時候, 有幾件事發生o左, 令到呢個 "monopoly" 被打破, 至 1990 年開始就不斷勁 publish 古卷, 到十幾年後o既今日, 所有古卷都已經正式 publish 晒咁滯, 令死海古卷變成近年來最發達o既學科之一. 其中一個事件o既主角, 就係我老師 Martin Abegg. 當年佢仲係學生仔咋喎, o係 Hebrew Union College 讀書, 佢個 advisor 叫做 Ben Zion Walcholder. 當時佢寫緊o個個論文同一份死海古卷有關. 佢聽講有份負責 d 古卷o個 d 學者有本秘密o既 concordance, 全世界只有幾間學校有呢本o野. 佢地未 publish d 古卷, 但係佢地叫幾個學生做o左本 concordance, 將 d 碎片 catalogue 晒, 紀錄晒每一隻字出現o既地方, 並且o係o個隻字o既前後都俾多幾隻字, 有少少 context. 有用開聖經工具, 用聖經 concordance o既人就會明我講乜. 而又咁o岩, Hebrew Union College 有一本喎.


當時 Abegg 就忽發奇想, 呢個 concordance 有晒所死海古卷上面o既生字, 佢又有講 d 字o係邊度出現, d 生字前後又有少少 context, 咁理論上, 佢可以由呢本 concordance 倒轉, 整返 d 未 publish o既死海古卷出o黎!! 於是佢就用半年時間, 自己用部爛鬼 Mac 寫o左個 program 出o黎同埋打晒 d concordance 入電腦, 佢真係成功將 d 只有少數人睇過o既死海古卷整返出o黎.

Abegg 呢個咁過癮o既故事我已經聽過好多好多次, 故事中o個本咁傳奇o既 concordance 我亦聽過無數咁多次, 但係我就一路都未見過, 連相都未見過. 點知難以相信地, 今日我見到 lar! 我仲親手摸過, 影埋相 tim!!! 今日 Schuller 叫我去佢 office 教佢用電腦, 臨走個時俾我見佢間房地下個角落頭度有堆黑媽媽o既書, 我問佢係乜o野o黎, 點知原來係就當年o個 d concordance o既其中一 set! 當然唔係 Abegg 用過o既同一 set, 不過係同一樣o既o野o黎. 嘩, 開心到我, 立即就叫佢借俾我玩一陣啦, 又影相又影印, 真係好玩到痺.





Thursday 31 August 2006

PS2 天才

真係另人難以相信, 尋日我一手一腳將部 ps2 分體, 仲將佢修理好!!!! 由細到大我都唔識做任何類任o既器械o野, 連車呔都唔識換, 老豆成日笑我姐手姐腳, 一 d 都遺傳唔到佢識整錶整車o既天分. 但係今次為o左部 ps2, 我可能真係突破o左自己o既小宇宙喎.

話說我一早就覺得 部 ps2 壞壞地, 有時會 read 唔到 d 碟. 咁尋日我中午出去買隻 xenosaga 3 返o黎啦(有 artbook 送!!!), 點知部機真係完全玩唔到隻碟喎, 其他舊碟都玩到, 但係呢個新 game 就完全唔得, 每次都出 disc read error. 我一早聽過呢個"disc read error", 係 ps2 o既天敵, 好似癌症咁, 出現係遲早o既事, 我部機玩咁多年先瓜柴算係壽終正寢. 咁我就諗, 咁不如去買部新o架啦, 反正而家都減晒價. o係呢個大前提下, 我就諗, o係網上搵到 d 教人修理部機o既 website, 咁反正都買新機, 不如試下有冇得救先啦, 就算將部機分體之後一腳唔覺意踢走晒 d 鏍絲, 到時再去買新機都唔遲.

咁我就開始啦. 我要做兩樣o野, 一樣係清下個 laser lens, 另一樣係較大 dvd 個 voltage. 打開部機都唔難, 係一味上鏍絲 je, 好在老豆之前逼我帶個鏍絲批返o黎. 不過去到要打開個 cd tray 個蓋就唔得 lar, 因為 d 鏍絲好細粒, 我屋企唯一一枝鏍絲批唔o岩用. 不過好在屋企過一個路口就 Canadian Tire, 所以就拿拿臨走落去買啦, 用 $4.50 買o左一 set 細細枝o既鏍絲批仔, 要買一 set 而唔係一枝係因為我分唔清 d size, 費事買錯又要再落過去. 咁返到屋企之後呢, 就繼續啦. 開o左個 cd tray 就見到個 lens, 其實都唔見有乜污糟, 用口吹幾o野, 用 d Q-tip 抹幾o野, 就當搞掂.

跟住呢, 就到玩個 voltage 啦. 呢個要反轉部機開個底, 都係好 easy, 之後見到兩塊銀色o野, 上面寫晒 d 嚇人字句, 又 biohazard 又呢樣o個樣, 不過理鬼得佢, 上走兩粒鏍絲就可以拎走佢地. 之後就見到入面有另一塊形狀古怪o既銀色o野, 我又好小心咁拎起佢, 因為上面有條 cable 痴住唔可以斷. 跟住呢, 就見到兩個窿仔, 左面o個個係 cd voltage, 右面就 dvd voltage. 人地話要再右面個窿仔順時針方向轉少少, 每次轉少少, 直到搵到個o岩o既 voltage 為止. 我就轉少少啦, 真係好少, 點知又係咁好彩, 再部機裝返好, 一試就玩到喎.

係, 而家我覺得自己好勁!!!!! 不過其實聽起o黎好似好複雜咁, 但係網上面有埋相睇, 照住做真係好簡單. 只要有兩支鏍絲批, 相信任何人都可以修到到自己部機.

Friday 18 August 2006

驅魔人

========================================
玩銀仙學生白日見鬼 校長權充驅魔人 家長擔心反效果 (太陽) 08月 18日 星期五 03:00AM 【太陽報專訊】

大埔一間中學 約十名學生,疑在學校旁邊的林村河畔玩「銀仙」時「集體入魔」,次日上課時忽然見鬼,並大哭大喊。校長情急之下親自擔當「驅魔人」,以祈禱來克服同學的 「心魔」。不過此舉引起家長強烈不滿,批評校方未準確評估後果,擔心會引起無法預測的嚴重後遺症。教育統籌局證實接獲有關投訴,並就事件向校方了解情況, 強調已敦促學校與家長保持緊密溝通及聯絡。

香 港教師會李興貴中學約十名初中學生,早前於放學後到學校附近的林村河一棵樹下玩「銀仙」,眾人興趣濃厚,當時未感不適,但至翌日,學生們在上音樂課時怪事 陸續出現,首先有幾名同學聲稱同時見到「靈異物體」在課室內出現,之後又有同學情緒失控集體哭泣,其他在場同學都對這些突如其來的怪異舉動感到恐慌。

據 悉,為安撫學生,校長即時安排情緒不穩定的學生到一間課室集合,與學生傾談並帶領一眾涉事學生集體祈禱,情況有如外國電影中的「驅魔」情節。校內的老師透 露,該次輔導會面在校內迅速流傳,並成為學生間的熱門話題,部分低年級學生因此感到不安。有關事件傳入部分家長的耳中,即引起家長不滿。

教統局接投訴調查

家長批評學校在未知會家長的情況下進行類似「驅魔」的行為,會影響到學生的健康及引起不可預測的後果,其中一名不滿的家長向本報投訴︰「即使事實上唔係驅魔,但係咁做唔知會有乜後果,會唔會有後遺症。」

該 校校長陳城禮強調,當天只是輔導受影響的學生,絕對沒有「驅魔」的意圖,他說︰「當日在課室內的輔導過程是以輕鬆的方式進行,多次勸學生不要再碰與靈異有 關的事情,過程中亦沒有強迫學生祈禱。」教統局發言人證實曾接到家長的查詢,指稱聽聞校長為同學進行「驅魔」,局方旋即到學校調查事件,並會見該校校長、 輔導主任、教師及社工等人詳細了解事件。

教統局向校方了解後確定,該校數名學生早前因為參與「靈界玩意」而感到恐慌和不安,該校即為學生安排輔導及祈禱以安撫學生的情緒。為免家長起疑,敦促學校與家長保持緊密溝通及聯絡。

事前未獲家長同意

對於學校的處理手法,香港教育評議會副主席何漢權指出:「無論是否一間有宗教背景的學校,即使要為學生祈禱,都應該先獲得家長同意。因為靈界玩意所 牽涉的問題,絕對非數學公式能夠推理出來!」他認為校長的出發點很好,但事件可以有更好的處理手法,由於事件牽涉鬼神、宗教等問題,學校處理時應打醒十二 分精神。

他建議校方先將事件通知家長,讓學生盡快回家休息,待他們的心神安定後,才回校上課及進行輔導,又可鼓勵家長尋求心理醫生等專家的協助。此外,學校同時應告誡全校學生,不應參與靈界玩意,有需要時甚至可向教育統籌局求助,尋求正確的處理方法。

========================================

我 覺得呢單新聞最怪異o既地方唔係鬼上身, 亦唔係個校長睇"驅魔人"睇到中晒電視毒, 而係 d 家長o係度諗乜, 到底佢地做乜鬼o野咁都投訴, 而 d 教育界大粒佬又竟然同意. 報導話, "該次輔導會面在校內迅速流傳, 並成為學生間的熱門話題, 部分低年級學生因此感到不安...引起家長不滿." d 家長到底有冇分清楚係乜o野事令到 d 低年級學生"感到不安"o架? 係因為知道有同學玩銀仙玩到行徑詭異, 貌若鬼上身, 而感到不安? 還是因為聽見校長為學生祈禱所以感到不安? 我o既 common sense 話我知, 好明顯係因為有同學鬼上身所以不安啦. 所以我都唔明 d 家長做乜要對個校長不滿, 因為都唔係佢令到 d 學生不安. 又有家長話, "咁做唔知會有乜後果, 會唔會有後遺症," 大佬呀, 你自己都話, 你根本就唔知會唔會有後遺症, 咁即係話呢個純粹係你自己幻想, o係冇根據o既情況下砌個校長生豬肉 je. 我夠話香港 d 細路讀咁多書, 第日唔知會唔會幫中國發明好多核武, 引發第三次世界大戰啦.

仲有, 點解"為學生祈禱, 都應該先獲得家長同意"? 香港地有言論自由, o係巴士上面問候人娘親可以成為民族英雄; 但係為學生祈禱就先要得家長同意? 學生自己祈禱都唔需要得家長同意啦, 更何況係其他人為個學生代禱?

香 港人呢排好似好鍾意玩投訴, 係又投, 唔係又投. 早排就有人投訴, 話香港個風球唔似三號波, 要個天文台長落台. 阿台長就話, 測量風球唔係靠 feel, 而係靠睇數據. d 人又話佢死睇數字, 唔識變通. 咁唔係應該點呢? 科學就係睇客觀數據o架啦, 唔通好似陶傑咁講, 天文台應該請幾十個"睇風員," 去周圍 feel 下應該幾號風球呀? 咁你自己朝早起身出門口 feel 下得啦, 仲使乜鬼天文台? 又有人投訴"美女廚房" d 女仔煮飯煮得太差, 個節目貶低女性地位. 又唔係人地逼 d 女仔去參加比賽o既, 佢地參加o左比現唔好都算係貶低女性地位? 咁奧運, 唔通 d 中國選手o係舉重比賽表現差勁, 下下甩手, 你又話奧運係貶低中國人o既國際地位, 要令中國人出醜呀?

咁都得, 咁我鼓勵香港愛護動物協會去投訴金庸 lar, 俾封律師信佢, 因為佢筆下有招"打狗棒法", 實在太不人道, 須知道, 做狗亦有尊嚴, 唔係你話打就打o既, 殘忍成咁仲得了o既? 至於 d 綠色和平團體呢, 就應該投訴長毛, 因為佢下下玩紙棺材上街, 年中又造唔少巨型紙牌, 咁你用大聲公叫口號咪得囉, 使唔使浪費咁多大自然資源呀? 我最想投訴o既係欣宜, 投訴佢歧視肥人; 肥人同瘦人冇分別, 都一樣可以咁靚, 有靚o既肥人, 亦有樣衰o既瘦人, 但係欣宜就死要減肥, 減完又話自己點靚點靚, 做人又有返自信, 講到好似做肥人就冇得靚冇得有自信咁o既語氣, 唔知對年青人o既自我形像有乜影響o架嘛. 投啦, 睇佢地點死!

Monday 14 August 2006

The Jesus Papers



世界上有好多值得一睇o既書, 亦有好多好唔值得浪費時間去睇o既書. 呢本係屬於o個種知道冇壞, 但係唔值得花錢同時間o係上面o既書. 所以, 好醒目地, 我走去睇 d journal o既 review 就當係睇過, 果然如我所料, 真係一本廢書.

我一早就知道 M. Baigent 呢個名, 之前佢出過本書, 叫做 The Dead Sea Scrolls Deception, 話死海古卷遲遲唔 publish 係因為裡面有好多對基督教有害o既資料, 所以教庭用佢o既魔掌去阻止 d 學者 publish d 古卷, 呢個咁o既 theory 其實後來o係一齣荷里活鬼片 Stigmata 入面有出現 (係, 我成日睇鬼片...). 佢又真係幾好o野, 佢竟然可以知道 d 未 publish 兼夾全部用希伯來文同阿蘭文寫成o既古卷入面o既內容... 而佢認o左, 佢係唔識睇希伯來文同阿蘭文o既...

佢另一本出名o既書係 The Holy Blood and the Holy Grail, 本書就勁 lor, 探討耶穌點樣釘十字架會釘到死唔去, 後來仲娶埋 Mary Magdalene, 之後仲去埋法國生仔 tim. 一個類似o既故事後來都有o係, Da Vinci Code 入面出現.

到而家呢本, 食住 Da Vinci Code 同埋 Gospe of Judas 個勢出版, 當然唔會令佢o既讀者失望, 再度發揮佢o個種可以比美衛斯理o既想像力. 佢話喎, 佢"發現"o左一 d 出至耶穌本人手筆o既書信, 係耶穌寫俾 d 猶太人會堂o既, 裡面話自己唔係神個仔, 所以一路以來教會都係吹緊水, 呃人十一奉獻喎... 呢 d "Jesus papers" 當然唔係阿貓阿狗都可以去睇啦, 因為係一個以色列大有錢佬所有o既, 不過個有錢佬就帶佢去個大到可以行入去o既夾萬度睇過摸過. 佢話呢封信係o係 34 CE 寫成o既, 又話個有錢佬 owner o係幾十年前亦 show 過呢 d 信俾兩個好出名o既考古學家睇, 一個係超人 Yigael Yadin, 另一個係神人 Nahman Avigad, 佢地當然都話呢 d 信係堅o野, 直頭堅過石堅啦. 你估下我跟住o個句會話咩俾你知? 五, 四, 三, 二, 一, 開估: 冇錯, 呢兩個超出名o既考古學家當然都係已經死o左 gar lar.

唉, 呢條友仔寫 d 咁o既書, 本本都咁好賣, 本本都係 best-seller. d 人連 d 咁o既大話西遊都信得落, 我真係唔知現代人咁樣算唔算係"迷信".

Wednesday 9 August 2006

An American Haunting




Adblock


作為一齣笑片, 呢齣電影可謂十分之成功. 成功之處在於佢o既幽默感係位於深層, 唔係話人人都 feel 到, 唔會好似周星星呀, 占基利呀o個 d 咁流於表面. 而且好似"Scary Movie"咁, 佢連個戲名都玩埋, 真係唔到你唔服.

以下我就將成個故事講晒出o黎, 反正呢齣戲睇o黎都係浪費時間, 所以大家都唔使怕 spoilers. 故事話係 "based on true story", 係美國歷史上唯一一宗政府認話係鬼殺人o既奇案, 係呢齣戲o既宣傳 tag line, 好多人都聽過呢單o野, 所以中文名亦譯得好: "鬼殺人". 套戲就講好耐好耐之前o既美國, 有個家庭, 有老豆阿媽加個十零歲都幾靚o既女. 有一晚開始, 個女睏覺o個時開始有 d 無形o既鬼搞佢, 晚晚如是. 開始就搖下佢張床, 後來就將佢o係地下度拖o黎拖去, 又下下到肉咁炳佢, 一巴巴星到佢豬頭咁. 佢父母都知道, 不過都冇辦法, 阻止唔到, 叫埋 d 神父教師之類o黎都冇辦法, 猛到飛起.

到戲o既最後, 觀眾先知點解隻鬼要搞個女仔. 係因為個女仔原來一向都俾佢自己老豆搞, 後來佢頂唔順, 唔知點樣搞到可以靈魂分身出o左o黎, 晚晚打自己, 等其他人會留意到佢老豆o既惡行. 最後個阿媽知道o左呢單o野, 就用毒藥毒瓜o左個老豆, 個女仔亦變返正常, 再冇"俾鬼上身"云云...

唔係講笑, 呢齣o野真係好搞笑. 個女仔俾老豆強姦, 個鬼魂o既幫手方法竟然唔係去教訓個獸父, 而係去嚴重虐打個受害人, 打到有人去留意原來佢俾人姦過為止. 不過唔怪得佢, 話晒隻鬼得o個十零歲, 腦筍都未生埋, 當然只會諗得出 d 屎橋, 可謂合情合理, 又可搏得觀眾一笑, 何樂而不為? 最抵死係佢由戲內玩到戲外, 連個名同宣傳都玩埋. 中文名叫"鬼殺人", o係北美o既宣傳就不斷強調呢個故事係美國史上唯一一宗官方認可o既鬼殺人事件, 但係套戲去到最後就話俾你聽, 其實唔係鬼殺人, 而係個阿媽殺o左個老豆, 係人殺人 je. 嘩, 扭橋扭到咁, 真係 Sixth Sense 都要行埋一邊. Sixth Sense 就由套戲一開始o個度玩 d 觀眾, American Haunting 就由 d trailer 呀, 中文戲名呀, poster 呀開始玩 d 觀眾, 真係俾佢吹脹.

總結: 此乃奇片一齣, 成就非凡, 可謂濁世清流, 荷里活中出淤泥而不污之作.

Saturday 22 July 2006

聰明的香港人



係喎, 用返 56K 咁 d 人咪用唔到 bt 囉, 香港人真係特別醒, 全世界佢係第一個人有咁o既提議, 呀, 點解我地之前諗唔到呢個解決辦法o既呢? 查實唱片公司亦可以幫手打擊 bt, "我勸他們不要出 CD, 錄音帶、黑膠唱片已足夠". 同樣道理, 其實香港咁多非法賽車, "我勸他們不要買車, 單車已足夠", 向祖國看齊. 香港市面上有好多假銀紙流通, "我勸他們不要用銀紙, 學效古人以物易物已足夠".

Wahahahahahaha, I'm so proud of being a HongKie.

Tuesday 4 April 2006

斷背預警


==========================
「斷背預警」基督教反思大會座無虛席

王永信牧師:《斷背山》毫無出路

王牧師說:「今天我要向李安先生說話:李安先生,你要在美國出名。你現在出了一點名,但有沒有想到出名的代價是什麼﹖中國有句話說:『一將成名萬骨枯』,一個大將成名了,一萬士兵為他死,他的成名建築在一萬士兵的犧牲上。」

「李安先生,你一個人出名了,一萬個家庭被破壞、一萬對夫妻離開、一萬個青少年被誤導、一萬個家庭受到損壞。李安先生,這就是你成功的代價。」

王牧師勸喻李安:「上帝給你恩賜、聰明、智慧,希望你以後能用在『正』的方面。」
==========================

有 乜證據拍套電影令到一萬個家庭, 一萬對夫妻, 一萬個青少年被破壞誤導? 我相信呢句o野不過係佢自己一廂情願估出o黎o既, 不過既然係個人估估下, 就唔應該當眾當係事實咁講, 真係唔知邊個先至係誤導人. 唔係所有人都好似一 d o係教會長大o既基督徒咁冇腦, 人講乜佢就去做乜, 真係有本來係異性戀o既人睇完套戲變成同性戀? 真係有人本來愛自己老婆, 但係睇完套戲決定去離婚破壞家庭? 就算真係去做, 都係做o個個人o既責任, 關李安乜事? 香港又有教會領袖認話性侵犯女教友, 佢地就話"牧師傳道人都有錯o既時候", 如果有青少年睇到呢段新聞"學壞o左", 去教會非禮人, 我只會覺得係個低 b 青少年o既責任, 錯不在教會. 人有腦, 雖然係會被人影響, 不過冇理由賴落人地度. 我o既感覺就係, 香港教會 judge 人地同 judge 自己o既態度好唔同.

再講, 點解針對同性戀電影, 又唔開個大會去討論暴力電影? 從聖經o既角度, 殺人點都重罪過同性戀, 超碼"十誡"入面就有"不可殺人", 但係就冇"不可斷背". 點解唔去批評指點電影唔應該有殺人場面, 因為會誤導青少年, d 人睇完會出街殺人; 香港應該禁o左"無間道", 因為劉德華做壞人, 殺死曾志偉同梁朝偉, 成日講大話, 但係最後又冇死到, 意識不良, 教 d 黑社會o既青少年去照做, 以為入到警隊就可以幫黑幫做壞事, 神俾劉德華有靚樣有身材, 希望佢以後將呢 d 恩賜用o係"正"o既方面... 真係痴孖筋!!! 聽落係咪好痴線? 開會去批評李安就係咁痴線, 一模一樣o既 arguments. 香港教會不如搬返中國大陸住啦, 大家意見咁一致. 大陸就一定唔會有得睇"斷背山", 同埋電影 d 壞人一定俾差佬捉晒或者死晒, 意識良好. 講返轉頭, "頭文字 d"有非法飛車, "The Kingdom of Heaven"有以暴易暴殺人放火, "大丈夫"有婚外情, "公主復仇記"有婚前性行為, "午夜兇鈴"有怪力亂神, "叮噹"有靜宜o既咸濕出浴境頭, 點解單單去開個大會鬧李安呢? 我開始有 d 懷疑, 呢 d 算唔算做 discrimination? 我覺得教會可以有自己觀點, 覺得一齣戲有問題就去鬧都好正常, 但係冇理由一路 d 殺人婚外情戲都唔開會鬧, 但係一講到同性戀題材就突然覺得要去鬧, 話佢"破壞家庭".

再講, 要話"誤導青少年", 好明顯近年誤導人得最緊要o既就係影音使團o既鉅作"挪亞方舟" (unidentified object 就話實係挪亞方舟, 仲唔係誤導?), 有排都未輪到"斷背山".